7
Na ni chaa mbe Israel leelepre nyu pe tnimu nu kre,
ŋga ni nyaa pe na kro pe sisaa,
na kefuɛn pee.
Pe peyɛ dnumu,
na lee kalonyi nu na juu,
na leele yirɛ shio pe pan
lete na jaŋga na.
2 Pe n chin na ni pe sisam kee
nyjɛ krɛrɛ sɔɔnri,
pe sisam pe fɛ mu kun,
a ki tia mba ja
mbe yiɛ wɔ yi na.
3 O Tafun Nyiɛkpɔɔ yo mbo,
“Ŋunu wre na u loplombo
yiɛ shɔ,
leele pre kefuɛn nyjɛ pe pini,
na pe fana yire na.
4 Pe kro pe leŋgeere klafɛɛnlɛ.
A pe sisam pe na,
kanhun ki nyini fnunu nu.
5 Ŋga ble pra ŋunu san
a wraa ble kpɔɔ lii kre,
u loplombo kro na gbɔ mu to,
a simi na pe kaari jijiele.
6 Pe jawala fɔɔn wru
na ŋunu wre ni,
la, pan pe kepele nyi na,
kanhun ŋga ki mbuuru ndroo yi,
na ndram saan mbe ki nyi kpɔɔ.
7 Pan leele pre krɔkuɔn nyi,
na kanhun ŋga ki nyini yi.
Pe pe ŋulo kro yii mu gbo nununu.
Hali pe wa n na ni tali
mbe ni ya pe na.”
8 O Tafun Nyiɛkpɔɔ yo mbo,
“Israel leele pe na paanu
ŋga pe fɔ,
a ki kokoo shɔ yi.
Waŋgrɛ nyjɛ yi fɛ mu pe kun
yire na pe kaan.
9 A pe n chin na,
ŋga pe kaan fumblɔ na kre,
kre ki tia pe faŋga kɔ pe nu.
Pe pe ble nyu gbun mu tɛɛ,
a pe n ki chin.
10 Israel leele yɛkpɔɔmu
dansiɛrɛ lii na pe taanla.
Hali kee nyjɛ yi pe da
yire n tia pe ndru,
mu pan mi pe Tafun
Nyiɛkpɔɔ wre pan.
11 Israel pe na hanyini
ŋmba u n kala chin wi,
u fanaa n pe yaka.
Na pe sɛ Egypt leele pan,
mbe pe ndru
mbe kna Assyria leele pan,
na pe paan ya pe na.
12 A na pe shie,
mbe pe pɛɛri na jajaŋga ni,
mbe pe yii na hanyini wi.
Pe sisam nyjɛ pe pe kre ndra na,
mbe pe ndie tini.
13 Ŋga pe ni je kre ndra na,
pe atɛ, klaa yi pe tnu ŋga pie ta.
Mbe na pe shɔ pe ndie tinɛɛ
kre kɛɛ,
la, praa kala fnɛ na taari ni na.
14 Lɛɛ nunu ni ma pe ni tali.
Pie to tra mbra julo,
imi na sɛɛnlɛ sumifɛɛnlɛ
pini kre.
Pe ni tali shɔlɔ, na simi gbɔwo.
Na pe yi ta mu kɔ,
mbe pe laa ni kro.
15 Kii wa na mi ni pe nyina
kee nyjɛ pe chin yire,
mu tia pe sheli,
nde sisam kee pe jawa na ni ni.
16 Pe laa mi jaŋgafun Nyiɛkpɔɔ
wre kro,
mu sɛ taa sɛɛn Baal
ŋga nu jaŋga ka n wa kro.
Pe pe na bɛŋɛ
ŋga na ma jaa kaan yi.
Ŋgi na hin? Nyukpɔɔmu kee
pe loplombo yuu.
Ŋunɔ pie to, mbe ki ti
mbe Egypt leele pe ta mbra tɛɛ.”