O Tafun Nyiɛkpɔɔ Yiri Mu Israel Taan
8
O Tafun Nyiɛkpɔɔ yo mbo,“E jaaraa bnɔ fɔ
mbe ni leele pre loo,
loŋgoolo paan
mbe pe wa na nyuu wi,
ŋgi na hin?
Ni leele pre nyu nunu
ŋga ndaa pe na pe ni kre kla,
mu yiri mu ni mbra
nyjɛ ni pe ŋga yire taan.
2 Kii wa na pe ni yeeri
pe Nyiɛkpɔɔ,
na yuu na ni leele lɛ,
ande pe n ni chin.
3 Pe kee ŋga ki nyu kre je,
kre ndra na,
pe loŋgoolo we pe kɔŋgɔ ni.
4 Ni leele pre pe pe ŋulo,
na pe loplombo teeri peyɛ,
a pra ni wie.
Pe swafiŋge, na swanyiɛ tɛɛ
mu sɛɛnlɛ pe,
mbe yi pe kla.
5 Samaria kakpɔɔ kre leele
swanyiɛ tɛɛ
mu napɔlɔ pe sɛɛn,
mu na ki sumi,
ki tia ni krɔ kun na pe ni kpɔɔ.
Nyjila ŋgi nu ee yili
e nɛɛrɛ kee yire nu wo?
6 Israel ndro kɛnyu tunumu
yi sɛɛnlɛ yire,
Yi n pe mi Nyiɛkpɔɔ
imi na pe yuu kre.
Kre swanyiɛ napɔlɔ sɛɛn,
ŋga Samaria leele pe
na sumi kre,
pie ki juari mbruru mbe wo.
7 Na pe fuflɛ chaa,
legboo fuflɛ pie nya,
a na pe shɔlɔ luu, yia sɛ.
Na yi waa sɛ kuraa kre,
loŋgoolo pie paan yi kun
mbe sɛ li.
8 Pan Israel leele pre pe na,
waŋgrɛ hɛnyi yire yi.
Pan pe sɛ pe na chɔ jaa yi,
tnu ka n wa ki nu.
9 Pe ndie kan na nyaa bubnɔ
ŋmba u kila na tro wi.
Ŋga pre titi chaa pe pini.
Pe sɛ waŋgrɛ yɛ wru,
mbe pe paan wi mbe pe shɔ.
10 Kii wa na pe peyɛ wru
mu waŋgrɛ ŋga.
Mbe ndru mbe pe nyu ble titɛɛ,
mbe pe ndie tini.
Kia mu mbe Assyria ŋunu kpɔɔ
wre pe yii,
mbe pe fiŋge titi.
11 Israel leele,
e sragbuɛnlɛɛ tataara sin
na sisam sra woni yi na,
la, bawa chɔɔ
e sisaa pini na yaa.
12 Ndaa ni mbra tataara nyunɔ
mu e ŋga,
la, e yi je na yi le
na waŋgra fɔŋgɔ ka nu yi yiri.
13 E sra woni na ni kaan,
mbe kaara yire wru mbe ka.
La, mi e Tafun Nyiɛkpɔɔ wre
yiɛ n shɔ e na,
ki tia mbe e sisam yire sɔɔnri,
mbe e ndie tini yi ndra na.
Na e je, mbe ti mbe e ndru,
mbe sɛ Egypt tra nu.
14 Israel leele pre
ŋmba u pe wa wre kee fɛɛ,
a pre na Judah leele ŋunu katoe,
na kakpɔɛ sin sin,
mu mboe sin mu yi fɛ mu kun.
La, mbe ti mbe kanhun pan,
mbe pe ŋulo katoe yire,
na pe kakpɔɛ yire kro sro.”