Kania Kaan Kre Na Olive Tinyi Yire
4
A nyjeeri bituŋu ŋmba mi na wre na paara wre na ndru mu pan, mu ni gbun mu nyi na ndro ŋmba u ŋunu wi. 2 A wra ni wie mbo, “Yira ŋgi mu nya hin?” A ndaa yo na ni swanyiɛ kania kaan ŋga klɛ yii kɔɔnashin nya, a kotie wa mu taa taa yi na, a kaniɛ kɔɔnashin na nyini yi na.3 A pe Olive tinyi shiin pe mu yire kotolo ŋga nu pe simi leni kre kalie, na ki kamɛŋɛ. 4 A ndaa nyjeeri bituŋu wre wie na, “Ni tafun, kena kre yira ŋga nɔɔ yi ŋgi hin?”
5 A wra ni wie mbo, “Kena mu n yire yirɛ nyjɛ nɔɔ chin ra?” A ndaa yo, “Ɔɔhɔn ni tafun, ni n yi nɔɔ chin.”
Nyiɛkpɔɔ Kee Ŋga Wra Yo Zerubbabel Pan
6 A nyjeeri bituŋu wre na yo ni pan na, o Tafun Nyiɛkpɔɔ yo ni sɛ yo Zerubbabel pan na, na ni yo u kee ka pe ni pan kre, “U Jaŋga, na u faŋga ni ma, la, ni Ŋumu we ki pe.” Mi Jaŋgafun Nyiɛkpɔɔ wre ni ki yo. 7 Zerubbabel, kre tnumu ŋga yi mu yiɛ na nyua kpɔɔ yi ŋga, kie pe mbrɛrɛ mu yiɛ. Mu ndru mbe Suminyuŋgo kre sin, na maa ki dnɛ haŋa taa mu kɔ, kre leele pre we na gble leni mbra yuu na, “Ki nyu titi.”
8 O Tafun Nyiɛkpɔɔ na ndru mna kee ka yo ni pan mbo, 9 “Zerubbabel u Suminyuŋgo ŋga nɔɔ le, a we ki sin mbe sɛ ki nyu le. Na kre kee ŋga waa pan ma, kre mu chin na mi mu Tafun Nyiɛkpɔɔ Jaŋgafun wre ni mu tun pe pan.” 10 Ŋga leele pre na nya na kaalɛɛ nsraa shie nyaanyaa kre, pe sɔɔnrɔ na ku. La, na pe waa nya na Zerubbabel Suminyuŋgo kre siin, kre pe yiɛ we shɔ. Kaniɛ kɔɔnashin yire yire mu o Tafun Nyiɛkpɔɔ nyiɛlɛ ŋga, a yi nyaa tra ŋga kro nu. 11 A ndaa u wie na, “Mni olive tinyi shiin nyjɛ yii wa kania kaan kre kalie, na ki kamɛŋɛ kre nyina hin? 12 A olive tinyi klɛ shiin nyjɛ yii wa mu mbra swanyiɛ kɛɛn nyjɛ nu olive simi yilii kre nɔɔ yi ŋgi hin?”
13 A wra kna mbo, “Mu n yi nɔɔ chin ra?” A ndaa yo “Ɔɔhɔn ni tafun.”
14 A wra kna mbo, “Yire olive klɛ shiin nyjɛ yire mu bilɛ shiin mblɛ Nyiɛkpɔɔ wɔ, mu pe fa simi, mbe praa wre Nyiɛkpɔɔ ŋmba wi waŋgra ŋga Tafun wre sumi.”