Nyiɛkpɔɔ We Waŋgrɛ Kpra Kun
3
O Tafun Nyiɛkpɔɔ wre yo mbo,“Kre nyjila kre nu, mbe ti Judah,
na Jerusalem yiyɛ ta na.
2 Mbe waŋgrɛ kro nyu ble
Jehoshaphat a Landɛɛ kre nu.
Bawa mbe pe kpra kun,
kee nyjɛ pe taa ni leele pre na
kre ndra na.
Pre pe Israel leele gbun mu nyina,
a pe sɛ waŋgrɛ yɛ nu,
mu ni tra kre yɔɔlɛ.
3 Pra kɛɛn tɛɛ mbe chin,
ŋmba we ni leele mblɛ pe yii
pre ta.
Pra nyanyjɛbɛɛlɛ,
na bichabɛɛlɛ prɛ,
mna pe swa tɛɛ na chiɛlɛ chaa,
na simi gboo.
4 Tyre, na Sidon, na Philistia leele, kala ŋgi ni e nyi mu ni taan hin? Ni fɔlɔ e toni kee ka na ree? Na fɔlɔ e chaa mbe tɔ ni na kre, kena mbe kee nyjɛ e pe ni na yire fɔlɔ tɔ e na nyaa nyaa, mbe ki e fo. 5 E ni swafiŋge, na ni swanyiɛ, na ni keshiɛn yirɛ titi koli mu sɛ tɛɛ e sɛɛnlɛ nyinyi nu. 6 E Judah, na Jerusalem leele prɛ mu Greek leele ŋga, imi kie pe mbe pe sɛ haalee mbe laa pre titi tra na.
7 E le, mbe sɛ pe wɔ mbe yili lawee nyjɛ nu e na sɛ pe prɛ kre nu. A kee nyjɛ e na pe pe na kre, mbe yi fɔlɔ tɔ e na. 8 Mbe e bibilɛ, na e bichiɛlɛ prɛ mbe Judah leele ŋga, mbe pre pe prɛ mbe Sabean leele mblɛ pee wa haalee tra nu pre ŋga.” Mi e Tafun Nyiɛkpɔɔ wre ni ki yo.
9 E kre kee ŋga kpali
waŋgrɛ yire nu,
mbe pe peyɛ kna,
mbe pe ŋunɔwifɛɛnlɛ yeeri
mbe paan ŋunɔ wi.
E ti ŋunɔwifɛɛnlɛ pre fni
mbe paan wi.
10 E e fali yirɛ yire tɛɛ
e brɔfiɛn yiɛshiin gbun,
e e brɔfiɛnlɛ nyjɛ ni e yirɛ
ndrɛ klu yire tun chomboolo.
E ti mbe fɔɔnrɔfun yo uyɛ pan
na ni sheli.
11 Yire waŋgrɛ nyjɛ e Judah tra
fɛ mu kun yire kro,
e yili e pan e fni nyaa nyaa.
O Tafun Nyiɛkpɔɔ,
pan na mu ŋunɔwifɛɛnlɛ ni,
mu pan mu wi na pe ni.
12 E ti mbe waŋgrɛ yire kro yiri,
mbe pan Jehoshaphat
Landɛɛ kre nu.
Ŋgi na hin?
Bawa mi Nyiɛkpɔɔ we tni,
mbe waŋgrɛ nyjɛ yi fɛ mu kun
yire kro kpra kun.
13 Nyiɛkpɔɔ, pe sisam kpɔɔ mu tro,
kena pe kun mu wo
imi na pe shɔlɔ pini kre,
pe taanla imi na pe tre sɛnyi taanla,
mbe yi nyumu yili,
mbe yi fɛɛri ndoo nyi
mbe wo kre yi.
14 Leele kagbenyi kagbenyi,
we fni landɛɛ ŋga pe yeeri
Jehoshaphat kre nu,
ŋgi na hin? O Tafun Nyiɛkpɔɔ
ble kre mbra mna,
a bawa we leele kpra kun.
15 Wɔmu we yeŋge, na yila tɔ,
a wɔɛlɛɛ wa na chiɛnri na.
Nyiɛkpɔɔ We U Leele Dwan
16 O Tafun Nyiɛkpɔɔ
wre yire Zion Nyua kre na,
mu gunu na jira wi,
a u mana yili Jerusalem na,
a tra, na nyjeeri na seeri.
La, o Tafun Nyiɛkpɔɔ
wre wi u leele pre fɛnkaari.
17 Na ki pan ma,
kre ee chin na mi wi
e Tafun Nyiɛkpɔɔ wre,
a nii wa mu tni ni nyua cheche
Zion na.
A Jerusalem we pe kakpɔɔ
cheche,
a waŋgra ka leele wa jaa paan
wi na pe ni,
mbe pe ja na fio.
18 Kre nyjila kre,
simi fɔŋgɔ gbɔwo we bɔ
nyuɛ yire na,
mbe yurɛ bɔ e pan
nyambie yire na,
mbe nyumu na fuu
lafoelee yire kro nu.
Kre nyjila kre,
blo ka we fo mbe yili,
o Tafun Nyiɛkpɔɔ Suminyuŋgo
kre nu,
a kre kie landɛɛ ŋga pe yeeri
acacia kre nyiŋge.b
19 Egypt we kaari fimi tra,
a ndro wa jaa tni
Edom tra nu na.
Ŋgi na hin?
Pra sɛ wi na Judah leele ni
mna ki leele gbo finfin.
20 La leele we pe Judah,
na Jerusalem na nyjila kro nu,
21 A pe linkuuro pimi ŋga pe li,
a ni n ki ti mu pe kɛ kre,
kre nyjila kre mbe ki ti
mbe pe kɛ.