Amos Hlɛ
1
Amos wra yire kee nyjɛ nya mu yo. Kre nyjila kre, na uu wa chia ŋga pe yeeri Tekoa kre na, na mbaala le, a Nyiɛkpɔɔ na Israel leele kee wɔ mna u nyina. Kie pe yɛlɛ shiin, a tra na seeri kre tra kre nu. Kre nyjila kre, na Uzziah wi ŋunu Judah tra nu, a Jeroboam Jehoash biblɔ wre na wi ŋunu Israel tra nu.Nyiɛkpɔɔ We Leele Ndie Tini
2 Amos na yo mbo,
“O Tafun Nyiɛkpɔɔ yire
Zion nyua kre na Jerusalem na,
mu fuu mu paara,
a mbaala kahɛɛ yire yua,
a nyaa nyjɛ yii wa
nyua Carmel na yire kro ku.”
Syria Leele Ndie Tiniɛ
3 O Tafun Nyiɛkpɔɔ yo mbo,
“Sisam kee nyjɛ Damascus leele
kro na pini kre ndra na,
mbe pe ndie tini.
Pe ndrashelee tɛɛ
mu Gilead leele kla.
4 Kre ndra na,
mbe ti mbe kanhun
to ŋunu katoo,
ŋga Hazael sin kre na,
mbe ki shɔ mbe sɛ le
ŋunu Ben-Hadad lawee
ŋga u sin na ndra ki nu
ŋunɔ nyjila kre nu.
5 Mbe Damascus jlonwee nyu
krɔɛ yire gbun mbe kuari.
A mbe leele mblɛ pee wa
Aven landɛɛ kre nu pre kla,
pre na ŋmba kɛɛ
lebiile kanyie nyi
Beth-Eden na wre ni.
A pie Syria leele yii,
mbe sɛ na pe ni Kir tra nu.”
Pan mi e Tafun Nyiɛkpɔɔ wre yo.
Philistia Leele Ndie Tiniɛ
6 O Tafun Nyiɛkpɔɔ yo na mbo,
“Sisam kee nyjɛ Gaza leele
kro na pini suwi
Philistia tra nu kre ndra na,
mbe pe ndie tini,
a mba ni jawala chinɛ.
Pre pra ni leele wɔ
pe chiɛ na kro,
mna sɛ pe prɛ,
mu Edom leele ŋga.
7 Kre kee ŋga ndra na
mbe ti kanhun to
kakpɔɔ Gaza kre mboe na,
mbe ki lawee nyjɛ pe sin,
na ndra yi nu ŋunɔ nyjila
yire kro shɔ mbe wo.
8 A mbe Ashdod,
na Ashkelon chiɛ yire ŋulo,
na pe leele kro gbo.
Pan chɔɔ mbe Ekron kla,
mbe Philistine leele gbo pei.”
Pan mi Jaŋgafun
Nyiɛkpɔɔ wre yo.
Tyre Leele Ndie Tiniɛ
9 O Tafun Nyiɛkpɔɔ na paara na mbo,
“Tyre leele sisam nyjɛ
pe kro na pini suwi
yire ndra na,
mbe pe ndie tini,
a mba ni jawala chinɛ.
Pre pra nyiɛlɛ ka mu wa
pe nɔɔlɔ nyu nunu
ŋga pra pe na,
mna ni leele wɔ pe chiɛ na
mna sɛ pe
prɛ mu Edom leele ŋga.
10 Ki tia mbe ti kanhun paan
Tyre chia kre mboe,
na ki lawee nyjɛ pe sin,
mu na ndra yi nu,
ŋunɔ nyjila yire kro sro putuu.”
Edom Leele Ndie Tiniɛ
11 O Tafun Nyiɛkpɔɔ yo mbo,
“Edom leele sisam tataara,
nyjɛ pe pe kre ndra na,
mbe pe ndie tini,
a mba ni jawala chinɛ.
Pre pra krɔ sisaa tɛɛ,
mna pe sele wolo
Israel leele gbo,
hali pe n sra pe fooro le.
12 Ki tia mbe ti kanhun paan
Teman mboe shɔ.
A mbe sɛ Bozrah lawee
nyjɛ pe sin na ndra yi nu,
ŋunɔ nyjila yire kro sro pei.”
Ammon Leele Ndie Tiniɛ
13 O Tafun Nyiɛkpɔɔ na yo na mbo,
“Ammon leele sisam nyjɛ
pe kro na pini suwi
yire ndra na, mbe pe ndie tini,
a mba ni jawala chinɛ.
Pre pra yila tra na,
mna Gilead siirefɛɛnlɛ lɛɛ yɔɔlɛ,
mu pe biile kpɔli mu wo.
14 Ki tia mbe ti kanhun paan
to kakpɔɔ Rabbah kre mboe na,
mbe kre na ki lawee ŋga pe sin,
na ndra ki nu ŋunɔ nyjila
yire kro shɔ.
Ki ble kre,
loŋgoolo we gblee kpɔɔ kun,
mbe pan pɔɔrɔ ni,
na legboo fuflɛ yi,
mbe paan wi na pe ni.
15 Pie Ammon ŋunu,
na pe loplombo kro yii,
mbe sɛ waŋgra fɔŋgɔ nu.
Mi Nyiɛkpɔɔ ni ki yo.”