2
Mbe nduu mbe yirenyuŋgo gedeŋge,
ŋga na pe yire na chia sri
kre ndra na,
mbe shie mbe le,
kee ŋga o Tafun Nyiɛkpɔɔ
we yo ni pan,
mbe ni ni nyu wɔ u pan
ni taanraa kre na.
O Tafun Nyiɛkpɔɔ Na Habakkuk Nyu Wɔ
2 O Tafun Nyiɛkpɔɔ Habakkuk nyu wɔ mbo,
“Kee nyjɛ mu nya nyiɛlɛ na
yire nyunɔ mu tɛɛ,
yi nyunɔ chasi dnɛ kpɛfrɛɛ na,
na ndro yi nya,
mbe u jaa yi tɔɔnri.
3 Kee nyjɛ mu nya nyiɛlɛ na yire,
yi nyjila n ta mu da tun,
a yie pe ma yɛŋgɛ.
Na ki waa na mɔɔ kuraa kre,
mu frɔ ta rɛ,
kie pe imi na ni ki yo kre.
4 Mi Nyiɛkpɔɔ, ni yɛkpɔɔmufun je,
la, frakafun we yire shɔnlie na
mbe ŋmaa ta.
5 Yɛtaara lewo fana.
Jajaarafɛɛnlɛ peyɛ kpɔɔri,
a pia jaa tni mbe wuu.
Pan pe jajaara nyi
na gboo faŋga yi,
ndee na kumu yi,
kraa ta mbe yɔɔ,
kre ki tia pra wii
na waŋgrɛ kro yiri,
na shie na pe piin tinlɛ.
6 La, leele mblɛ pe wi mu yii pre,
we na mblɛ pe pe yii pre pini,
mbra tɛɛ mbra yuu mbo,
‘Mblɛ pe juuro yirɛ fa
mu ble pre, pe atɛ.
Pre pe leele yirɛ shio
pe pan jaŋga na,
yi kro nyu we to chɔ.’
7 Yire naa yoo ee chin kre,
na yire mblɛ e sɛ wi
mu plɛ yii pre plɛ fɔlɔ li,
mbe pe e yii, mbe nyumu le fɔlɔ
ŋga e li kre nu,
mbe ti e ki tɔ jaŋga na.
E loŋgoolo we pan mbe le e nu
mbe e na seeri,
a pie e yirɛ foolo mbe sɛ.
8 E waŋgrɛ tataara foolo,
la, pe leele mblɛ pe kro pre,
we paan e foolo na, ŋgi na hin?
E nyimi kna mu wo,
mu trɛ na kakpɔɛ,
na yi leele kla.
9 E atɛ, yire mblɛ e tro kooloe
nyjɛ yi n fna na,
a yire na e sele leele eyɛ ta,
na yuu na yaka wa jaa e ta.
10 Nyifɛɛrɛ we yire
na e sele leele gbo,
mbe ki ti e kla,
kee nyjɛ e taa waŋgrɛ tataara
na yire ndra na.
11 Hali dnɛ nyjɛ yii wa mboe
nyjɛ e sin yire nu,
na kɛɛn nyjɛ e wa
e nyinyi ndra na yire kuraa,
we dansiɛrɛ li mbe e taan.
12 E atɛ! Yire mblɛ e yire
nyimi knanwoo na,
mu chia na kakpɔɔ sin.
13 O Tafun Nyiɛkpɔɔ wre we ti,
yirɛ nyjɛ e fna mu ta,
na e eyɛ kpɔɔri na yi ni finfin,
yire kro shɔ mbe wo.
14 Imi na nyumu nɛɛ epo nu kre,
pan o Tafun Nyiɛkpɔɔ wre
yɛnyiŋge chiŋgɛ we kpɔɔ tra.
15 E atɛ! Yire mblɛ e simi kna
na plɛ kaan, mbe pe gbɔɔ to,
mbe pe fɛɛrɛ wɔ fimi na.
16 Ŋga ee yɛnyiŋge ta kre,
nyifɛɛrɛ kie kna mbe e gbo.
Yire na ki da fuŋga,
kena e gbɔ e to,
mbe leele e fɛɛrɛ nya,
kie ti mbe nyifɛɛrɛ e gbo,
mbe e buuro fun.
17 Lebanon klɔ tinyi
nyjɛ e chan peii kre,
fuŋga ki da e na,
mbe pe e chile mbe wo.
E na ki yurɛ gbo,
fuŋga yurɛ we e piɛri.
Yire kee nyjɛ we e da,
ŋgi na hin? E linku kee pe,
mu pɔɔrɔ li waŋgrɛ kakpɔɛ,
na yi leele na.
18 Tnu ŋgi kii wa sɛɛnlɛ nu hin?
Lewo u kɛ tɛɛ mu yi tɛ.
Yia jaa kee chiriri ka pe,
na kafinɛ kee bɔkɔ,
Mblɛ pe yi gbeele pre,
pe kɛ nyu tnumu
na pe peyɛ wru mu taa,
yire sɛɛnlɛ nyjɛ, yia jaa paara kple.
19 E atɛ, yire mblɛ e yuu
tiŋge kɔɔn pan na yiri ɛ,
mbe kna mbe yo dnɛ pan
na nyi ɛ.
Kena sɛɛn we jaa ndro
nyina kalaa?
Sɛɛn n pe yaka yira,
yi yɛɛ wa swanyiɛ,
na swafiŋge pe nya mu wo yi na,
ŋumu n wa yi nu.
20 La, o Tafun Nyiɛkpɔɔ
wree wa u Suminyuŋgo
cheche kre nu,
kena e ti mbe yira ŋga kii wa
tra ŋga nu kro nyu ku u yiɛ.”