10
Pan Israel leele pre nyi,na tre tiŋge ŋga ki sɛ
tataara yi.
Imi na praa nyɔɔ,
pe tnimu nu na shie yiɛ,
pan praa Baal sragbuɛnlɛɛ
tataara siin.
Imi na pe tra kre na tna,
mnaa yirɛ nyɔɔ pe pan,
pan chɔɔ praa dnɛ nyjɛ pra pe
na pilaasi yi,
na yi peerii yire pini yira nyɔɔ.
2 Pe lolonyi na pe fana,
ki tia pie pimi li
pe sisam yire tlo.
O Tafun Nyiɛkpɔɔ wre
we pe sragbuɛnlɛɛ yire juari,
mbe dnɛ nyjɛ pe sin na pilaasi yi,
na yi peerii yire kla peii.
3 Na ki pan ma,
pre leele pre we yo na,
“O n ŋunu ni.” Ŋgi na hin?
O n na o Tafun Nyiɛkpɔɔ
wre fiɛ.
A na o naa ŋunu ni kuraa,
yira ŋgi we na jaa pe
mbe o ŋga hin?
4 Israel leele, kewɛɛ e yuu,
na nyu yuu finfin,
na nyu nunu nyjɛ pe pe klai.
Pe tia kpra liire kaari kafinɛ,
pan pe nyi na nyaa sisaa,
wa see ŋga pe fali mu wo nu.
5 Fiɛrɛ we leele mblɛ pee wa
Samaria kakpɔɔ na pre yii.
A na pe waa
pe swanyiɛ nablɛm wre
cha mu la Beth-Aven na,
pie nyɛni.
A pan chɔɔ ki pɛɛrifɛɛnlɛ,
mblɛ pe yɛshɔɔrɔ lii,
na ki nyumu ni pre we nyɛni na,
ŋgi na hin?
Pe pe sɛɛn kre shɔ pe pan,
mu sɛ waŋgra fɔŋgɔ ka nu.
6 Pie sɛɛn kre wru, mbe sɛ
Assyria tra ŋunu kpɔɔ
wre kɛ ki yi.
Kie ti mbe nyifɛɛrɛ
Israel leele gbo,
na pe kre sɛɛn kre sumi.
7 Pie Israel leele na pe ŋunu
wre yii mbe sɛ, na kaan
ki taa lɔɔ yiɛ na na shie.
8 Sɛɛnlɛ sumi ndoe nyjɛ pe sin
nyambie na yire kro, pie yi kla.
Yire lawee yire nu Israel leele pre,
shie na sisaa pini.
Nyaa na wuuro we yiri,
mbe pe sragbuɛnlɛɛ yire tɔ.
Kre nyjila kre pie na yuu nyuɛ,
na nyambie yire pan na,
“E klɔ e pan e o juule.”
9 O Tafun Nyiɛkpɔɔ yo mbo,
“Mu yire nyjila ŋga ni,
yire Israel leele
na sisaa pe Gibeah na,
a kra tia e na tni wa mu mu,
hali mu pan mu su aŋga na kre,
ee wa na sisaa pini ni na tɛ,
ki tia Gibeah na
mbe ti ŋunɔ le e nu.
10 Na ki waa tna ni pan,
mbe e ndie tini,
mbe ti mbe waŋgrɛ peyɛ nya,
mbe paan e yii mbe jlɔnyi le e na,
e sisam tataara yire na.
11 Nyjila ka nu,
na Israel pe na nablɛm ble,
ŋmba pe nyina kala
a u ki chin wi.
We yire mbe pe kaan pɔ
u yulɔ chichie kre na,
mbe u nyaari shɔlɔ na
mbe yi mbru.
Kena pan mbe kaan pɔ
Judah yulɔ na mbe wra tra jee,
mbe Israel na ki nyaara.
12 Yire titi e frakaa luu,
e le na ee koroo titi kun.
Nyjila da mbe e kna mbe pan,
mi e Tafun Nyiɛkpɔɔ wre pan,
mbe ni e ŋga dwamu kpɔɔ.”
13 La, e je na sisam ndru tɛ,
na sisam sɛŋgɛ kuun.
Sɛnyi nyjɛ e kafinɛ kee yire sɛ,
yire e ta na lii.
Ŋgi na hin? Yire titi faŋga,
na e ŋunɔwifɛɛnlɛ tataara
pre na e kaan.
14 Ŋunɔ we le e nu,
mbe pe paan e chiɛ,
nyjɛ e mboe sin mu fɛ mu kun
yire juari.
Pan kie pe na ble nyjɛ nu,
ŋunu Shalman na sɛ
Beth-Arbel kla ŋunɔ kre,
mna chiɛlɛ na biile kro frɔ
mu gbo kre yi.
15 Bethel leele,
ŋga e sisam kpɔɔ kre ndra na,
yire kee nyjɛ we e da.
A ŋga ble pie ŋunɔ kre nɔɔ hle to,
pie Israel ŋunu wre gbo.