O Tafun Nyiɛkpɔɔ Nyu Yo Jerusalem Kee Na
8
O Tafun Nyiɛkpɔɔ Jaŋgafun wre na ndru mna kee ka yo mi Zechariah pan mbo, 2 “Ni yenyjam kpɔɔ wii Zion na, a ni yenyjam kre na nyini na kanhun yi.” 3 Kee ŋga o Tafun Nyiɛkpɔɔ yo yi kre mbo, “Mbe ndru mbe pan mbe tni Jerusalem na. A leele we Jerusalem yeeri kpra kakpɔɔ, a pie mi e Tafun Nyiɛkpɔɔ Jaŋgafun wre nyua kre yeeri Nyua Cheche.” 4 O Tafun Nyiɛkpɔɔ na yo mbo, “Blɛlɛɛlɛ, na chalɛɛlɛ mblɛ pe lɛ gbɔgbɔ, na kɛɛn yiri we ndru mbe tni Jerusalem lete na. 5 Nyanyjɛbɛɛlɛ, na bichabɛɛlɛ we chia kre lete nyi, mbra pna mbra tro.6 Na kre nyjila kre waa da, kee kre we pe leele pre hamblɛ pan kawako ni. La, mi pan rɛ, kia pe kefolom. 7 Mbe ni leele pre wɔ mbe yili trɛɛ nyiɛ nu pe pe yii mu sɛ kro nu, 8 Yila finhaa, na yila tohaa trɛ yire nu mbe pe wɔ mbe pan na pe ni Jerusalem na. Pie pe ni leele, mbe ni pe pe Nyiɛkpɔɔ mbra pe le kpra, na frakaa kolo na.”
9 Kee ŋga o Tafun Nyiɛkpɔɔ yo yi kre mbo, “Kee nyjɛ ni keenyanyofɛɛnlɛ pre na yo nyjila ŋga ni praa ni Suminyuŋgo kre nɔɔ hle yi kre, yire kee yire chɔɔ e ndru kre, kena yaa ti mbe e kɛ gblɛ, e ni Suminyuŋgo kre sin. 10 Ŋga kre nyjila kre n sra ta mu da kre, na ma ja mbe ndro, ndee yurɔ wru mbe u tnumu tun, mbe fɔtɔɔrɔ ta. Ŋgi na hin? Ndaa tia ndro kro na yiri mu u ŋmbrɔ taan, kra tia ndro nsra uyɛ ta mbe tnumu tun. 11 La, leele pre hamblɛ mblɛ pe kro pre, mba pe pe imi na ndaa fawolo pre pe kre. Pan mi e Tafun Nyiɛkpɔɔ Jaŋgafun wre yo. 12 Pie yirɛ luu wejinyiŋge ni, mbe yi nyu. A pe tre tinyi we sɛ, mbe tra kre na yirɛ nyɔɔ, mbe nyiɛ na paan tataara. Kre dwamu ŋga ni leele mblɛ pie kro pre we ta. 13 Judah, na Israel leele, waŋgrɛ leele e le na suŋgɔ ki e yii, la, mbe e shɔ, mbe e dwan. Kena yaa fiɛ, a yaa ti mbe e sɔɔnrɔ ku.”
14 O Tafun Nyiɛkpɔɔ Jaŋgafun wre yo mbo, “Ŋga e tolɛɛlɛ na tia ni krɔ na kun kre, ndaa ni jawala pe na mbe pe kla, a ndaa pe kla yɛŋgɛ, ni nsra ni jawala chinɛ. 15 La, fuŋga rɛ, ni ni jawala pe na mbe Jerusalem, na Judah leele dwan, kena yaashia fiɛ. 16 La, kee nyjɛ yi fna e na pini yi kre, e na kpra yuu na eyɛ ni. A e kalalihaa, e na kpra ŋga kie pan na wejinyiŋge ni yuu. 17 Yaa na sisam kee jawa mbe pe e tnifɛɛnlɛ na, a yaa na danyi wɛɛ dani. Yire kee nyjɛ krɛrɛ ni yi fun.” Pan mi e Tafun Nyiɛkpɔɔ wre yo.
18 O Tafun Nyiɛkpɔɔ na ndru mna yo ni pan mbo, 19 “Ble nyjɛ e funi nyiɛpɔ jijirɛ, na kunɔ, na kɔɔnashin, na kɛ wo yire nu kre, yie pe yɛshɔɔrɔ ble lie mbe Judah leele ŋga. Kena ki fna e kpra, na wejinyiŋge haa cha.”
20 O Tafun Nyiɛkpɔɔ Jaŋgafun wre yo mbo, “Nyjila ka paan mbe leele yiri kakpɔɛ tataara yɛ na, mbe pan Jerusalem na. 21 Leele pre plɛ we yiri kakpɔɔ ka na mbe sɛ yo kakpɔɔ ka leele pan mbo, ‘E pan mbe o sɛ o Tafun Nyiɛkpɔɔ Jaŋgafun wre tali, mbe u nyu o na.’ 22 Leele tataara, na waŋgrɛ nyjɛ yii jaŋga ni we pan Jerusalem na mbe paan ni sumi, mbe ni tali na ni nyu pe na. 23 Yire ble yire nu, yolo nyininyini yofɛɛnlɛ kɛ we Judae ndro nunu yii u dodonyi na, mbe yo u pan mbo, ‘Ti mbe o taa mu na, ŋgi na hin? O loo na Nyiɛkpɔɔ wa e kro.’”