Yirɛ Sɛnyi Nyjɛ Yii Wa Kakɛɛ Nu
8
O Tafun Nyiɛkpɔɔ, na tia ndaa kee ka nya na, ndaa yirɛ sɛnyi nyjɛ yi nyina, nya kakɛɛ ka nu. 2 A o Tafun Nyiɛkpɔɔ, na ni wie mbo, “Amos yira ŋgi mu nyaa ŋga hin?” A ndaa yo na, “Tinyi sɛnyi nyjɛ yi be, yire ni nya kakɛɛ kre nu.” A wra kna mu yo ni pan mbo,“Ni leele Israel wolo pre,
pe kla nyjila da,
a mba ni jawala chinɛ na.
3 Na ki ble kre waa da,
mɛɛ nyjɛ pe koni
ŋunu katoo yire,
we kaari kuulo tɔɔnrɔɔ.
Ki ble kre,
gboolo we lawee
kre kro tɔ poŋgo,
mbe lawee kro ku dimm.
Israel Leele Klaa
4 Yire mblɛ e pɔlɛfɛɛnlɛ dnumu,
mu tia shianfɛɛnlɛ
na kala nyaa kre,
e loo.
5 E yuu eyɛ pan na,
ŋgi ble nyiɛpɔ fɔŋgɔ
ble lie ŋga we tro,
mbe o kolo taa o shɔlɔ prɛ hin?
Ndee ŋgi ble Wuuble ŋga we kɔ,
mbe o kolo taa sɛ o yirɛ prɛ wo,
mbe kolo ta,
mbe ka ya yirɛ ndrɔ na,
mbe ka kun yirɛ nyjɛ ni
o yirɛ kra na,
mbe leele ta mbe dnumu wo?
6 A oo jaa shɔlɔ fue,
chaa yi chichiele nu,
mbe yi prɛ ndrɔ shelee.
Mbe shianfun ŋmba u fɔlɔ li,
a wa jaa ki tɔ ta,
ndee ŋmba wa jaa kpawrɛ lɔ,
mbe le ta,
mbe u lɔ tnu.”
7 O Tafun Israel leele Nyiɛkpɔɔ wre, u da mbo,
“Mba pe sisam nyjɛ,
pe pini yire fɛɛ fio.
8 Pe sisam pee ndra na,
mbe ti tra kre seeri,
mbe ki leele mblɛ pee wa ki na,
kro fooro li.
Waŋgra kre we seeri poŋgo,
mbe pe na Egypt lɔɔ,
ŋga pe yeeri Nile
kre ki nyi na mbapilɛ waa,
mbe lawee tɔ,
mbe ndru mbe tii.”
9 O Tafun Nyiɛkpɔɔ jaŋgafun wre yo mbo,
“Ki ble kre,
mbe ti yila to lafo na,
mbe dram wɔ lafo chrichri na.
10 Kre nyjila kre,
mbe ti mbe e ble kpɔɛ
lie kaari kumu pee,
mbe e yɛshɔɔrɔ kaari nyɛnɛɛ,
na fooro lie.
Ee e ndrɛ klu,
mbe kumu yonyi tɔ,
mbe pe na sefɛɛnlɛ,
mblɛ pe pe pɔ nunu chom,
ŋmba u ku nyɛni lɛ,
ble kre we pe fooro kpɔɔ ble.
11 Nyjila kaa wa na paan,
mbe ni ti klo to tra kre nu,
ki n pe na sro klo kie to,
ndee nyumu gbɔɔ klo yi,
la, Nyiɛkpɔɔ kee kre klo yi.
Mi jaŋgafun Nyiɛkpɔɔ wre,
ni ki yo.
12 Kre nyjila kre,
leele we nyina,
mbe sɛ yilafinhaa na yilatohaa,
mbe sɛ nyjeeri haa,
na tapan haa,
pie kila tro lawee kro nu,
mbra Nyiɛkpɔɔ kee kre chaa
mbe loo,
a pia ki ta mbe loo.
13 Kre ble kre,
hali bichabɛɛlɛ,
na nyanyjɛbɛɛlɛ faŋgafɛɛnlɛ,
we ku nyumu gbɔɔ tlo.
14 Pre leele mblɛ,
pre pe Samaria sɛɛnlɛ,
nyifɛɛrɛ wee yire dani,
na yuu mbo,
‘Ŋga sɛɛn ŋga Dan na kree wa,
a Beersheba wo kree wa ŋga,’
‘Oo taa yi kro.’
Mblɛ pe yuu ma kre,
pie to,
a pia jaa yiri na fio.”