Yurɔ Hlɛ Nyunɔ Wo Ŋga Ki Ja Na Yirii
5
Ŋga ndaa yiɛ wa mu le na, ndaa yurɔ hlɛ ŋga na pe nyunɔ ka nya, na ki yirii na tro nyjeeri. 2 A nyjeeri bituŋu wre na ni wie yira ŋga ni nya. A ndaa yo, “Yurɔ hlɛ ka ni nya, a ki yirii na tro nyjeeri, ki titnɔmu we pe fiiti fulo na kɛ, a ki valam we pe fiiti kɛmbɔkunɔ.”3 A wra yo ni pan mbo, “Suŋgɔ ŋga kie tra leele kro yii pe nyunɔ yurɔ hlɛ kre na. Pe nyunɔ ki kokoo nunu na, na pie juolo kro wɔ mbe yili tra kre nu, mu nyunɔ ki kokoo haŋa kre na, na ndro ŋmba u danyi wɛɛ dani kpan, pie u wɔ mbe yili tra kre nu. 4 O Tafun Nyiɛkpɔɔ Jaŋgafun wre yo mbo, ‘Mbe ti mbe suŋgɔ kre le juolo, na mblɛ pe danyi wɛɛ dani pre kro katoo. Suŋgɔ kre we kro wa mbe sɛ su na katoo kre we ja.’”
Chlɔ Ŋmba Kakɛɛ Nu Wre Kee
5 Nyjeeri bituŋu ŋmba mi na wre naa paara wre na ndru mu yo ni pan mbo, “Yiɛ yire mu le nyjeeri. Yira ŋgi mu nyaa hin?”
6 A ndaa yo na ni n chin yira ŋga yi, a wra yo ni pan mbo, “Kakɛɛ ŋga ni pe yirɛ kra yi. A wra ndru mu yo mbo, ‘Kre nu tra kre sisam kro nyi.’”
7 Kre kakɛɛ kre, prim ni pe tɛɛ mu ki nyutɔŋgɔ pe. Ŋga pra ki nyaa kre, na chlɔ wa mu tni ki nu.
8 A nyjeeri bituŋu wre na yo mbo, “Chlɔ wre yire mu sisam ŋga.” A wra ndru mu u ŋunɔ mu le kakɛɛ kre nu mna ki nyu tɔ. 9 Ndaa yiɛ yire mna chiɛlɛ shiin plɛ nya na pe yiri nyjeeri na paan ni pan, pe kuɛn na pe na lɔɔchlo wi. Pra pan mna kakɛɛ kre wru mu sɛ nyjeeri, a kraa pɛli nyiɛ yiɛ na.
10 A ndaa nyjeeri bituŋu wre wie na, “Kena sena pe shie na ki ni ŋga hin?”
11 A wra kna mbo, “Babylon na pe shie na ki ni, mbe sɛ ki katoo sin, na pe ki sin mu kɔ, mbe pe ki tɛɛ ki lawee.”