Moab Leele Ndie Tiniɛ
2
O Tafun Nyiɛkpɔɔ na yo mbo,“Sisam kee nyjɛ Moab leele,
kro mu na pini suwi,
yire ndra na, mbe pe ndie tini,
a mba ni jawala chinɛ.
Ŋgi na hin?
Pe nsra Edom ŋunu le mu nya,
mna u kajle sro,
a yira shɔ mu tɔɔnrɔ wo.
2 Ki tia mbe ti kanhun to
Moab tra nu,
mbe Kerioth lawee nyjɛ pe sin
na ndra yi nu
ŋunɔ nyjila yire kro shɔ.
Ŋunɔwifɛɛnlɛ we gble le,
mbe bnɔɛ fɔ
mbe le Moab leele nu,
mbe pe gbo putuu.
3 Mbe Moab ŋunu,
na loplombo mblɛ pee wa
tra kre nu kro gbo.”
Judah Leele Ndie Tiniɛ
4 O Tafun Nyiɛkpɔɔ wre yo mbo,
“Judah leele kro na sisam pini,
ki tia mbe pe ndie tini,
a mba ni jawala chinɛ.
Pe ni mbra yire,
na ni kaalɛɛ nyjɛ
ni pe nyina yire je.
Pe tolɛɛlɛ sɛɛnlɛ nyjɛ praa
sumi yire chɔɔ na pe taa,
a yi pe wa mu fun.
5 Ki tia mbe ti kanhun to
Judah tra nu,
mbe Jerusalem lawee nyjɛ nu
pe feni na ndra ŋunɔ nyjila yire,
kro sro mbe wo.”
Israel Leele Ndie Tiniɛ
6 O Tafun Nyiɛkpɔɔ wre yo mbo,
“Israel leele sisam nyjɛ
pe kro mu na pini,
yire ndra na, mbe pe ndie tini,
a mba ni jawala chinɛ.
Pe leele mblɛ pe fraka prɛ,
na swa shio.
Shianfɛɛnlɛ mblɛ pe pra
peyɛ na kre,
pre pe prɛ kpawrɛ ndrɔ ni.
7 Pe n shianfɛɛnlɛ le mu nya,
a pe kee ka ma na pɔlɛfɛɛnlɛ ni.
Lewo na u biblɔ chlɔ nunu cha,
mu ni mɛɛ cheche kre tɔ
nɛɛrɛ ni.
8 Yonyi nyjɛ pe shɔ leele pan,
fɔɔlɛɛ nyu na kre,
yire pe toni na shie
pe sumi nyinyi nu.
A simi nyjɛ pe leele prɛ na shio kre,
pe sɛɛlɛ yire nyinyi nu
pe shie na yi gboo.
9 Yire Israel leele na ndaa yila,
mna Amora leele kla.
Pra gede gede na cedar tinyi yi,
mna sheli na tinyi shelee titi yi,
nde ndaa pe kla.
10 Mi ndaa e wɔ,
mu yili Egypt tra nu,
mna yiɛklu e pan,
mna tro na e ni tablɔ tra kre nu,
yɛlɛ fuloeshiin,
mna sɛ e ŋga Amora leele tra,
mbe ki pe e wo.
11 Mi ndaa e bibilɛ pre plɛ wɔ,
mu pe pe ni keenyanyofɛɛnlɛ,
mna e nyanyjɛbɛɛlɛ pre plɛ wɔ,
mu pe pe Nazirite leele.
Nazirite ndro wi,
ŋmba u da mu Nyiɛkpɔɔ ŋga,
na wa simi gbɔ,
a wa ndra klu,
a wa da gboo na.
Israel leele,
kala ni fnɛ e pan ree?
Pan mi Nyiɛkpɔɔ yo.
12 La, e na je,
mna tia Nazirite leele pre,
naa simi gboo,
a e na yo ni kee
nyanyofɛɛnlɛ pre pan,
na pia na ni kee nyaa
mbra yuu e pan na.
13 Kre ndra na,
mbe e frɛ mbe juari,
imi na pe tuuro snam
taari trogo na,
mbe kraa tra juari
mbra shie kre.
14 Imi na e jele we tna tra
mbe da kro,
yaa jaa fɛ mbe shɔ.
Imi na e sheli mu da kpan,
faŋga we kɔ e nu,
a e ŋunɔ wifɛɛnlɛ wa jaa wi,
mbe peyɛ shɔ ki ble kre.
15 Snimi wafɛɛnlɛ titie pre,
pia yire mbe shie.
Na mu ja na feni,
ndee na mu soo
ja na feni kuraa kre,
ma jaa fɛ mbe shɔ.
16 Ki ble kre,
gbuntitremfɛɛnlɛ we fɛ
wejiwaara.
Pan mi Nyiɛkpɔɔ yo.”