Pie Israel Leele Ndie Tini
9
Israel leele,e ble kpɔɛ nyjɛ e lii,
na sɛɛn sumifɛɛnlɛ lɛ yire ti.
E laa e Nyiɛkpɔɔ wre kro,
a e n kpra li u yiɛ.
Hali tra kre nu kro,
e eyɛ prɛ na tiɛrifɛɛnlɛ lɛ,
mu sɛɛn Baal ŋga.
La, e yiɛshɔ shɔlɔ
nyjɛ ni pe e fɔlɔ toni,
shunshun na yire na.
2 La, kia mu mbe e shɔlɔ,
na olive simi,
na simi gbɔwo cha mbe la.
3 A yaa kro o Tafun Nyiɛkpɔɔ
tra kre nu,
e plɛ we ndru mbe sɛ Egypt tra nu,
mbe plɛ sɛ sro nyjɛ e fun
li Assyria tra nu.
4 Yire trɛ yire nu wa,
yaa jaa simi woo sra wɔ,
ndee mbe sra ka wɔ wa,
mbe mi e Tafun Nyiɛkpɔɔ
wre ŋga,
mbe ki ni yiɛ nyi.
Na e yire sra yire wɔ kuraa kre,
yie pe nɛɛrɛ sro,
na sro ŋga pe pe gboo na yi.
Yire titi ee yire sro yire li
mbe yɔɔ,
yi ka wa le ni Suminyuŋgo wa.
5 A na o Tafun Nyiɛkpɔɔ
ble kpɔɛ yire lie waa da,
mni ee pe wa hin?
6 Hali na e fɛ mu shɔ e klaa nu,
ee sɛ ku Egypt tra nu,
mbe pe e yoori,
mbe sɛ e le kakpɔɔ
ŋga pe yeeri Memphis kre na.
Mbe ki ti mbe e swa yirɛ,
nyjɛ e ti e kalonyi nu yire,
mbe nyaa na wuuro tɔ
mbe yi yii.
7 Israel leele, e ndie tini
nyjila paan,
a ki mbra e na mu kɔ.
Ee fɔtɔɔrɔ ŋga ki fna na e ni ta.
Na kre nyjila kre waa da,
ee ki chin.
Ŋgi na hin? E sisam nɛɛ.
E yuu na,
“Keenyanyofɛɛnlɛ pre, jijiele lɛ,
a mblɛ ni Nyiɛkpɔɔ paara pre,
tɔɔlɔfɛɛnlɛ lɛ.”
Ŋga e sisam nɛɛ kre ndra na,
e ni pra.
8 Nyiɛkpɔɔ keenyanyofun wi mi,
a u ni wɔ u leele lefun,
mbe ni pan
mbe Israel leele jaari.
Nde mna mbe sɛ kpan,
e ni peerii pɛlɛ na hanyini wi.
Hali Nyiɛkpɔɔ Suminyuŋgo wa,
ni sɛ kaari e loŋgo.
9 Pe dɔlɔɔ yirɛ shio nyjila kro nu,
mu peyɛ kla,
na nyjila ŋga nu praa wa
Gibeah na kre yi.a
Nyiɛkpɔɔ we pe sisam yire sɔɔnri,
mbe pe ndie tini yi ndra na.
10 Ŋga ndaa yire Israel leele nya
jle kre,
e na pe ni pan na,
ni tre sɛnyi nya fimi tra nu.
Ŋga ndaa e tolɛɛlɛ pre nya kre,
pan kra pe na
ni fig tiŋge sɛŋgɛ jle wo nya.
La, ŋga pra da
Baal-Peor nyua kre na kre,
bawa pra sɛ
Baal sɛɛn kre sumi,
mna kaari afuŋgo yira ni pan,
na sɛɛnlɛ nyjɛ pe kori yire yi.
11 Israel, e kpɔɔmu we yiri,
na hanyini wi mbe sɛ.
Nyiɛpɔ wa tro chlɔ na,
mbe u siire ta, mbe se na.
12 Hali na ki pan na pe biile ta
mbe pɔɔri kuraa kre,
pie ku pei, mba wa ti.
Na mbaa yiɛ wɔ e na,
kena e atɛ.
13 Ŋga ndaa Israel nya jle kre,
wra pe ni pan na shuɛ tiŋge,
ŋga pe luu tra taan nu yi.
La, Israel we yili na u biile ni,
mbe pe sɛ pe gbo u kɛɛ.
14 O Tafun Nyiɛkpɔɔ,
kee ŋgi mu leele mblɛ pe hin?
Ti mbe pe chiɛlɛ pe gbendee.
Mbe mblɛ pie se
pre nyinimi nyumu cha mbe la,
pe bifimble ŋgɔɔri haa.
O Tafun Nyiɛkpɔɔ We Israel Kprakun
15 O Tafun Nyiɛkpɔɔ yo mbo,
“Pe kefuɛn yire,
na yire Gilgal na,
nyjila ŋga pra Jordan lɔɔ
kre kun jle kre.
Bawa ndaa yire mna pe pra,
kee fuɛn nyjɛ pra pe
yire ndra na,
a mbe pe ni mbe yili
ni tra kre nu.
Mba pe kori na, ŋgi na hin?
Pe loplombo pre kro yiri
mu ni taan.”b
16 Pan Israel leele pre nyi na,
tiŋge ŋga didinyi yi yua,
a kia jaa sɛ yi.
Pia jaa biile ta,
hali na ki pan na pe se,
mbe pe biile mblɛ kee pie
na chaa pre gbo.
17 Israel, ni Nyiɛkpɔɔ wre we e je,
ŋgi na hin? E n ndie tɛɛ u pan,
ki tia waŋgrɛ nu we ti
e na kila mbra tro.