Kpatɔ Tataara Pre
2
E bnɔ fɔ Zion nyua kre na,e ki fɔ ni nyua cheche kre na.
E ti mbe Judah leele kro
na seeri! Ŋgi na hin?
O Tafun Nyiɛkpɔɔ ble kre paan,
ki mbra kuraa mu kɔ.
2 Ki ble kre ndram we wɔ kprikpri,
mbe tloe lawee tɔ,
mbe ndram wa na nyaa chiriri,
pan kie pe na ndram ki woo
nyua lawee,
ŋunɔwifɛɛnlɛ tataara faŋgafɛɛnlɛ
plɛ we pan,
mblɛ plɛ pe n da
mu pan ma tun,
a pe plɛ waa daa pan ma na.
3 Pan pe nyi na kanhun yirɛ klai,
na pe shie,
pe yɛsimi pe
na Eden Kagbla kre lam yi,
la, na pe tro mu kɔ,
pe tlo pe na tablɔ tra yi,
yaka n wa mbe shɔ pe kɛɛ.
4 Na mu pe nya to mu yo soolo lɛ,
a pan pe feni
na ŋunɔ wi soolo lɛ.
5 Pan pe tini nyuɛ yire ndra na,
na sookɛɛ yi,
na pe shie pan lawee fuuru
na nyaa yi shio.
A pe tɛni peyɛ na
na ŋunɔwifɛɛnlɛ nɛɛrɛ shie ŋunɔ.
6 Na pe dani waŋgrɛ yɛ na,
mbe pe fiɛrɛ ti praa seeri,
mbe pe yiɛ pe fuɛfuɛ.
7 Na pe shie yiɛ,
mbe praa ndru mboe na,
na ŋunɔwifɛɛnlɛ lɛ.
Pe tɛni peyɛ na,
hali wa wa kna mbɛɛ ka na.
8 Mna pie yiɛ tɛɛ,
bawa pe kro shie,
a wa wa gbro wa na,
a yaka wa jaa yire pe yiɛ.
9 Pra tin gri,
mu pan mu kakpɔɔ kre tɔ,
plɛ na tro mboe yire ndra na,
a plɛ na nduu pe kalonyi yire na,
a plɛ na tro yi vromboe nu
mu le, na juolo lɛ.
10 Nyjila ŋga ni praa shie yiɛ kre,
tra naa seeri pe yiɛ,
a nyjeeri na teele.
A yila, na yeŋge na wɔ,
a wɔɛlɛɛ nsraa chiɛnri na.
11 O Tafun Nyiɛkpɔɔ na yiɛklu,
u ŋunɔwifɛɛnlɛ pre pan,
na twanri.
U wifɛɛnlɛ pre nɛɛ,
hali ndro wa jaa pe tɔɔnri.
Pe lii u nyu kee na,
a faŋga wa pe nu.
Nyiɛkpɔɔ kpra kun ble
kree fiɛrɛ ni mu tro,
a ndro n wa mbe jaa yire
mbe ki shie.
O Tafun Nyiɛkpɔɔ Leele Yeeri
12 O Tafun Nyiɛkpɔɔ wre yo mbo,
“Hali fuŋgaami, ki n kro tɔ.
E ble fun, e na nyɛni,
e na fooro lii,
e lɛɛ wɔ e ndru e pan ni pan.”
13 Yonyi ma ee wla eyɛ na,
mbe ki nyina na fooro e lii,
la, e lɛɛ wɔ,
e ndru e sɛ,
mi e Tafun Nyiɛkpɔɔ wre pan.
U lam tna,
a wre wi e dumifun.
Wa ti mbe u krɔ kun nyaanyaa,
a u koroo kpɔɔ.
U frɔ, mbe chiin
kee sisaa ŋga we pe pe.
14 Na e ndru mu pan u pan,
aada we e fooro le,
mbe e dwan,
mbe sro ndru mbe bɔ e na,
mbe ki ti e shɔlɔ ta,
na simi gbɔ wee ni,
mbe tɛɛ mbe sra wɔ mbe u ŋga.
15 E bnɔ fɔ Nyua Zion na,
e leele pre kro yeeri
mbe pe paan fni titɛɛ,
mbe ble fun.
16 E ti mbe leele pre kro fni titɛɛ,
mbe e nɛɛrɛ laa pe na.
E ti mbe loplombo, na biile,
na bifimble mblɛ pe ŋgoorii,
na bijaala, na pe pilɛ kro,
yili pe nyinyi nu mbe pan.
