12
Kee nyjɛ Israel leele pinimbe yire bnimi,
mbe sɛ su blee kro
pe kewɛɛ nyjɛ nu tnu ka n wa.
Kafinɛ kee, na kee nyjɛ yi paan
dɔɔya ni pe pini na yaa.
Pe shie na nyu nunu pini
na Assyria leele ni,
na shie na olive simi ni
na Egypt leele dɔli.
2 O Tafun Nyiɛkpɔɔ wa
na kala ni,
mu Judah leele
mblɛ lɛ Jacob nanae pre taan,
a we pe ndie tini,
kee nyjɛ pe pini yire ndra na.
3 Pe tolɛɛ Jacob
na u ata ŋmbrɔ Esau na tun,
nyjila ŋga ni praa wa pe lo lɛɛ,
a nyjila ŋga ni Jacob na lɛ kre,
wra wi na Nyiɛkpɔɔ ni.a
4 Jacob na wi na nyjeeri bituŋu ni,
mna u ja.
Jacob na nyɛni,
mna nyjeeri bituŋu wre tali,
a wra u dwan.
Nyiɛkpɔɔ na paara
na Jacob ni Bethel na.b
5 Nyiɛkpɔɔ mɛɛ yi,
O Tafun Nyiɛkpɔɔ
Jaŋgafun wre,
a mɛɛ ŋga ni pe u chin yi.
6 Kena, Jacob nanae,
e dankna e Nyiɛkpɔɔ wre na,
e ndru e pan u pan.
E koroo na kpralie yii kɛ shiin,
e frɔ ta e e Nyiɛkpɔɔ wre shie,
mbe u ŋga u chaa pe.
7 O Tafun Nyiɛkpɔɔ wre yo mbo,
“Israel jafa lifɛɛnlɛ pre,
dnumu krayirɛ yii wa pe kɛɛ,
a pra leele jamfa.”
8 Pe peyɛ kpɔɔri na yuu na,
“O swa ta, mu oyɛ ta,
a sisam kolo na ma o tro.”
9 “La, mi e Tafun Nyiɛkpɔɔ wre,
mi ndaa e wɔ
mna yili Egypt tra nu.
Mbe ti mbe e ndru mbe tni
yonyi nyinyi nu na,
imi e na nyi mu tni yi nu,
tablɔ tra kre nu fa kre.
10 Ndaa paara
na ni keenyanyofɛɛnlɛ pre ni,
mna tia praa yirɛ nyaa
nyiɛlɛ na tataara.
A ndaa paara pe pan
yomɛɛlɛ nu.
11 Nde pra je,
mna sɛɛnlɛ sumi Gilead na,
a mblɛ pra yi sumi
pre na ku ku.
Pra nablɛm tɛɛ mna sra wɔ
Gilgal na,
a sragbuɛnlɛɛ nyjɛ na
pra sra yire wɔ kre,
pre yi juari mbe yi ble ble
lawee kre kro nu.”
12 O tolɛɛ Jacob na fɛ
mna sɛ Mesopotamia na.
Bawa wra sumi mna mbaala le,
mna chin mu chlɔ ta mna leŋge.
13 O Tafun Nyiɛkpɔɔ
na u keenyanyofun wa tun,
a wra sɛ u leele pre wɔ tnibim nu,
mna yili Egypt tra nu,
mna yire keenyanyofun Moses na
mna pe le.
14 La, Israel leele pre na tia
o Tafun Nyiɛkpɔɔ krɔ na kun
sisaa,
a ki fna mbe wra pe gbo
pe linku kee yire na.
Ŋga pra tia nyifɛɛrɛ na u gbo,
kre ndra na,
we pe ndie tini.