O Tafun Nyiɛkpɔɔ We Judah Shɔ
10
E mi e Tafun Nyiɛkpɔɔwre wie,
mbe ni e nyina
nyiɛ pan nyjila, ŋgi na hin?
Mi ni tia nyiɛ na woo,
na paan leele pan,
mbe wo pe see yirɛ na.
2 Sɛɛnlɛ leele fana,
a chlɛfɛɛnlɛ kewɛɛ na yuu pe pan,
kafinɛ ŋunɛ nɔɔ
pe pe nyina pe pan,
na gbunyiŋge kee yuu
pe pan finfin.
Ki tia leele pre na kila na tro,
na mbaala mblɛ pe fiŋge,
a pe n lefun ni lɛ.
3 O Tafun Nyiɛkpɔɔ wre yo mbo,
“Ni krɔ kun na yɛkulo
mblɛ pe ni leele pre le pre ni,
a mbe pe ndie tini.
Mbe Judah katoo leele pre le,
mbe ti pe yiɛshɔ,
na soo ŋmba u wi ŋunɔ
mu yili wi.
4 Pre nu ŋulo, na yɛkulo,
na ŋunɔwifɛɛnlɛ loplombo
we yili mbe ni leele yiɛklu.
5 Pie pe na ŋunɔwifɛɛnlɛ mblɛ
pe wi mu yili ŋunɔ,
na pe loŋgoolo taanla
frɛrɛ nu lɛ.
Pie wi mbe pe loŋgoolo
mblɛ pe soolo nduu pre ja.
Ŋgi na hin? O Tafun Nyiɛkpɔɔ
wre wa pe kro.
6 Mbe Judah leele ŋga faŋga,
a mbe Israel leele shɔ,
mbe ndru mbe pan na pe ni katoo,
ŋgi na hin? Pe fooro wa ni na.
Pie pe na ni n da
mu yiɛ wɔ pe na.
Pe Tafun Nyiɛkpɔɔ wi mi,
a mbe pe nyiɛtalaa loo.
7 Ephraim leele we sheli,
na ŋunɔwifɛɛnlɛ faŋgafɛɛnlɛ lɛ,
mbe pe yiɛshɔ na simi pe gbɔ.
Pe nanae we ki nya,
mbe pe yiɛ shɔ.
8 Mbe ni leele pre yeeri
mbe ble titɛɛ,
mbe pe shɔ,
mbe ti pe ndru mbe nɛɛ,
imi na pra nyi fa kre.
9 Kii wa na ni pe gbun
mu nyina waŋgrɛ nu,
ande mna pe nyi kpan,
pie ni sɔɔnri wa.
Pre na pe biile we ŋmaa ta,
mbe pe kro chaa
mbe pan katoo.
10 Mbe pe wɔ mbe yili Egypt tra,
na Assyria tra nu,
mbe pan na pe ni pre titi tra nu,
mbe ndruu pe ŋga lawee
Gilead, na Lebanon tra nu,
pia le tra kre nu kple.
11 Pie tro kanyana kpɔɔ titi nu,
a imi na pe kanyana
we da kpan,
mi pe Tafun Nyiɛkpɔɔ we ti,
ki nyu nyjii.
Nile lɔɔ kre latɛɛ kro we yua.
Assyria yɛkpɔɔmu nyu we to,
mbe Egypt leele faŋga kɔ pe nu.
12 Mbe ni leele pre ŋga faŋga,
mbe pe jaa ni sumi,
mbe li ni kee na.
Mi pe Tafun Nyiɛkpɔɔ wre
ni ki yo.”