Imi Na Jerusalem We Taa
3
Jerusalem, atɛ! Ŋgi na hin?Ŋu mu yiri mu Nyiɛkpɔɔ taan,
mu na ŋu titi leele fiŋge,
mu muyɛ kla.
2 Jerusalem wa taa
ndro kee na,
a wa ti ndro u fraka,
a u n na kaan
o Tafun Nyiɛkpɔɔ wre na,
ki leele wa da pe Nyiɛkpɔɔ wre na.
3 Pan pe loplombo nyi na jirae
mblɛ pe gnu lɛ,
a pe kala lifɛɛnlɛ pe
na komboolo lɛ,
na pe kaara ta yilakɔŋgɔ,
pia ka mbe ka ti bnimi.
4 Jerusalem Nyiɛkpɔɔ
keenyanyofɛɛnlɛ pre peyɛ kpɔɔri,
a ndro wa jaa dankna pe na.
Ki srawɔfɛɛnlɛ Suminyuŋgo
kre tɔ nɛɛrɛ ni,
mu na Nyiɛkpɔɔ mbra
yire fɛɛlɛ imi pre titi chaa.
5 La, O Tafun Nyiɛkpɔɔ wree
wa kakpɔɔ kre na,
a u kee kro fraka, a wa kee fɔɔn pe.
Nyisee kro nu, u kpra lii
na u leele ni, a pra u cha mbe la.
Ande mblɛ pe n fraka pre,
pe n nyifɛɛrɛ chin.
6 O Tafun Nyiɛkpɔɔ wre yo mbo,
“Ni waŋgrɛ kla, mu yi kakpɔɛ
nyjɛ pe mboe sin mu fɛ
mu kun yire juari,
a leele fɛ mu yi lete ti,
hali ndro wa nyaari
mbe tro yi na.
Pe kakpɔɛ yire kro kla,
hali ndro nunu chom kuraa
n kro wa.
7 Ndaa jawa na ŋu
Jerusalem kakpɔɔ, mu ni fiɛ,
mbe ki ti ni jaa mu fraka.
Na kra pan ma, mba na mu kla,
ndee mbra mu ndie tini na.
A nde mna je, na kee fuɛn
nyjɛ mu chin ŋga kro pini.”
8 O Tafun Nyiɛkpɔɔ wre yo mbo,
“E na ŋga ble mbe yiri
mbe waŋgrɛ yiɛ gbun kre sri.
Ni ni jawala pe na mbe waŋgrɛ,
na yi ŋulo nyu ble titɛɛ,
mbe ti pe ni krɔkuɔn kpɔɔ
kre nya.
Ki ble kre, ni krɔkuɔn we pe
na kanhun yi,
mbe tra ŋga kro kla.
9 Kre ble kre mbe waŋgra ŋga
kro leele paaraa chinɛ,
mbe pe kro na mi, pe Tafun
Nyiɛkpɔɔ wre chiin mɛɛ yeeri,
mbe nyu nunu ta
mbra mi chiin sumi.
10 Hali ni leele mblɛ pe nyina,
mu sɛ yili Ethiopia tra nu,
mu na ni sumi chiriri pre,
we paan sra wɔ mbe ni ŋga.
11 Na kre nyjila kre waa da,
nyifɛɛrɛ wa ni leele pre gbo,
pe kefuɛn nyjɛ pe li ni na
yire na na.
Ŋgi na hin? Mbe mblɛ yiɛ ki shɔ,
yɛkpɔɔmu kepele na pre wɔ
kakpɔɔ kre na.
A pia yiri mbe ni taan
ni nyua cheche kre na na fio.
12 A ni leele mblɛ pe peyɛ nyjii,
mu na kaan
mi pe Tafun Nyiɛkpɔɔ wre na kre,
mbe tni pe nu.
13 Kre nyjila kre Israel leele
mblɛ pie kro pre wa kefuɛn pe na.
Pia kala fnɛ, ndee mbe ti fana kee
ka yili pe nyuu na.
Pie li mbe sni mbe ŋunu,
a pia ndro fiɛ.”
Yɛshɔɔrɔ Mɛɛ
14 Israel leele, e yɛshɔɔrɔ tɛɛ
e mɛɛ kɔ kpɔɔ kama,
e gble mbe leele loo!
Jerusalem, ti mbe mu yiɛshɔ
mu loloŋgo nu!
15 O Tafun Nyiɛkpɔɔ wre
mu ndie tiniɛ ti,
a u mu loŋgoolo pre kro ni
a pe ndru.
O Tafun Nyiɛkpɔɔ Israel ŋunu wre,
uu wa mu kro,
kena yaka n wa mbe ti mu fiɛ na.
16 Kre nyjila kre pie yo Jerusalem pan mbo,
“Zion kakpɔɔ, maashia fiɛ,
a maashia ti mbe mu kɛnyi gblɛ.
17 Mu Tafun Nyiɛkpɔɔ wree wa
mu kro,
a u jaŋga ni we mu shɔ.
U yiɛ we shɔ mu na kpɔɔ,
a u koroo we mu ŋga
ŋmaa fɔŋgɔ.
A we yɛshɔɔrɔ mɛɛ kɔ
mu ndra na.”
18 “Na e ble kpɔɛ li nyjila yire da,
fooro nyjɛ e lii kre, mbe ti
mbe yi nyu to. Ŋgi na hin?
Ki sɛ pe tuuro na mɛɛ sisaa
mu e ŋga.
19 Kre nyjila kre, mbe leele
mblɛ pe e fiŋge pre ndie tini.
Mbe mblɛ pe fuuru pre shɔ,
a mblɛ pe gbun mu nyina kre,
mbe pe nyu ble titɛɛ.
Mbe pe ŋga mɛɛ na buuro
trɛ nyjɛ nu pra tia nyifɛɛrɛ
na pe gbo yire nu.
20 Kre nyjila kre mbe e nyu
ble titɛɛ,
mbe pan na e ni katoo.
Mbe e dwan, a ee mɛɛ ta
waŋgra ŋga kro leele pan.
Mi, e Tafun Nyiɛkpɔɔ wre ni ki yo.”