Leele Mblɛ Pe N Fraka
6
A leele pre na kna mbo,“E ti mbe o ndru mbe sɛ
o Tafun Nyiɛkpɔɔ wre pan.
U o knumu na yira ni bujibuji,
la, we o tra,
u tia klɛ to o na,
la, we ti o saanla.
2 Ble shiin ndee taarɛ wo kɔkro,
kre we ndru mbe o ŋga faŋga,
mbe wre na wre jaa tni.
3 E ti mbe o gbeŋmba,
mbe o Tafun Nyiɛkpɔɔ
wre chin,
imi na o kaan
na yila we yili bnimi kre,
pan o kaan na we ti o u nya.
We pan o pan imi na
dabra sisaa woni tra,
mbe wejinyiŋge pan kre.”
4 La, o Tafun Nyiɛkpɔɔ yo mbo,
“Israel na Judah, ni e pe mni hin?
Ni koroo ŋga kii wa e nu
kre kɔ nyaanyaa,
na nyisee nyu sugbeŋge yi,
pan ki nyi na mɛŋɛ yi,
kia mu to, na mu ki cha mu la.
5 Kre ki tia
ni ni keenyanyofɛɛnlɛ tun,
na ni kprakuɔn kee,
na kee ŋga ni mbe e kla
kre ni e pan.
Kee kre n ndra e na.
6 Ni chaa mbe e ni kori
nyjila kro nu.
Ki n pe e yurɛ
mblɛ ni e sra woni,
na ni kaan pre ni chaa.
Kie tna ni pan,
na ni leele pre we ni chin,
mbe wɛ ŋga pie yurɛ tɛɛ,
mbe sra wɔ mbe ni ŋga na.
7 La, ŋga e na da lawee
ŋga pe yeeri Adam nu kre,
e na ni nyu nunu kre kla.
8 Gilead pe kakpɔɔ ŋga leele
pe pe sisaapefɛɛnlɛ,
a Gilead pe na linkufɛɛnlɛ
lawee yi.
9 Pe srawɔfɛɛnlɛ pre pe
na kokɔɔnlɔ lɛ,
na jee nyaa na leele sri.
Hali cheche ndoo kolo
ŋga ki sɛ Shechem na kre,
pe linkuuro kee pini wa.
Tuwi pe tuwi na yire sisam kee
nyjɛ krɛrɛ pini.
10 Ni kpɔli kee ka nya Israel na,
a wejiŋge yɔ ni na.
Ni leele pre sɛ sɛɛnlɛ sumi,
mu peyɛ tɔ nɛɛrɛ ni.
11 A yire Judah leele,
ni chaa mbe ndru
mbe nyu e na,
la, nyjila ŋga nu
mbe e kla kre mbra.”