Fooro Mɛɛ
5
Israel leele e ndie tɛɛ,e kuulo nyjɛ ni tɔɔnri
na woni e na ŋga loo.
2 Israel pe na chlɔ ŋmba
u n blɔ chin wi ni pan.
Israel wi mu to,
hali wa jaa yiri na,
u to mu sni tra,
a ndro n wa mbe u yire.
3 O Tafun Nyiɛkpɔɔ Jaŋgafun
wre yo mbo,
“Israel kakpɔɔ ka we sɛ leele
kagbeŋge ni ŋunɔ,
a pe lafaa pie ndruu pan katoo.
A chia ka we sɛ na
leele lafaa ni ŋunɔ,
pe kɛ pie ndruu pan katoo.”
Na Israel Leele Jawala Chinɛ Pie Ŋmaa Ta
4 Kee ŋga o Tafun Nyiɛkpɔɔ na yo, Israel leele pre pan yi kre mbo,
“E ndru e pan ni pan,
kre ee ŋmaa ta.”
5 Yaashia kun mbe sɛ
sumi Bethel na,
a yaa shia sɛ Gilgal na,
ndee mbe sɛ Beersheba na.
Ŋgi na hin?
Pie Gilgal leele yii
mbe sɛ waŋgra fɔŋgɔ nu,
mbe Bethel kla putuu.
6 E ndru e pan,
o Tafun Nyiɛkpɔɔ wre pan,
kre ee ŋmaa ta.
Na kre ma,
we ti kanhun paan
yire Israel leele shɔ,
ndro n wa mbe jaa yire Bethel na,
mbe ki fii.
7 Yire mblɛ e kpra fɛɛlɛ
na waa shianfɛɛnlɛ na,
mu na pe dnumu,
kolo ŋga ki n fna na kre,
e wo kɔ.
Nyiɛkpɔɔ U Gbeele Na Klai
8 O Tafun Nyiɛkpɔɔ u wɔɛlɛɛ wa,
mu yi kan kan yi lawee.
Wre u tia ndram wɔmu
na kaari nyisee,
a nyisee na kna ndram wɔmu.
Wre u epo nyumu yeeri,
mbe ki paan wo tra yiɛ na.
U mɛɛ yi o Tafun Nyiɛkpɔɔ.
9 Wre u ja na faŋgafɛɛnlɛ klai,
na chiɛ nyjɛ pe mboe sin
mu fɛ mu kun yire juari
na woni.
10 E leele mblɛ pe kpra nyaa
na yuu e kala lihɛɛ nu pre pra.
11 E shianfɛɛnlɛ fiŋge,
na sro shio pe pan jaŋga na.
Ki tia kalonyi chichiele
nyjɛ e dnɛ tɛɛ mu sin yire,
yaa tni yi nu.
A e tre seele chichiele
nyjɛ e pe yire,
yaa yi simi taa gbɔ.
12 E sisam tataara,
na gbee imi
e yiri mu ni taan mu da kro,
ni yi nyu chin.
Mblɛ pe fraka kre,
e pe fiŋge,
na yirɛ shio dɔlɔɔ kolo na,
a e na shianfɛɛnlɛ kala li
ki kolo na.
13 Kena na kachiŋu kala
ŋga ki lii e nu nya ma kre,
nyu we tɔ.
Ŋgi na hin?
Kre nyjila kre pe nyjila sisaa.
14 E sisam pee ti,
e na kee nyjɛ yi fraka pini,
mbe ki ti e ŋmaa ta,
o Tafun Nyiɛkpɔɔ Jaŋgafun wre
na yire we tni,
imi na yire titi ki yuu,
na uu wa mu tni e nu kre.
15 E kefuɛn pee fun,
e kpra kori,
e na kpra lii,
e kala lihɛɛ yire nu.
Aada o Tafun Nyiɛkpɔɔ wre,
we Israel leele hamblɛ,
mblɛ pe kro pre fooro le.
16 E sisam ndra na,
kee ŋga o Tafun Nyiɛkpɔɔ
Jaŋgafun wre yo yi kre,
“Leele we na fooro nyɛnɛɛ nyɛni,
lenɛɛmu fnihaa,
na e kakpɔɛ yire lete na.
Pie falifɛɛnlɛ,
na nyɛnifɛɛnlɛ hari
mbe pe paan kuulo tɔɔnri.
17 Leele we na gblee kuun,
e tresɛnyi seele yire nu kro.
Ŋgi na hin?
Mbe pan mbe e ndie tini.”
Pan o Tafun Nyiɛkpɔɔ yo.
Ndro Wa Jaa Shɔ O Tafun Wre Kɛɛ
18 E atɛ, yire mblɛ e o Tafun
Nyiɛkpɔɔ paan sri kre.
Chichie ŋgi ble kre
we e ŋga hin?
Ndramwɔɔ ble yi mu e ŋga,
ki ble kre lewo wa yila nya.
19 Pan ki ble kre we pe na ndro feni,
mbe shɔ blɛkpɔɔ kɛɛ,
mbe sɛ fni na sisire ni.
Ndee ndro le u katoo,
mbe yo we kɛ taa buŋgo na to,
mbe wɔɔ u nu ki na.
20 O Tafun ble kre we pan wɔmu ni,
ki n pe nyisee ni kie pan,
ki ble kre ndram we wɔ kprikpri,
hali nyisee fiɛn kuraa wa pe ki nu.
21 O Tafun Nyiɛkpɔɔ yo mbo,
“Sumiɛ ble kpɔɛ nyjɛ e lii
paala kolo na yire kee ni bin,
a ni n na yi chaa mbe nya kple.
22 Na e pan na sra wɔyirɛ nyjɛ e sroi,
na shɔlɔ sra wɔ wee ni kre,
ni yiɛ wa shɔ yi na.
A nyina yurɛ mblɛ ni e pan,
mbe sra wɔ mbe ni ŋga pre,
ni n na pe chaa.
23 Mɛɛ nyjɛ e juru teeri na gbuun,
na ni kaan yire,
e gble na yi ni ni ndie.
24 La, e ti mbe kpra lie,
na frakaa pe e nu,
na lɔɔ ŋga ki fuu nyjila kro nu,
a kia jaa kɔ yi.
25 Israel leele,
yɛlɛ fuloe shiin nyjɛ nu ndaa
yiɛ klu e pan tablɔ tra kre nu kre,
ni nsra yo na e yurɛ,
na sroe tɛɛ mbe sra wɔ
mbe ni ŋga.
26 E e sɛɛn lopom
ŋga e yeeri Sakkuth,
na sɛɛn Kaiwan,
ŋga e pe na wɔɛlɛɛ yi yire
wru mu tio na sumi.
27 Kre ndra na, mi e Tafun
Nyiɛkpɔɔ Jaŋgafun wre yo na,
mbe ti mbe pe e yii tinlɛ,
mbe sɛ na e ni haalee
Damascus kro.”