Israel Loŋgoolo Ndie Tiniɛ
9
O Tafun Nyiɛkpɔɔ paara,na we Hadrach tra,
na kakpɔɔ Damascus kla.
Ŋgi na hin? Leele kro,
na Israel sele yire kro,
pe yiɛɛ wa o Tafun Nyiɛkpɔɔ na.
2 A Hamath ŋga ki sam le,
na Hadrach tra ni kre chɔɔ,
we ki leele ndie tini,
pre na Tyre,
na Sidon kakpɔɛ yire kro,
nde pe kɛ tnumu chin titi.
3 Tyre leele lawee sin sin,
na feni na ndra yi nu
ŋunɔ nyjila,
mu swafiŋge, na swanyiɛ fa
mu ble, na tablɔ yi.
4 La, o Tafun Nyiɛkpɔɔ
we pe krɔɛ kpɔɛ,
nyjɛ ni pe tnumu tuni,
epo yiɛ na yire,
na pe swɛ nyjɛ pe fa mu ble
na tablɔ yi yire kro shɔ pe kɛɛ,
mbe pe kakpɔɔ kre sro
mbe wo putuu.
5 Ashkelon, na Gaza,
na Ekron leele we kee kre nya,
mbe fiɛrɛ kpɔɔ pe yii.
A Ekron dankna we kɔ.
Pie Gaza ŋunu gbo,
a leele we kɔ Ashkelon na.
6 Leele nyini nyini we pan,
mbe Ashdod shɔ mbe tni.
A o Tafun Nyiɛkpɔɔ we ti Philistine
leele yɛkpɔɔmu nyu to.
7 Pia kaara na ki nyimi ka wa na,
ndee mbe sro ŋga
ki n pe cheche le nyuu na.
Pe mblɛ pie kro wa pre,
we pe ni leele, mbe pe
na Judah jlom yire ka yi.
Ekron leele we pe ni leele, imi na
Jebusite leele pe ni leele kre.
8 Mbe kɛ tɔ ni tra kre na,
mbe ŋunɔ wifɛɛnlɛ
wa tro ki nu na.
A mba kolo ŋga,
mbe pe ni leele ta mbe fiŋge na.
Ŋgi na hin?
Ni leele pre kala nya.
Mbakɔ Zion Ŋunu Wre
9 Yire Jerusalem leele,
e ti mbe e yiɛ shɔ kpɔɔ,
ŋgi na hin? E ŋunu paan e pan,
a u fraka mu wi mu yili.
U nyjii,
a uu wa mu tni bubnɔ pɔ na.
10 O Tafun Nyiɛkpɔɔ yo mbo,
“Mbe sookɛɛ yire wɔ Ephraim na,
mbe ŋunɔ soolo wɔ
Jerusalem na,
a bɛnyi nyjɛ ni pe shie ŋunɔ yire,
mbe yi kuari. E ŋunu wre we ti
mbe wejinyiŋge pan
waŋgrɛ yire nu,
a u ŋunumu we yire epo na,
mbe sɛ su epo na,
mbe yire lɔɔ kpɔɔ
Euphrates kre na,
mbe sɛ tra kro nu.”
Nyiɛkpɔɔ We Ndruu U Leele Shɔ
11 O Tafun Nyiɛkpɔɔ yo mbo,
“Ni nyu nunu ŋga ndaa pe
na e ni,
nyimi ni kre ndra na,
mbe e mblɛ pe yii mu le
wee jijuom ŋga nu nyumu n wa
pre wɔ mbe wa.
12 Yire mblɛ pe yii
mu le nyuŋgo kre,
e kaanhaa ta fuŋga,
e ndru e pan,
nyinyi nyjɛ pe mboo sin
mu fɛ mu kun yire nu.
Ni yuu e pan na,
e yirɛ nyjɛ pe shɔ e pan yire,
mbe e ŋga yi yi ma gbeeshiin.
13 Mbe Judah pe na bɛŋɛ yi,
mbe Israel pe na snimi yi.
A mbe Jerusalem leele pe
na brɔfiɛn ŋunɔ yi,
mbe wi na Greek leele ni.”
14 O Tafun Nyiɛkpɔɔ we uyɛ wɔ
mbe u leele pre u nya,
we yili nyjeeri,
mbe u snimi na nyini plipli,
na nyiɛ ki nyini.
O Tafun Nyiɛkpɔɔ Jaŋgafun wre,
we bnɔ fɔ mbe nyaari
nyiɛ fuflɛ ŋga ki yiri tapan haa,
na gbuun na paan na,
mbe sɛ wi.
15 O Tafun Nyiɛkpɔɔ Jaŋgafun,
we kɛ tɔ u leele na,
mbe ti pe pe loŋgoolo gbo.
Pie pe gbo ŋunɔ mbra gble leni,
na gbɔgbɔɔlɔ lɛ.
Pe loŋgoolo pre nyimi we na fuu,
na sra pe wɔ,
mu nyimi yire le yira nu,
mu yi kna mu wo sragbunu na.
16 Na kre ble kre waa da,
o Tafun Nyiɛkpɔɔ we u leele
pre shɔ,
imi na mbaala lefun
u mbaala shio na waa kre.
Pan pie na chiɛnri u tra kre nu,
na ŋujuulee yi.
17 Kre nyjila kre pie nyu,
mbe pe kee pe niŋge ni.
Shɔlɔ na simi fɔnyi we bɔ,
mbe ki ti yirifumblɔ,
na bichabɛɛlɛ yiri faŋga ni.