4 Kee ŋga ni Tafun Nyiɛkpɔɔ wre na yo yi kre mbo, “Mbaala mblɛ pe shie mbe sɛ gbo pre kɔɔnri. 5 Pe lɔfɛɛnlɛ we sɛ pe gbo, a ndro wa pe pe yaka. Na pe pe kaara yire prɛ mu kɔ, mbe pe yo mbo, ‘Nyiɛkpɔɔ mu mboo, o swa ta.’ Mbaala pre fooro n wa pe tafɛɛnlɛ na.”

6 O Tafun Nyiɛkpɔɔ yo mbo, “Mba ndro fooro le tra kre nu na, mbe ti mbe ndro kro to u tnifun, na pe ŋulo kɛɛ. Pe ŋulo pre we tra kre fiŋge, a mba ki shɔ pe kɛɛ.”

7 Mblɛ pra mbaala pre lɔ mbe sɛ pe gbo pre na ni wru, a ndaa pe mbaala pre lefun. Ndaa kanyie shiin bali, mna nunu mɛɛ tɛɛ “Fooro chiɛn” mna haŋa kre mɛɛ tɛɛ “Nyu nunu.” A ndaa mbaala pre le. 8 Ki nsra da nyiɛpɔ kple, a mbaala lefɛɛnlɛ pre taarɛ na ni le nyini, mna tia ni krɔ na kun na pe ni, a ndaa pe ni. 9 A ndaa ni jawala pe na mba mbaala pre le na, “mblɛ pie ku pe ku, mbe mblɛ pie fun pre fun, mbe mblɛ pie kro pre na pe yɛ kaa.” 10 A ndaa kanyie ŋga mɛɛ ndaa tɛɛ Fooro chiɛn kre bali mna ki ka, mbe ki nyina na o Tafun Nyiɛkpɔɔ nyu nunu ŋga u pe na waŋgrɛ yire ni kre, u ki kun. 11 Ki ble kre lam nyu nunu kre na kun. Ŋga mbaala mblɛ praa kala nyaa pre na ni nya na ni kanyie kre ka ma kre, pra chin na o Tafun Nyiɛkpɔɔ u kee ka yo. 12 A ndaa yo pe pan na, “Na e chaa, e ni ŋga ni fɔtɔɔrɔ. A na e n na chaa naa, mbe e ki bali.” Ki tia pra ni fɔlɔ tɔ swafiŋge fulo na kɛ.

13 A o Tafun Nyiɛkpɔɔ na yo ni pan mbo, “Sɛ ki viŋge mu wa swa tɛɛ ndoo, Suminyuŋgo wa.” Ki tia ndaa swafiŋge fulo na kɛ ŋga ni pra ni fɔlɔ tɔ kre wru, mna sɛ ki viŋge mu wa Suminyuŋgo swa tɛɛ ndoo kre nu. 14 A ndaa ni kanyie shiinwo ŋga mɛɛ ndaa tɛɛ, “Nyu nunu” kre ka. A kra tia nyu nunu ŋga kraa wa Judah, na Israel lalaa kre na kun.

15 A O Tafun Nyiɛkpɔɔ na yo ni pan mbo, “Ndru mu muyɛ pe na mbaala lefun jijuo wi na. 16 Mbe ti mbe mbaala lefun wa yiri tra kre nu. Na mbaala pre wa fun, u kee ka ma na u ni. A na pe fiɛnfiɛn pre wa fun, wa u haa cha, a na wa yaa wa u tra, ndee mbe ŋmba nu faŋga nyi wre ŋga sro. La, ŋmba nu nyina nyi we yii mbe ka, hali mbe u yeŋgrɔɛ ka mbe ya.