Nyiɛkpɔɔ U Leele Pre Kori Ma
11
Nyiɛkpɔɔ yo mbo,“Ŋga Israel na pe pɔ kre,
ndaa u kori, mna u wɔ
mu yili Egypt tra nu,
mna u yeeri ni biblɔ.”
2 La, na ni Israel leele yeeri
mbe pan ni jaara,
mbe pra feni mbra yilii ni nu.
Ni leele pre sɛ na sra woni
na sɛɛn Baal kaan,
na tuwe ndiom tɛɛn sroi
na sɛɛnlɛ kaan.
3 Mi ndaa Israel leele yii kɛ na,
mna pe nyina nyaaraa, la,
pe n chin na mi ndaa pe le.
4 Fooro chiɛn na koroo kpɔɔ ni,
ndaa pe wɔ mbe pan ni jaara,
ki n pe maŋa ndaa le pe na.
Ndaa pe wɔ pe kanyana nu,
mna pe ŋga sro imi na ki fna.
5 Ŋga pra je, a pe nsra ndru
mu pan ni pan, kre ndra na,
pe plɛ we ndru
mbe sɛ Egypt tra nu,
a pe plɛ we sɛ Assyria ŋunu wre
pan mbe u ŋunumu li pe na.
6 Brɔfiɛn yiɛshiin we na shie
mbra paan pe kakpɔɛ yire na,
a yie yi jlonwee nyu krɔɛ kuari.
Ŋunɔ we ni leele pre kla,
ŋgi na hin?
Nyjɛ pre titi chaa pe pini.
7 Ni leele pre yiɛ nyina,
na pie laa ni na.
Pie nyɛni mbra shɔfun chaa,
ŋmba we pe shɔ
pe kanyana yire nu,
la, shɔfun n wa mbe pe shɔ.
8 Israel, ŋgi kie ti
mbe ni e wɔ mbe ŋga hin?
A mni mbe ni laa e na hin?
Mni mbe ni e kla,
imi ndaa Admah chia
kre kla kre hin?
Ndee mbe e pe,
imi na ndaa Zeboiim chia
kre pe kre hin?a
Ni koroo kpɔɔ mu e ŋga mu tro,
ki tia ni loloŋgo wa ni ŋga kolo,
mbe ni kre kee ŋga pe e na.
9 Israel leele, mba ti
mbe ni krɔ kun mbe ni e kla,
ndee mbe e ndie tini na,
ŋgi na hin?
Lewo na nyjuro ma mi,
Nyiɛkpɔɔ wi mi,
a ni pe cheche e nu,
ki tia mba ti mbe ni krɔ kun
na e ni ma na.
10 Mi pe Tafun Nyiɛkpɔɔ wre,
mbe tuan na jira wi,
a na ni waa tuan na jira wi kre,
ni leele pre we seeri,
mbe yili yila tohaa wa mbe pan.
11 Pie yili Egypt tra nu
nyaanyaa na hanyiɛlɛ lɛ,
mbe yili Assyria na,
na kotulo lɛ.
Mbe ndru mbe pan na pe ni,
pe kalonyi yire nu na.
Mi pe Tafun Nyiɛkpɔɔ wre,
ni ki yo.
12 O Tafun Nyiɛkpɔɔ wre yo mbo,
“Israel leele pre pan
mu ni fɛ mu kun,
na kafinɛ, na dnumu kee ni,
a Judah leele pree wa mu yiri,
mu mi kprafun Nyiɛkpɔɔ
cheche wre taan tɛ.”