Sookɛɛ Jijirɛ Yire
6
Ndaa kee ka nya nyiɛlɛ na na. Kre nyjila kre ndaa sookɛɛ jijirɛ yɛ nya na yi yilii swafre nyuɛ shiin yɛ lalaa na paan. 2 Sookaa jlewo kre, soolo nyuulo praa ki tinii, a shiinwo kre, soolo wɔɛ na lɛ pre, 3 taarɛwo kre, soolo fimble na lɛ, a jijirɛwo kre, soolo brabra praa ki tinii, a pe kro naa faŋga ni. 4 A ndaa nyjeeri bituŋu ŋmba wraa paara na ni ni wre wie na, “Ni tafun, a sookɛɛ nyjɛ nɔɔ yi ŋgi hin?”5 A wra kna mbo, “Yire ŋumu jijirɛ nyjɛ yi yiri nyjeeri o Tafun Nyiɛkpɔɔ ŋmba wi tra ŋga tafun wre yiɛ na paan.”
6 Sookaa ŋga sowɔɛ pre naa tini kre na yiɛ le nyjeeri haa, a sofimble pre na yiɛ le yilatohaa, a sobrabra pre na yiɛ le tapanhaa. 7 Ŋga soolo pre na yili fimi na to, mna pɔɔrɔ shɔ, na chaa mbe kila tra yiɛ na kro mbe tro. A nyjeeri bituŋu wre na kna mbo, “E sɛ kila tra yiɛ na kro” A pra yili wa mna sɛ. 8 A nyjeeri bituŋu wre na ni yeeri mbo, “Le, soolo mblɛ pe yiɛ le nyjeerihaa, mbe sɛ kee ŋga o Tafun Nyiɛkpɔɔ chaa pe kre tia u gbun nyjii u na.”
Joshua Ŋujuulee
9 O Tafun Nyiɛkpɔɔ na yo ni pan mbo, 10-11 “Sɛ Heldai, na Tobijah, na Jedaiah mblɛ pe yiri tnibim nu Babylon na mu pan pre pan, mu sɛ swafiŋge, na swanyiɛ shɔ. Ki ble kre lam, sɛ na ki ni Zephaniah biblɔ Josiah wre katoo, mbe e ki tɛɛ mbe ŋujuulee pe, mbe sɛ Jehozadak biblɔ Joshua ŋmba wi srawɔfun lopom titi wre le ki yi. 12 Mbe mu yo u pan na kee ŋga o Tafun Nyiɛkpɔɔ Jaŋgafun wre yo yi kre mbo, ‘Blɔ wa we yiri, u mɛɛ Klɛ. We uyɛ wɔ mbe pe na tiŋge klɛ yi, mbe o Tafun Nyiɛkpɔɔ Suminyuŋgo kre sin. 13 Wre we o Tafun Nyiɛkpɔɔ Suminyuŋgo kre sin mbe yɛnyiŋge ta na ŋunu wi, mbe u leele le, we na ŋunumu lii, a we pe srawɔfun, we tnumu yire kro shiin tun, mbe wejinyiŋge pan. 14 Ŋujuulee kre we tni o Tafun Nyiɛkpɔɔ Suminyuŋgo wa, mbe pe ki tɛɛ mbra Heldai, na Tobijah, na Jedaiah, na Zephaniah biblɔ Hen wre sɔɔnri.
15 A leele we yiri haalee mbe paan ya, mbe pe o Tafun Nyiɛkpɔɔ Suminyuŋgo kre sin. Kre ee chin na o Tafun Nyiɛkpɔɔ Jaŋgafun wre u ni tun. Yire kee nyjɛ kro we pe ma, na e li o Tafun Nyiɛkpɔɔ wre nyu kee na poŋgo wala.’”