Jonah 4

Jonah Krɔ Na Kun Nyiɛkpɔɔ Ni

Ŋga Nyiɛkpɔɔ na u jawala chinɛ kre ndra na, Jonah yiɛ na je, a u krɔ na kun. 2 Ki tia wra Nyiɛkpɔɔ tali mbo,

“Ni Tafun Nyiɛkpɔɔ, nyjila ŋga nu ndaa wa katoo kre, ni nsra yo na ni chin na mu mu jawala chinɛɛ? Kre kra tia a ndaa feni mbe sɛ Tarshish na kre. Ni chin na mu lewo kori, a mu foorochiɛn kpɔɔ, a muu frɔ ni, na nyɔɔ lewo na, a nyjila kro nu mu chaa mbe mu jawala chinɛ mbe ma lewo ndie tini. 3 Kena ni Tafun Nyiɛkpɔɔ, ti mbe ni ku, na ni ku prɔ ni pan, ŋga mbe ŋmaa li na.”

4 A o Tafun Nyiɛkpɔɔ na Jonah wie mbo, “Kena ki fna mbe mu krɔ kun ra?”

Nyiɛkpɔɔ Na Jonah Yiɛ Kee Yo U Pan

5 Na Jonah yili kakpɔɔ kre mbookrɔ, mna yiɛ tɛɛ yila fin haa, mna sɛ asɛkɛ ka sin mu tni ki nyimi, na le kala ŋga Nyiɛkpɔɔ we pe kakpɔɔ kre na.

6 A o Tafun Nyiɛkpɔɔ na tia afoo tiŋge ka na yiri mna nyimi wo asɛkɛ kre na, mbe yila wa u gbun, mbe ki ti wejiŋge nyjii u na, ŋga Jonah na ki nya kre u yiɛ na shɔ titi. 7 La, ŋga ble na wɔ, ki nyisee nyu na, Nyiɛkpɔɔ na tia a fiɛn wa na pan mu afoo tiŋge kre ka, a kra ku. 8 Ŋga yila na yili kre, Nyiɛkpɔɔ na tia fuflɛ wrɛŋgɛ titi na gbun mu yiri yilafinhaa. A yila kre na wɛɛri mna Jonah ndra lalaa sro, a wra jire. A wra kna mbo, “Na ni ku kuraa prɔ, ni ŋmaa na.”

9 A Nyiɛkpɔɔ na Jonah wie mbo, “Kena ki fna mbe mu krɔ kun na afoo tiŋge kre ni ree?”

A Jonah na kna mbo, “Ki fna mbe ni krɔ kun, a ni kumu prɔ ni pan ni ŋmaa na.”

10 A o Tafun Nyiɛkpɔɔ na yo u pan mbo,

“Afoo tiŋge kre kee mu yaa finfin, ŋu ma mu yaka pe ki na. Blee ki fin mu lɛ, ki nyisee na, a ki ku. 11 La, Nineveh leele wɛ kagbenyi lafaa na fulo na, a pan pe yurɛ nɛɛ, kena ki n fna mbe ni ti mbe kre kakpɔɔ kre leele kee ni shian ra?”