Zechariah Na Srawɔfun Lopom Titi Nya Nyiɛlɛ Na
3
Ndaa ndru mna yirɛ nya nyiɛlɛ na na, a o Tafun Nyiɛkpɔɔ na Srawɔfun lopom titi Joshua wɔ mu ni nyina, na uu wa mu yire o Tafun Nyiɛkpɔɔ nyjeeri bituŋu wre yiɛ. A Sutna naa wa mu yire u kalie kɛ haa, na u nyu kaanri. 2 A o Tafun Nyiɛkpɔɔ na yo Sutna pan mbo, “Sutna, mu yiɛɛ fiɛɛn kpa. Mi mu Tafun Nyiɛkpɔɔ ŋmba ni Jerusalem wɔ kre, ni yuu mu pan na mu yiɛɛ fiɛn. Wre blɔ ŋmba, pan u nyi na kaan ŋga pe tini mu foli kanhun ŋga ki nyini nu yi.” 3 Kre nyjila kre, na yirɛ ndri wee yɛ Joshua le mu yire nyjeeri bituŋu wre yiɛ. 4 A nyjeeri bituŋu wre na yo mblɛ praa wa mu yire u jaara pre pan mbo, “E yirɛ ndri wee nyjɛ blɔ ŋmba na ŋga wɔ u na.” Mna kna mu yo Joshua pan mbo, “Le, ni mu sisam pɔ mu laa mu na, a mbe mu ŋga dodonyi chichiele mbe mu le.” 5 A nyjeeri bituŋu wre na kna mbo, “E u pɔ namu ŋga ki pe chasi, a pra u pɔ ki yi, mna u le dodonyi fɔnyi, na nyjeeri bituŋu wree wa mu yire wa.”6 A o Tafun Nyiɛkpɔɔ nyjeeri bituŋu wre na yo Joshua pan mbo, 7 O Tafun Nyiɛkpɔɔ Jaŋgafun wre yo na, “Na mu li ni mbra yire na, mu ni tnumu nyjɛ ni le mu kɛɛ yire tun, mbe ti mbe mu kro mbe pe ni Suminyuŋgo kre, na ki lawee vankam kre lefun, a mbe mu ŋga lawee nyjeeri bitumblɔ mblɛ pe yire ni yiɛ ŋga nu.” 8 Kena srawɔfun lopom titi Joshua ndie tɛɛ, ŋu na srawɔfɛɛnlɛ mblɛ pe ya mu na pre ni kro. Ŋgi na hin? Yire lɛ sɛmbɛɛrɛ yira ŋga ki nyina na ni tia ni sumifun ŋmba pe yeeri “Klɛ” wre na paan. Wre wi ŋunu ŋmba ni wɔ. a 9 Joshua le, ni dnɛ ŋga yiɛ kii kɔɔnashin tɛɛ mu yiɛ. A mbe nyunɔmu yɛ kaanri ki na. Kee ŋga mi e Tafun Nyiɛkpɔɔ wre yo yi. A ble nunu chom ni mbe tɛɛ mbe Israel leele sisamu kro laa pe na. 10 Ki ble kre, ee e chaminae yeeri mbe pe paan tni tni e tre, na e fig tinyi yire jaara wejinyiŋge nu. Mi e Tafun Nyiɛkpɔɔ ni ki yo.