Pe Leele Pre Sisam Pɔ Mu Laa
13
Na kre nyjila kre waa da, blo ka we vru David nanae, na Jerusalem leele tni haa wa, ŋga kie jaa pe sisam, na pe nɛɛrɛ kee je mbe laa pe na. 2 Kre nyjila kre nu, mbe sɛɛnlɛ kro wɔ mbe yili tra kre na, mbe ndro wa yi kee sɔɔnri na. A mbe yi kɔmfoɔe pre, na ŋumufuɛn yire kro wɔ tra kre nu. Pan mi e Tafun Nyiɛkpɔɔ wre yo. 3 A na ndro wa waa je na we kee nya mbe yo, u lɛ, ndee u lo we yo u pan na pe u gbo, ŋgi na hin? Ufun wre kala fnɛ Nyiɛkpɔɔ mɛɛ ni. A na waa je mbe kee nya mbe yo jaŋga na, u sefɛɛnlɛ we u su brɔfiɛn ni mbe gbo.4 Na kre nyjila kre waa da, nyifɛɛrɛ we na keenyanyofun kuu na, u kee nyaa na yuu. A wa keenyanyofun dodoŋgi le mbra leele fana na. 5 Na pe u wie, kee ŋga we yo yi na, “Keenyanyofun ma mi, falifun wi mi, a flaŋga yi ni tnumu mu yire ni bimi. 6 A na ndro u wie na yirɛ nyji klɛ tlo yi mu na ŋga hin? We kna mbe yo mbo, ‘Ni nunu wa katoo pra ni pe ma.’”
Pie Nyiɛkpɔɔ Mbaalalefun Wre Gbo
7 O Tafun Nyiɛkpɔɔ Jaŋgafun wre mbo,
“Ni brɔfiɛn yiɛshiin,
yiri mu sɛ ni mbaala lefun
ŋmba kee ki sheli ni na wre tɔ.
U gbo mbe mbaala pre nyina,
mbe ni pe fiɛnfiɛn pre kla.
8 Na mu tra kre kro leele yɔ taarɛ,
pe yɔmu shiin we ku mbe fun,
mbe pe yɔmu nunu tni.
9 A pe yɔmu nunu ŋga kie kro pre,
pie tro kanhun nu
mbe chin mbe pe chasi.
Imi na pe swafiŋge,
ndee swanyiɛ leni kanhun,
mbe ki nɛɛrɛ wɔ ki nu kre,
pan mbe pe pe.
Pie nyɛni mbe ni yeeri,
a mbe shɔ pe pan.
Mbe yo pe pan na ni leele lɛ,
mbe pre yo na,
pe Nyiɛkpɔɔ wi mi.”