17 E ti mbe srawɔfɛɛnlɛ
mblɛ pe tnumu tuni,
o Tafun Nyiɛkpɔɔ yiɛ pre,
yire lawee vankam kre,
na sragbunu kre lalaa wa
mbra nyɛni, mbra yuu na,
“O Tafun Nyiɛkpɔɔ,
maa mu leele kla,
mbe ki ti waŋgra leele pre,
pe le na lewaala lɛ,
mbra pe pini mbra tɛɛ,
mbra peyɛ wie na,
‘A sena pe Nyiɛkpɔɔ
wre nyi hin?’”
Nyiɛkpɔɔ We Ti Tra Kre Tna
18 Tra kre kee na
o Tafun Nyiɛkpɔɔ shian,
a wra u leele pre fooro le.
19 A o Tafun Nyiɛkpɔɔ wre
na pe talaa loo,
mna yo mbo,
“Fuŋga mbe e ŋga shɔlɔ,
na simi gbɔwo, na simi liwo,
mbe ki ti e yi ta mbe yɔɔ,
a waŋgrɛ leele wa e le
lewaala na.
20 Mbe wifɛɛnlɛ
mblɛ pe yiri nyjeeri haa,
mu pan mu e tɔ pre ni
mbe laa e na,
mbe pe sɛ tablɔ tra kre nu.
Pe mblɛ pe yiɛklu pe pan pre,
we sɛ to epo Weŋge wo kre nu,
mbe mblɛ pe pe kro tɔ pre,
sɛ to Mediterranean epo kre nu.
Bawa pie ku mbe fɔɔn,
mbra ndio.
Kee nyjɛ pe pe e na yire ndra na,
mbe pe kla.”
21 Tra leele, yaa fiɛ,
e ti mbe e yiɛshɔ,
ŋgi na hin?
O Tafun Nyiɛkpɔɔ wre
kekpɔɛ pe mu e ŋga.
22 Nyaalam yurɛ, yaa fiɛ,
ŋgi na hin?
Nyaa nyinyi funi e kahɛɛ yire nu,
a tinyi ndru mu na sɛni,
a sɛnyi bɔ fig tinyi,
na afue tinyi na.
23 Zion leele, e ti mbe e yiɛshɔ,
e yɛshɔɔrɔ kpɔɔ li
o Tafun Nyiɛkpɔɔ wre nu.
Ŋgi na hin? U tia dabrasisaa,
na koo nyiɛ pan yi nyjila nu,
na fa yi.
24 E shunshun yire we ndru
mbe nyi shɔlɔ,
a simi gbɔ wee, na simi liwee
we e laŋgɛɛ nyi mbra woni.
25 E yirɛ nyjɛ kpatɔ na pan
mu kla fa kre,
mbe e ŋga yɛ mbe e tɛɛ yi titɛɛ.
Mi ndaa tia kpatɔ wre nyini
na pan e nu.
26 Fuŋga rɛ,
ee sro ta mbe li mbe yɔɔ.
A ee e Tafun Nyiɛkpɔɔ,
ŋmba u yire kawako kee
nyjɛ pe wre ŋga mɛɛ.
A nyifɛɛrɛ wa e gbo na fio.
27 Kre ee chin na nii wa yire
Israel leele nu,
a mi wi e Tafun Nyiɛkpɔɔ wre,
a mu kɔ mi na, wa n wa na,
a mba ti mbe nyifɛɛrɛ yire
ni leele pre gbo na fio.
O Tafun Nyiɛkpɔɔ Ble Kre
28 Yire kee nyjɛ kɔkro,
mbe ni ŋumu le leele kro nu,
mbe e bibilɛ, na e bichiɛlɛ
na ni kee nyaa mbra yuu,
mbe e blɛlɛɛlɛ, na e chalɛɛlɛ
na ŋunɛ ŋunu,
mbe e nyanyjɛbɛɛlɛ na bichabɛɛlɛ
na kee nyaa nyiɛlɛ na.
29 Kre nyjila kre nu,
mbe ti mbe ni Ŋumu wre le
ni sumifɛɛnlɛ, bilɛ,
na chiɛlɛ kro nu.
30 Kre nyjila kre,
mbe kawako kee pe nyjeeri,
na tra yiɛ na.
Nyimi we kna mbe wo,
mbe kanhun kun,
mbe wre lawee tɔ na tloe yi.
31 Wɔmu we yila tɔ,
mbe yeŋge pe na nyimi yi,
mbe o Tafun Nyiɛkpɔɔ fiɛrɛ
sisaa ble kpɔɔ kre chiin da.
32 A ndro ŋmba we o Tafun
Nyiɛkpɔɔ mɛɛ yeeri kpan,
we u shɔ. Ŋgi na hin?
O Tafun Nyiɛkpɔɔ wre ki yo mbo,
“Mblɛ pee wa Zion nyua na,
mna Jerusalem nyi kre,
pe plɛ we kro,
a mblɛ ni wɔ pre we ŋmaa ta.”