Jawala Chinɛɛ
2
Nyifɛɛrɛ lafɛɛnlɛ waŋgra,e jawala cha,
2 mbe nyjila kre chiin da,
na kre ma pie e pɔ
mbe sɛ wa na afoo yi,
mbe e jawala cha,
mbe o Tafun Nyiɛkpɔɔ
wre krɔ chiin kun na e ni kpɔɔ.
3 Yire mblɛ e eyɛ nyjii tra kre nu,
na lii o Tafun Nyiɛkpɔɔ
wre kee na kre,
E eyɛ nyjii
e kee ŋga ki fraka haa cha,
e eyɛ nyjii
e o Tafun Nyiɛkpɔɔ wre ŋga,
aada we e shɔ
mbe yili u krɔ kun ble kre nu.
Nyiɛkpɔɔ Philistia Leele Kpra Kun
4 Ndro nunu wa kro
Gaza kakpɔɔ kre na,
a Ashkelon kakpɔɔ kre we ja.
A lafo chrichri na leele we fɛ
mbe Ashdod kakpɔɔ kre ti,
a pie Ekron leele ni
mbe yili kakpɔɔ kre na.
5 Yire Philistia leele mblɛ ee wa
mu tni epo nyu na kre, e atɛ.
Ŋgi na hin?
O Tafun Nyiɛkpɔɔ wree wa
na kala ni mbe e taan.
U paan mbe e kla,
hali ndro nunu wa kro e nu.
6 E tra ŋga kii wa mu sni
epo nyu na kre,
kie pe mbaala kahaa,
na mbaala nagbɛɛ lawee.
7 Judah jlom leele mblɛ pie kro kre
pie e tra kre bali mbe tni.
Bawa pe mbaala we na kaa.
Na yila kɔ, mbe leele pre we sɛ
sni nyinyi nyjɛ yii wa
kakpɔɔ Ashkelon na yire nu
mbe wuu.
Pe Tafun Nyiɛkpɔɔ wre we pe le,
mbe kee ŋga pe pini kro nyu
mbe pe ŋga na.
Nyiɛkpɔɔ Moab Na Amon Leele Kpra Kun
8 O Tafun Nyiɛkpɔɔ Jaŋgafun wre yo mbo,
“Ni Moab na Ammon leele
pre tɛɛlɛɛ nyjɛ pe ni leele
pre tɛɛlɛ,
na pe piɛri mbe pe tra shɔ kre,
ni ki loo.
9 Ŋga mi Nyiɛkpɔɔ Israel
leele Nyiɛkpɔɔ wree wa ŋga,
ni da na mbe Moab na Ammon
leele kla na Sodom,
na Gomorrah kakpɔɛ yire yi.
Yie kaari weŋge tuu weele,
mbe nyaa yiri mbe yi tɔ,
yie sni tra waara
mbe kro ma nyjila kro nu.
Ni leele pre mblɛ pie kro
pre we pe tra kre foolo mbe tni.”
10 Ndie tinɛɛ ŋga Moab na Ammon
leele we ta pe yɛkpɔɔmu,
na pe tɛɛlɛɛ nyjɛ praa o Tafun
Nyiɛkpɔɔ Jaŋgafun wre leele tɛɛlɛ,
na pe pini na tɛɛ yi kre.
11 Na o Tafun Nyiɛkpɔɔ wre waa tia,
waŋgrɛ yire sɛɛnlɛ yire pe
yirɛ wɛɛ tra kre nu kre,
u kee we pe fiɛrɛ ni pe pan kpɔɔ.
Na ki pan ma,
waŋgrɛ nyjɛ tra ŋga nu kro,
we u sumi pe tnihɛɛ nu.
Nyiɛkpɔɔ We Ethiopia Leele Kpra Kun
12 O Tafun Nyiɛkpɔɔ wre we Cush
leele gbo brɔfiɛn yiɛshiin ni.
Nyiɛkpɔɔ Assyria Leele Kpra Kun
13 We u jaŋga nyina Assyria leele
na mbe pe kla.
We ti mbe Nineveh kakpɔɔ
kre kaari kajaa,
mbe yua na fimi tra
ŋga nu nyumu n wa yi.
14 Bawa nyaalam yurɛ
we na sni mbra wuui,
pre na yurɛ nyininyini ni.
A hanyiɛlɛ nyininyini we na sni
yi mbokuɛn nu,
mbe pe nyɛnɛɛ na tini
yi vromboe nu,
mbe kramboe bɔ yi jlonwee nyu na,
mbe cedar kɛɛn ndrɔshelee
nyjɛ ni pe nyinyi yire
pe yire foli mbe wo.
15 Kre kakpɔɔ ŋga leele praa yuu
fa na,
kakpɔɔ ka n wa pe yiɛ tra ŋga nu,
a yaka n pe shian,
a yaka wa jaa pe tɔɔra kre.
Pre praa yuu peyɛ pan na,
wre lɛ kre, ndro n wa o yiɛ.
Aŋga kre kakpɔɔ kre ki ja kre.
A nyaalam yurɛ na sni wa.
Leele mblɛ pie na tro mbe ki nya
kro we na pe pini mbra tɛɛ,
mbra kɛ nyini kakpɔɔ kre na.