Jonah Na Li Nyiɛkpɔɔ Kee Na
3
A o Tafun Nyiɛkpɔɔ na paara Jonah pan shiinwo mbo, 2 “Sɛ Nineveh kakpɔɔ kre na, mu sɛ kee ŋga mbe yo mu pan kro kpali pe pan.” 3 Jonah na o Tafun Nyiɛkpɔɔ nyu kee kre loo, mna sɛ Nineveh na. Kakpɔɔ titi na yi Nineveh, a ble taarɛ ni mu jaa ki nyaari mbe sɛ su ki nyu na. 4 Jonah na sɛ le chia kre na, wra ble nunu tɛɛ mu nyaari mu kee kre kpali mu tro mbo, “Mna blee fuloe shiin Nineveh we kaari kajaa.”5 Nineveh leele pre na kala ŋga Nyiɛkpɔɔ yo kre loo, mna ki shɔnli. Ki tia pra ki kpali peyɛ pan na ki fna mbe pe blefun mbe yire pe lekpɔɛ na, mbe sɛ su pɔlɛfɛɛnlɛ kro na, mbe pe kro kumu yonyi tɔ tɔ, mbe ki nyina na pe laa pe sisam kro.
6 Ŋga Nineveh ŋunu na Jonah kee kre loo, a wra tin mu yiri u ŋujɔɔn na, mna u dodoŋgi foli mu wa, mna kumu yoŋgo wru mu tɔ, mna sɛ tni tɔɔnrɔ nu. 7 A wra tia pra ki kpali Nineveh na kro mu tro mbo,
“Kee ŋga mi ŋunu, na ni loplombo yo yi kre, ndro waashia yaka ka, a yaashia ti mbe katoo yurɛ, pe kpɔɛ na pe fiɛnfiɛn kro yaka le nyuu, ndee mbe nyumu gbɔ. 8 E ti mbe leele kumu yonyi tɔ, mbe pe yurɛ tɔ tɔ yɛ na. E ti mbe ndro kro nyibinyiɛ tɛɛ mbe nyɛni mbe Nyiɛkpɔɔ yeeri, mbe sisam, na pɔɔrɔ kee yire pee ti. 9 Ŋmbi u chin hin? Aada Nyiɛkpɔɔ we jawala chinɛ, mbe o fooro le, mbe wa o gbo.”
10 Ŋga kra pan ma kre, Nyiɛkpɔɔ na nya na leele pre pe jawala chinɛ mu laa pe sisam kro. Ki tia wra u jawala chinɛ, mna pe fooro le, u nsra pe kla na.