3
Israel leele e loo,kala ŋga o Tafun Nyiɛkpɔɔ
ŋmba wra e wɔ
mu yili Egypt tra nu
wre yo mu wru e haa yi kre.
2 Waŋgrɛ nyjɛ yii wa
tra ŋga yiɛ na kro nu,
yire chiin ni wɔ,
mu na e le.
Kre ki tia,
na e sisaa pe mu ni taan,
mbe ni e ndie tini.
Nyiɛkpɔɔ keenyanyofun Tnumu
3 Leele shiin we jaa nyaari,
a pia klu mbe paara mbe fni ra?
4 Na mu loo a jira nyɛni klɔ ndoo,
mu chin na u yurɔ u nya,
a na maa loo wra gnu u sni haa,
mu chin na kaa u kaa.
5 Na ndro n pɛlɛ pɛɛri,
mni kie pe mbe hanyini yii hin?
A na yurɔ n to pɛlɛ nu,
kia wa finfin,
fɔna yurɔ to ki nu.
6 Na ŋunɔ bnɔ tin chia na,
fiɛrɛ we leele yii.
A nyibinyiɛ sisaa kee
tuuri chia na,
a Nyiɛkpɔɔ wa chin ki nu ra?
7 Na o Tafun Nyiɛkpɔɔ Jaŋgafun
wre wa yo we kee ka pe,
mbe wa ki wɔ,
mbe u kee nyanyofun,
ŋmba wi u sumifun wre nyina.
8 Na blɛkpɔɔ nyɛni,
ŋmbi uu wa mbe wa fiɛ hin?
A na Nyiɛkpɔɔ Jaŋgafun
wre paara,
ŋmbi uu wa,
mbe wa ki kpali hin?
Samaria We Ja
9 Amos, kee ŋga kpali mbe Egypt,
na Ashdod ŋulo kro loo.
Yo pe pan na pe sɛ fni Samaria,
nyambie lawee yire nu.
Mbe kefuɛn,
na leele fiŋgee sisam
ŋga ki lii wa le.
10 O Tafun Nyiɛkpɔɔ wre yo mbo,
“Pe n chin ŋga pie pe mbe fraka.
Pɔɔrɔ, na juuro kolo na pe tro
mu peyɛ ta.”
11 Ki tia o Tafun Nyiɛkpɔɔ yo mbo,
“Loŋgo wa paan,
mbe pe tra kre fɛ mbe kun,
mbe mboe nyjɛ pe sin
mu peyɛ tɔ yire juari mbe wo,
mbe pe yirɛ foolo,
pe kalonyi chichiele,
yire nu mbe sɛ.”
12 O Tafun Nyiɛkpɔɔ wre yo mbo,
“Imi blɛkpɔɔ paan,
mbe mbaalalefun yurɔ yii
mbra kaa,
mbe u wi mbe u jeelee shiin,
ndee mbe u ndie kɔɔn ta
mbe shɔ u nyu na kre,
pan Samaria we pe,
ki leele chiɛri plɛ pie ŋmaa li.
Pre pe peyɛ lii fuŋgaami
pe kalonyi chichiele yire nu.”
Bethel Sragbuɛnlɛɛ
13 O Tafun Nyiɛkpɔɔ Jaŋgafun
wre yo mbo,
“Kre kee ŋga loo,
mu Jacob nanae pre jaari.
14 Ŋga ble mbe Israel leele pre
ndie tini pe sisam na kre,
mbe sragbuɛnlɛɛ nyjɛ
yii wa Bethel na yire kro kla,
mbe yi jeŋgle chomchom
yire gbun mbe kuari,
mbe yi to tra.
15 Pe weere nyjila,
na pe ndram wrɛm nyjila nyinyi
badɛnyi nyjɛ pe hlo ŋgaala
tɛɛ mu san yire kro,
mbe yi juari mbe wo.
Yire na pe kalonyi chichiele
badɛnyi yire ni kro.”