Pie Judah na Israel Leele Kpra Kun
5
Yire srawɔfɛɛnlɛ pre,e kee ŋga loo,
Israel leele, e ndie tɛɛ,
yire lebiile sele kre,
e loo ni pan,
yire ki fna mbe e naa kpra kuun,
kofrakaa na, a e je.
Ki tia pie e gbun pimi ni.
E sɛ kaari pɛlɛ Mizpah na,
mu kaari maŋa pɛlɛ
nyua Tabor na, leele pre pan.
2 Lawee ŋga nu e shie
na sumi kre,
bawa sɛ kaari wee pɛlɛ e pan,
ki tia mbe e kro ndie tini.
3 Ni chin imi na yire
Israel leele nyi,
yaa jaa ndra ni na.
Ŋga e yili ni kro kre ndra na,
ki tia e n ja mbe ni sumi na.
4 E kepele fuɛn ndra na,
ki tia yaa jaa ndru mbe pan,
mi e Tafun Nyiɛkpɔɔ wre pan.
Tiɛrɛɛ niŋge sisaa
ŋga kii wa e nu kre ndra na,
ki tia e n mi e Tafun Nyiɛkpɔɔ
wre chin na.
5 Israel leele, e yɛkpɔɔmu,
e dansiɛrɛ li na e pimi li,
ki tia e gbro mu to,
a ki tia Judah leele
gbro mu to na.
6 Na e pan na e mbaala,
na e nui ni mbe sra wɔ,
mbe mi e Tafun Nyiɛkpɔɔ
wre ŋga kre,
yaa ni nya, ŋgi na hin?
Ni laa e kro.
7 E n pe kprafɛɛnlɛ,
mi e Tafun Nyiɛkpɔɔ wre yiɛ,
tiɛri e tiɛri mu e biile se.
Na e nyiɛpɔ fɔŋgɔ ble yire lii kre,
yire na e see yirɛ kro we kla.
Judah Na Israel Ŋunɔ
8 E ŋunɔ wi bnɔ fɔ Gibeah,
na Ramah na.
E ŋunɔ gblee le
Beth-Aven na.
Benjamin wolo,
e yiri e sɛ wi.
9 Mi e Tafun Nyiɛkpɔɔ wre,
mbe Israel leele ndie tini
mbe pe nɔɔ pɔ,
mi ni ni nyu yo Israel jlom yire
kro pan,
a mbe ki pe.
10 O Tafun Nyiɛkpɔɔ yo mbo,
“Ni krɔ kun na Judah
loplombo pre ni,
pre pe dnɛ nyjɛ ni pe sam gbun
yire flo yi titɛɛ.
Kre ndra na, mbe ti
mbe ni krɔkuɔn kpɔɔ.
Pan pie pe na lɔɔ
ki nyi mu le pe nu.
11 Israel leele pre kanyana kpɔɔ,
kee ŋga ki fna na pe ni,
kre pra ta kre, ŋgi na hin?
Pe yiɛ na nyina
sɛɛnlɛ wɛɛ yire sumiɛ na.
12 Mbe Israel leele kla,
a mbe Judah leele
dɔɔya putuu.
13 Ŋga Israel leele na nya
imi pe yaa yaa mu da,
a Judah leele na klɛ nya
peyɛ na kre,
kra tia Israel leele na sɛ
Assyria ŋunu jaŋgafun
wre pan,
mbe u ya pe na,
la, u nsra ja mu pe tra.
14 Mbe wi na Israel,
na Judah leele ni na jira wi.
Mi titi we pe wla mbe wo,
mbe pe ti wa,
mbe hamblɛ yii mbe sɛ,
a ndro n wa mbe pe shɔ.
15 Mbe kun ni leele pre na,
mbe sɛ su na pie kala nya
pe sisam ndra na,
mbe ki pe da.
Kre pie ni haa cha,
aada pe kanyana yire nu
pie ni nya.”