Yirɛ Kra Maŋa
2
Ndaa ndru mna nyjeeri bituŋu wa nya nyiɛlɛ na, na maŋa ŋga ni pe yirɛ krai wa u kɛɛ. 2 A ndaa u wie na, “Ndoo, sena mu shie hin” A wra kna mbo, “Jerusalem na ni shie mbe sɛ ki kra, mbe ki titnɔmu, na ki valam chin.”3 Bawa nyjeeri bituŋu ŋmba wraa paara na ni ni wre na ni ti wa mna sɛ, a nyjeeri bituŋu wa na pan mna u fni, 4 mna yo u pan mbo, “Fɛ mu sɛ yo blɔ ŋmba kɛɛ lawee kra maŋa nyi wre pan na, leele na yurɛ we nɛɛ Jerusalem na, kie kpɔɔ mbe ndro wa jaa mboo sin mbe ki fɛ mbe kun.a 5 A mi e Tafun Nyiɛkpɔɔ we pe kanhun, mbe fɛ mbe ki kun na mboo yi. A mi mbe pe ki yɛnyiŋge. Pan mi e Tafun Nyiɛkpɔɔ wre yo.”
Nyiɛkpɔɔ We Sɛ U Leele Ni Katoo
6 O Tafun Nyiɛkpɔɔ na yo u leele pre pan mbo, “Ni leele, e fɛ e yili nyjeeri haa tra kre nu e pan. Mi ndaa e gbun mu nyina lawee kro nu.” Pan mi e Tafun Nyiɛkpɔɔ wre yo. 7 “Ni leele, e fɛ e yili Babylon na, e sɛ Zion nyua ŋga Jerusalem na kre na.” 8 Ŋgi na hin? Kee ŋga o Tafun Nyiɛkpɔɔ Jaŋgafun wre yo yi na, u yɛnyiŋge kre ndra na, u mi Zechariah tun waŋgra nyjɛ leele pra Zion leele foolo pre pan, na ŋmba we kɛ taa e na kpan, kena u kɛ su mi Nyiɛkpɔɔ nyibie.
9 O Tafun Nyiɛkpɔɔ Jaŋgafun wre we yiri mbe waŋgrɛ yire taan, mbe ti mbe pe tinlɛ pe foolo. Na ki waa pan ma, kie ti mbe e chin na wre u mi u keenyanyofun Zechariah tun.
10 Mi e Tafun Nyiɛkpɔɔ wre yuu e pan na, “Yire Zion leele, e yɛshɔɔrɔ gblee le. Ŋgi na hin? Ni paan mbe tni e nu.”
11 Na ki waa pan ma, waŋgrɛ tataara we pan mbe kaari mi e Tafun Nyiɛkpɔɔ wre leele. We pan mbe tni e nu. Mbe ki ti mbe e chin na o Tafun Nyiɛkpɔɔ Jaŋgafun wre u ni tun e pan. 12 A Judah we pe o Tafun Nyiɛkpɔɔ pan krɔyira tra cheche kre nu, a Jerusalem we kro u kakpɔɔ ŋga u wɔ.
13 Lewo na nyjuro kro, e pieri,
e na o Tafun Nyiɛkpɔɔ yiɛ le,
ŋgi na hin? U yiri u tnihaa,
cheche kre nu na paan.