Hosea Tali Mu Israel Ŋga
14
Israel leele, e ndru e pane Tafun Nyiɛkpɔɔ wre pan.
E sisam ŋga e pini tia e to.
2 E ndru e pan
e Tafun Nyiɛkpɔɔ wre pan,
e yo u pan na,
“Jande o sisam ti mu o kɛ,
mu o nyiɛtalaa loo.
Oo mu ŋga mɛɛ, mbe ki pe
na sra o wɔ mu mu ŋga.”
3 “Assyria waŋgra kre wa ja
mbe e shɔ,
a ŋunɔ wi soolo wa ja
mbe ya e na.
A waa yo o sɛɛnlɛ yire pan,
na o Nyiɛkpɔɔ yi na.
O Tafun Nyiɛkpɔɔ,
ŋu chiin mu bijro fooro chini.”
4 O Tafun Nyiɛkpɔɔ yo mbo,
“Ni chaa mbe ni leele pre ndru
mbe pan ni pan.
Na pe pan, mbe lɛɛ wɔ
mbe pe kori,
a mba krɔ yii na pe ni na.
5 Mbe pe ni leele Israel wolo
pre pan na,
nyiɛ ki paan tra
ŋga ki yua nu yi.
A pie nyu na lɔɔ chia toto yi,
mbe didinyi kan
na Lebanon tinyi yi.
6 Pe klɛ we vala mbe nyu,
na olive tiŋge yi.
Mbe pe ndiom tna,
na Lebanon klɔ tinyi yi.
7 Mbe ndru mbe ni leele
Israel wolo pre le,
a pie shɔlɔ luu na, mbe yi nyu,
mbe pe nyu na afoo see yi.
A pie mɛɛ ta
na Lebanon simi gbɔwo yi.
8 Na ki pan ma,
Israel leele kee ka ma
na sɛɛn ni na.
Mbe pe nyiɛtalaa loo, mbe pe le.
Mbe pe na tiŋge wrɛ
nyiŋge wo yi,
mbe nyimi wo pe na.
A mi pan
pe dwamu kro we yiri.”
9 Mblɛ pe kala chin pre,
we yire kee nyjɛ pe nyunɔ
hlɛ ŋga nu ŋga nɔɔ loo.
O Tafun Nyiɛkpɔɔ
wre kooloe kro fraka,
a leele mblɛ pe fraka
pre na taari yi na,
la, sisampefɛɛnlɛ pre gbroi yi na
na tuuri, ŋgi na hin?
Pe u kooloe yire wa.