4
E loo ni pan,yire Samaria chiɛlɛ
mblɛ e kpɔɔ kpɔɔ na nui,
mblɛ pe ta na kaa chiriri,
Bashan tra nu lɛ.
Yire e pɔlɛfɛɛnlɛ pini nyanya,
na shianfɛɛnlɛ fiŋge,
na yuu e pilɛ pan na,
“E pan simi ni mbe o gbɔ.”
2 Ŋga o Tafun Nyiɛkpɔɔ jaŋgafun
wre pe cheche kre ndra na,
u nyu yo mbo,
“Ble yɛɛ wa na paan,
mbe pe e yii na drawa ni mbe sɛ,
wa wa kro,
pan ee pe to na mbro wa
drawa na.
3 A chia kre mboo lawee
nyjɛ yi juari yire nu,
bawa pie e tini mbe yili,
mbe sɛ e wa Hamon lawee wa.
Pan mi Nyiɛkpɔɔ yo.”
Israel Leele N Na Chaa Mbe Twan
4 O Tafun Nyiɛkpɔɔ Jaŋgafun
wre yo mbo,
“Israel leele,
na e chaa e sɛ cheche ndoe
nyjɛ yii wa Bethel,
na Gilgal chiɛ yire na,
e sɛ na e sisam nyjɛ e chaa pini wa.
Na e chaa,
e na paan na e sra
wɔ yurɛ ni bnimi bnimi,
e na e yirɛ nyjɛ e yɔɔlɛɛ kɛ kɛ yire,
woni ble tataarɛ nyu na.
5 Israel leele, na e chaa,
e yiisi paanu tɛɛ e sra wɔ
e mi Jaŋgafun Nyiɛkpɔɔ
wre ŋga mboo,
e na e chaara sra nyjɛ e woni,
na eyɛ kpɔɔri na yi ni yire woni.
Yire e chaa mbra piin,
mbra eyɛ kpɔɔri na yi ni.”
Pan mi Nyiɛkpɔɔ Jaŋgafun
wre yo.
6 “Mi ndaa tia klo na to
e kakpɔɛ yire kro na,
a e je e n ndru mu pan ni pan.
7 Ŋga kra kro nyiɛpɔ taarɛ gbi,
mbe sro le kre,
mi ndaa tia nyiɛ na kun yi na,
a yira kla.
Mbe ti mbe nyiɛ pan haka,
mbe lawee ka kun mbe wa,
mbe bawa yuwa.
8 Nyumu gbɔɔ na tia,
leele naa yirii pe chiɛ na,
na shie chiɛ fɔnyi na,
praa kaan na
pie nyumu taa gbɔ,
a pe nsra ta mu gbɔ mu yɔɔ.
A nde nyjɛ krɛrɛ kɔkro kre,
e nsra ndru mu pan ni pan.
9 Ndaa tia yira,
na kaandɔɔ na e seele yirɛ kla,
a kpatɔ na pan mu e fig,
na olive tinyi kro kla,
a nde e je,
e n ndru mu pan ni pan.
10 Ndaa tia kanyana
nyininyini na e da,
imi na ndaa tia
yira to Egypt leele na kre.
Ndaa tia e nyanyjɛbɛɛlɛ
na to ŋunɔ,
mna tia pra e soolo shɔ e kɛɛ,
a gboolo ndiom
na e tnihɛɛ shɔ mu ta kro,
ande e n ndru mu pan ni pan.
11 Ndaa e plɛ kla,
imi na ndaa Sodom
na Gomorrah leele kla kre.
Kanhun nu e na nyi na kejenyi yi,
a ndaa e wɔ.
Ande e nsra ndru mu pan ni pan.”
Pan mi e Tafun Nyiɛkpɔɔ wre yo.
12 Kena Israel leele,
yire kee nyjɛ krɛrɛ paan
mbe e da.
Ŋga ni paan,
mbe e ndie tini kre ndra na,
e eyɛ kna e ni fni.
Nyiɛkpɔɔ U Yira Kro Wa
13 Nyiɛkpɔɔ wra nyuɛ,
na fuflɛ wa,
a wre wra u jawala kee wɔ,
mu lewo nyina.
Wre u nyisee na blee wa.
A wre uu wa nyjeeri,
na ŋunumu lii tra,
u mɛɛ yi
o Tafun Nyiɛkpɔɔ Jaŋgafun.