Kee Nyjɛ Amos Na Nya Nyiɛlɛ Na
7
Ki ble ka, o Tafun Nyiɛkpɔɔ na kee ka wɔ mu ni nyina. Ndaa nya na u kpatɔ tataara gbeele, kre nyjila kre, na pe nyaa nyjɛ ŋunu yurɛ we na kaa kun mu kɔ, a nyaa na ndru na funi fɔnyi. 2 Ndaa nya na kpatɔ wre pan, mu yira ŋga mu chin ŋga kro, ka tra kre nu mu kɔ, a ndaa kna mu yo na, “O Tafun Nyiɛkpɔɔ jande, mu leele Israel wolo sisam ti mu pe kɛ, mni pie pe mbe shɔ hin? Na pe n da yaka.”3 A o Tafun Nyiɛkpɔɔ, na u jawala chinɛ, mna kna mu yo ni pan mbo, “Kee ŋga mu nya kre wa pe na.”
4 O Tafun Nyiɛkpɔɔ, na ndru mu ni nyina kee ka, na u kanhun gbeele, na paan mbe ki tɛɛ mbe u leele pre ndie tini. Kanhun kre na tia, nyumu ŋga kii wa tra tapan kro, na yuwa, a tra kre na shɔ. 5 A ndaa kna mna yo, o Tafun Nyiɛkpɔɔ pan na jande, “Maa pe ma. Mni mu leele pre we pe mbe shɔ hin? Na pe n da yaka.”
6 O Tafun Nyiɛkpɔɔ, na u jawala chinɛ mna kna mu yo ni pan mbo, “Kee ŋga mu nya kre wa pe na.”
7 Kee ŋga o Tafun Nyiɛkpɔɔ, na tia ndaa ndru mu nya yi kre, ndaa nya na uu wa mu yire, buŋgo ŋga pe maŋa tɛɛ, mu kra mu sin ka mbɛɛ na, mu wre titi maŋa, ŋga ni u yirɛ kra yii kɛɛ. 8 A wra kna mu ni wie mbo,
“Amos yira ŋgi mu nya ni kɛɛ hin?”
A ndaa yo na, “Nyuŋgo kra maŋa yi.”
A wra kna mbo,
“Maŋa ŋga ni mbe tɛɛ,
mbe Israel leele kra yi kre.
Mba pe sisam tii pe kɛ.
9 Lawee nyjɛ nu Isaac sele leele,
pe sɛɛnlɛ sumi kre,
mbe yi kla,
a Israel leele pre lawee nyjɛ,
pe yo na yi pe cheche yire,
yie kaari kataa.
A brɔfiɛn yiɛ shiin ni
mbe yiri mbe
ŋunu Jeroboam ŋunumu taan.”
Nyiɛkpɔɔ Keenyanyofun Tnumu
10 Israel srawɔfun lopom wa, naa wa Bethel na, a praa u yeeri Amaziah, wre wra ndro tun, ŋunu Jeroboam pan Israel na mbo, “Amos kala sisaa kra na mu ni, leele pre nu. Kre kala ŋga u yuu kre we waŋgra kre ja, a leele pre wa jaa frɔ u kee yire na. 11 Kee ŋga u yuu yi na,
Jeroboam we to ŋunɔ,
a Israel leele loŋgoolo,
we pe yii tinlɛ
mbe sɛ na pe ni,
tra fɔŋgɔ nu.”
12 A Amaziah na yo Amos pan mbo, “Keenyanyofun yili mna, mu sɛ Judah tra nu, mu sɛ na mu kee nyaa mna yuu, mna mu nyu sro chaa wa. 13 Maashia kee nya, mbe yo Bethel na mna na. Ŋgi na hin? Chia ŋga na ŋunu suminyuŋgo nyi, a mna waŋgra kre leele kro sumi.”
14 A Amos na kna mbo, “Ni n pe Nyiɛkpɔɔ keenyanyofun, ŋmba u kee nyaa na yuu, na swa shio pre wa, mbaala lefun na wi mi, a ndaa fig tinyi le na. 15 La, o Tafun Nyiɛkpɔɔ na ni wɔ, mu yili mbaala lee kre nu, mu ni tun na ni paan u kee yo, u leele Israel wolo pre pan.” 16 Kena kee ŋga o Tafun Nyiɛkpɔɔ yo kre loo, ŋu mu yo na, mbaa shia kee nyaa yo, ndee mbe paara, mbe Israel leele pre taan.
17 Kena Amaziah, o Tafun Nyiɛkpɔɔ yo, ni yo mu pan na,
“Mu chɔ we kaari tɛtiɛrɔɔ,
chia kre lete na,
a pie mu biile gbo ŋunɔ.
A pie mu tra kre yɔɔlɛ,
mbe plɛ ŋga,
a ŋu titi we sɛ ku,
sɛɛn sumifɛɛnlɛ tra nu.
A pie Israel leele pre wɔ
mbe yili pre titi tra nu,
mbe pe sɛ pe tinlɛ plɛ tra nu.”