Israel Leele Klaa
6
Yire mblɛ tnimu ki nyumu e ŋga Zion na,
na mblɛ na wejiŋge nyjii
Samaria na kre,
yire lekpɔɛ mblɛ ee wa Israel tra nu,
yire mblɛ pan leele shie
e na yaa pe na kre,
e atɛ.
2 E sɛ Calneh kakpɔɔ kre le,
mbe yire wa mbe sɛ
Hamath kakpɔɔ kre le,
na e yiri wa mbe e sɛ,
jaara haa Philistine chia Gath kre na,
mbe sɛ le.
Yire waŋgrɛ nyjɛ ka nyu,
mu kpɔɔ mu wɛ Israel,
na Judah trɛ yire na ra?
3 E n na chaa mbe yo na,
ndie tiniɛ ble kre paan,
la, e kepele we ti
mbe ble kre da yaari.
4 Yire mblɛ e sni sniyirɛ ndrɔ shelee,
nyjɛ yi pe yiɛyiɛ na,
na sro na katɛɛn kaa kre,
e atɛ.
5 E yɛshɔɔrɔ mɛɛ kɔɔ chaa,
na eyɛ yiɛ shio na juru mɛɛ ni,
na ŋunu David wi.
6 Simi ŋga ki chrɛgbɔɔ nyi,
kre e gboo,
na tlade ndiom tɛɛn titi faa,
la, e n na fooro lii
na Israel we kla.
7 Ki tia yire ee klu,
mbe sɛ pe tinlɛ hayɛ,
mbe e ble kpɔɛ liire yire nyu to.
8 O Tafun Jaŋgafun wre,
u da mu uyɛ ŋga mbo,
“Ni n na Israel leele
yɛkpɔɔmu kre chaa,
a pe nyinyi chichiele yire
kee ni bin, mbe pe kakpɔɔ kre,
na yira ŋga kii wa ki na kro
wru mbe pe loŋgoolo ŋga.”
9 Na leele kɛ pe kro katoo
nunu nu kuraa kre,
pie ku.
10 A na gboolo pre ndro waa pan,
mbe pe wru mbe sɛ le kre,
we ndro ŋmba u kro katoo
wa wie na,
“Ndroo wa mu ya mu na ra?”
We kna mbe yo “Ɔɔhɔn.”
Mbe ŋmba u pan gboolo pre
wru haa wre kna mbe yo u pan mbo,
“Pieri, ki fna mbe o dɔɔta,
mbe waa o Tafun Nyiɛkpɔɔ
wre mɛɛ yeeri.”
11 Na o Tafun wre waa paara,
kalonyi kpɔɛ,
na yi bɛɛlɛ kro we juari.
12 Soolo we jaa fɛ gbonyi nuu?
Ndee leele we jaa fali
epo yiɛ na ra?
E kpra liire kaari tuwe sisaa,
mu tia kpra kaari kafinɛ.
13 Yire e na wi mu Lo-Debar
chia kre shɔ,
mu ki tɛɛ na eyɛ kpɔɔri,
na yuu na e faŋga titi ni
e na tɛɛ mu wi,
mu Karnaim shɔ kree?
14 O Tafun Jaŋgafun Nyiɛkpɔɔ
wre titi yo mbo,
“Israel leele,
mbe ti mbe leele yiri
waŋgra ka nu mbe paan wi,
mbe e tra kre shɔ.
Pie paan e fiŋge,
mbe yire e nyjeeri haa sam na,
hali mbe sɛ su e tapan haa sam na
weŋge epo kre na.”