2 Kre nyjila kre, na Bethel leele Sharezer, na Regem-Melech, na pe leele plɛ tun mbe pe pan o Tafun Nyiɛkpɔɔ Suminyuŋgo wa mbe paan u dwamu tali, 3 mbe srawɔfɛɛnlɛ pre, na Nyiɛkpɔɔ keenyanyofɛɛnlɛ pre wie na, “Kena ŋga pe Suminyuŋgo kre kla kre ndra na, o kro ma mbra fooro lii, mbra ble funi nyiɛpɔ kunɔ wo kre nu, imi na o ki pini mu yire yɛlɛ tataara nu kre ra?”^a

4 Kee ŋga o Tafun Nyiɛkpɔɔ na yo ni pan yi kre mbo, 5 “Leele mblɛ pee wa tra kre nu, na srawɔfɛɛnlɛ pre wie na, ‘Ŋga e naa ble funi na fooro lii nyiɛpɔ kunɔ, na kɔɔnashinwo kre nu yɛlɛ nununu fuloe taarɛ na kɛ kre, mi e naa pini na kaan ra? 6 A ŋga e naa kaa, na gboo kre, yire titi yɛ nyu ma e naa lii ra?

7 Yire kee nyjɛ ma o Tafun Nyiɛkpɔɔ na yo u keenyanyofɛɛnlɛ jle wolo pre pan, a pra yi kpali, nyjila ŋga leele na nɛɛ Jerusalem na mna peyɛ ta, a wejinyiŋge naa wa chiɛ nyjɛ yira ki fɛ mu kun yire na, hali mna sɛ tablɔ tra ŋga kraa wa na shie tapan haa kre nu.’”

8 O Tafun Nyiɛkpɔɔ na ndru mna kee ka yo mi Zechariah pan mbo, 9 “Kee ŋga e Tafun Nyiɛkpɔɔ yo yi kre mbo, ‘E le na ee ti mbe kpralie tnumu tun, mbe e na eyɛ fooro chini, mbra nyɔɔ eyɛ na. 10 Yaashia na lekuchiɛlɛ, ndee bijile, ndee mbra leele mblɛ pe yiri waŋgra kan nu mu pan mu tni mu chaa e nu, ndee shianfɛɛnlɛ fiŋge. A yaa na sisaa jawa na eyɛ ni.’

11 La, ni leele pre na je, mna krɔ kna mu wa ni na, pe n sra ndie tɛɛ ni pan, 12 mna pe lolonyi sheli na chirɛbɔ yi. Ŋga pe nsra ndie tɛɛ ni fa keenyanyofɛɛnlɛ kee nyjɛ ni Ŋumu na pe nyina yire na kre ndra na, kra tia ni krɔ na kun na pe ni. 13 Ŋga pe nsra ndie tɛɛ ni kee na kre ndra na, pra ni tali, a ni nsra loo pe pan. 14 Ki tia ndaa pan fuflɛ gbaŋgɔ ni mna pe gbun mu nyina waŋgrɛ nu, a pra sɛ kaari fumblɔ wa. A pe tra kre na kla, a ndro nsra ja mbe tni wa. Kena kolo ŋga na kra yire a pra pe tra taan kre kla na yi.”