Jerusalem We Wi Mbe Yili
12
O Tafun Nyiɛkpɔɔ na kee ka yo mna wru Israel haa. Nyiɛkpɔɔ ŋmba wra nyjeeri nyaa mu chan, mna tra wa, mna u ŋumu le lewo nu wre, kee ŋga u yuu yi kre mbo, 2 “Mbe ti Jerusalem pe na gbɔyira ŋga nu simi nyi, a waŋgrɛ nyjɛ yi ki fɛ mu kun yire ki gbɔ na fuula na gbɔgbɔɔlɔ lɛ. A pie pan mbe Judah, na Jerusalem fɛ mbe kun, mbe wi na pe ni. 3 Na kre nyjila kre waa da, a waŋgrɛ nyjɛ yii wa tra ŋga nu kro waa sɛ fni mbe yiri mbe Jerusalem taan kre, mbe Jerusalem pe na dnɛ kpɔɔ ŋga kia jaa jɔŋgɔ ki titɛɛ. Mblɛ pie na chaa mbe ki kɔ ki titɛɛ kpan, kie to pe na mbe pe brɛri. 4 Kre ble kre, mbe ti tutom wo pe soolo na, mbe chaa chaa wo pe nduufɛɛnlɛ na. Mbe kɛ tɔ Judah leele na, a la, mbe ti pe loŋgoolo pre soolo fun nyiɛlɛ na. 5 A Judah jlom yire we na yuu pe jawala nu na, ‘faŋgaa wa Jerusalem leele pre nu, ŋgi na hin? O Tafun Nyiɛkpɔɔ Jaŋgafun wre wi pe Nyiɛkpɔɔ.’6 Kre ble kre, mbe ti mbe Judah jlom yire pe na kanhun ki to klɔ nu, ndee kanhun ki to yua kpakpɛɛ na. Pie waŋgrɛ nyjɛ yi pe fɛ mu kun yire kro kla, Jerusalem leele rɛ, yaka wa pe ta chia kre na.
7 La, mi e Tafun Nyiɛkpɔɔ we klu mbe kɛ tɔ Judah leele tnihɛɛ yire na, imi kie pe mbe buuro ŋga kii wa David katoo, na Jerusalem leele nu kre wa kpɔɔ mbe wɛ Judah wo na. 8 Kre ble kre, o Tafun Nyiɛkpɔɔ we kɛ tɔ Jerusalem leele na, a fɔɔnrɔfun ŋmba we pe pe nu kre kuraa we pe na ŋunu David wi. A David katoo wolo pre we pe na Nyiɛkpɔɔ, ndee na nyjeeri bituŋu u yiɛklu pe pan. 9 Kre nyjila kre, waŋgra ŋga kie wi na Jerusalem ni kpan, mbe ki kla.
Pe Ŋmba Pe Kan Ŋmaa Ni Wre Nyɛni
10 Mbe foorochiɛn, na nyiɛtalaa ŋumu le David nanae, na Jerusalem leele nu. Kre nyjila kre, pe yiɛ we pe ŋmba pra su mu gbo wre na, pie u nyɛni mbe fooro kpɔɔ li imi na lewo u biblɔ jlo, ndee u bichleŋu nyɛni kre. 11 Kre nyjila kre nu nyɛnɛɛ kpɔɔ we pe Jerusalem na imi na leele na pe Hadad Rimmon ŋga kii wa Megiddo tra mbrɛrɛ kre na kre. 12 Tra kre leele we nyɛni jlom, jlom, pe bilɛ we nyɛni peyɛ na, mbe chiɛlɛ nyɛni peyɛ na. David jlom bilɛ na pe chiɛlɛ, Nathan jlom bilɛ na pe chiɛlɛ. 13 Levi jlom bilɛ na pe chiɛlɛ, Shimei jlom bilɛ na pe chiɛlɛ, 14 pan jlom hɛnyi yire kro bilɛ na pe chiɛlɛ we nyɛni na.”