Habakkuk Nyiɛtalaa
3
Nyiɛkpɔɔ keenyanyofun Habakkuk nyiɛtalaa yi kre.2 O Tafun Nyiɛkpɔɔ, ni mu mɛɛ
ŋga ki yili kre kee loo,
a kee nyjɛ mu pe
yire ni pe kawako ni mu tro.
Nyiɛkpɔɔ, yire kee yire pe
o nyjila ŋga nu mbe o nya.
Jande, na mu krɔ waa kun,
mbe mu o fooro le,
imi na mna o tolɛɛlɛ pre
fooro le kre.
3 O Tafun Nyiɛkpɔɔ,
ŋu mna yire Edom na,
mna pan mu leele pan,
Nyiɛkpɔɔ cheche ŋmba mna
muyɛ nyina Paran nyua na.
A mu yɛnyiŋge na nyiɛ yiɛ tɔ,
a praa mɛɛ koni
na mu mɛɛ kpɔɔri
tra ŋga nu poŋgo.
4 Pan mu yɛnyiŋge chiɛnri
na yila yi,
a yirɛ na nyini mu kɛɛ plipli,
yire nu mu mu jaŋga kpɔɔ
kre ndra.
5 Na mu shie mbe yira bɛɛlɛ
yiɛklu mu pan,
mbe kumu taa mu kro.
6 Na mu yire titɛɛ,
mbe tra na seeri,
na mu yiɛ wa mu le,
mbe waŋgrɛ na seeri.
Fafa nyuɛ, na nyambie nyjɛ lawee
mna nyaari mu tro fa yire,
yi juari mu wo.
La, ŋuu wa nyjila kro nu.
7 Ndaa Cushan leele yonyi nyinyi
nya na yi seeri,
a fiɛrɛ na Midian leele yii.
8 O Tafun Nyiɛkpɔɔ,
mu krɔ na kun na lɔɛ,
na epo ni,
a mna tia yira pile,
a mna tro na mu soolo,
na mu sookɛɛ ni,
mna pan mu wi
mu mu leele shɔ.
9 Mna mu bɛŋɛ gbeele mu tɛɛ,
na chaa mbe mu snimi ŋu.
A mna tra yɔɔlɛ na lɔɛ ni.
10 Ŋga nyuɛ yire na mu nya,
yira seeri,
nyiɛ na wo tra kpɔɔ,
a tra na yɔɔ mu nyi na yili fimi na,
a kra tia epo nyumu naa mbapilɛ waa.
11 Ŋga mu snimi, na mu chombo
naa nyini na tro,
na nyiɛtwanraa yi kre,
yila na yeŋge na yire titɛɛ.
12 Krɔ na mu kun kpɔɔ,
a mna waŋgrɛ yire taanla
mu tro.
13 Mna sɛ mu leele pre shɔ,
mna mu ŋunu ŋmba mu wɔ
wre shɔ.
Mna sisampefɛɛnlɛ pre yɛklo
gbun mu gbo,
mna u kotɔmblɔ pre kla peii.
14 Mna wre titi chombo tɛɛ
mu u su ndra na,
a u ŋunɔwifɛɛnlɛ na kan na paan
mbe o gbun mbe nyina,
pe yiɛ na shɔ na pie o ta mbe kla,
pra o le na leele mblɛ o fɛ
mu sɛ ndra kaarihaa ka nu lɛ,
la, mna pre titi wiyirɛ tɛɛ
mna pe ndrɛ gbun mu juari.
15 Mna mu soolo tɛɛ
mu epo taanla mu tro,
a kra tia tafɔkɔ naa kuun.
16 Ŋga ndaa yire kee nyjɛ loo kre,
ni gbun na yɔ ni na,
a ni nyu naa seeri.
A ni kajle naa kuu ni na,
a ndaa nyaari na gbroi.
La, ni frɔ na Nyiɛkpɔɔ sri,
mbe u leele mblɛ pra wi
na o ni pre ndie tini.
17 Kii wa na sɛnyi n wa
fig tinyi na,
a tre sɛnyi kɔ,
a olive tinyi n ja mu sɛ,
a bleju nyjɛ pe luu yire n nyu,
a o mbaala ku mu kɔ,
a o nui kɔ nagbɛɛ,
18 nde nyjɛ krɛrɛ kɔkro ni,
mbe ti ni yiɛ shɔ
o Tafun Nyiɛkpɔɔ wre na,
mbe ti mbe ni yɛshɔɔrɔ kpɔɔ
ni ŋmaashɔfun Nyiɛkpɔɔ
wre na.
19 O Tafun Nyiɛkpɔɔ Jaŋgafun
wre wi ni faŋga.
U ni jeelee pe na kafaa wi,
mbe ni jaa nduu
mbe sɛ nyuɛ na mbe shɔ.