Jerusalem Na Waŋgrɛ Yire
14
O Tafun Nyiɛkpɔɔ ble kaa wa na paan, ki ble kre pie Jerusalem leele foolo. Pie yire mbra le, mbe leele pe yirɛ yɔɔlɛ mbe wru. 2 Kre ble kre, o Tafun Nyiɛkpɔɔ we ti mbe waŋgrɛ kro fni mbe sɛ wi na Jerusalem ni. Pie wi mbe kakpɔɔ kre shɔ, mbe pe kalonyi yire yirɛ foolo, mbe chiɛlɛ pre frɛ mbe cha jaŋga na. A pie leele pre yɔɔ yii mbe sɛ na pe ni haalee waŋgra ka nu, la, pe hamblɛ pre we kro wa.3 Kre nyjila kre nu, o Tafun Nyiɛkpɔɔ wre we sɛ wi na waŋgrɛ yire ni, imi na wra wi fa kre. 4 Kre nyjila kre, olive nyua kre na we yire Jerusalem yila finhaa mbe yɔ shiin mbe sɛ su yila tohaa, mbe ki ka sɛ nyjeeri haa, mbe ka sɛ tapanhaa, mbe yi lalaa sni wee. 5 Nyua wee kre nu leele pre we fɛ mbe tro mbe shɔ, ŋgi na hin? Ki nyu we sɛ yili Azel na. Pan ee fɛ imi na e tolɛɛlɛ na fɛ, nyjila ŋga nu tra na seeri Judah ŋunu Uzziah nyjila kre. Kre nyjila kre o Tafun Nyiɛkpɔɔ, na bitumblɔ cheche pre we pan.
6 Na kre nyjila kre waa da, yila wa wɛɛri, a weere wa gbo, a ndram wa nyjii mbe tro. 7 Ndro wa nyisee, na ndramwɔɔ chin, na yila to o, ndram wa wɔ. O Tafun Nyiɛkpɔɔ wre chiin u kre nyjila kre chin. 8 Na kre nyjila kre waa da, ŋmaa nyumu we na fuu mbra yilii Jerusalem na, ki yɔɔ we na fuu mbra lee Epo Weŋge wo ŋga kii wa na shie yila finhaa kre nu, mbe ki yɔɔ haŋa kre na lee Mediterranean epo ŋga kii wa na shie yila tohaa kre nu. Kie na fuu koo nu, mbra fuu tla nyjila. 9 Kre nyjila kre, o Tafun Nyiɛkpɔɔ we ŋunumu li tra ŋga kro nu, a leele kro we u sumi na pe Nyiɛkpɔɔ wi, mbe u chin na u mɛɛ nunu chom kre ni.
10 Geba tra ŋga kii wa na shie Jerusalem nyjeeri haa, na Rimmon tra ŋga kii wa na shie tapan haa yire kro we pe mbrɛrɛ. La, Jerusalem we yiri mbe yire, mbe kro ki lawee. Kie yire jlonwee ŋga praa yeeri Benjamin jlonwee kre na, mbe sɛ su jlonwee jle wo kre lawee, mbe yire wa mbe sɛ su Kɔm jlonwee kre na, mbe yire wa mbe sɛ su Hananel nyuŋgo gedeŋge kre na, mbe yire wa mbe sɛ su lebiile simi fɛɛri ndoo kre na. 11 Jerusalem we ki yɛ ta, mbe leele nɛɛ ki na, a ndro wa jaa ki kla na.
12 A waŋgrɛ nyjɛ yira pan mu wi na Jerusalem ni pre, na o Tafun Nyiɛkpɔɔ wre waa pan we ti mbe yira sisaa to pe na. Pe wejikaara we fɔɔn pe na na pee wa mu yire sholo, a pe nyiɛlɛ we fɔɔn pe nyiweele nu, mbe pe ndile fɔɔn pe nyuu.
13 Kre nyjila kre, o Tafun Nyiɛkpɔɔ we ti mbe tutom kpɔɔ wo pe na, mbe pe kna mbra wii peyɛ na. 14 Judah leele we wi mbe ya Jerusalem leele na. Pie waŋgrɛ nyjɛ yi pe fɛ mu kun yire swanyiɛ, na pe swafiŋge, na pe yonyi tataara, na yirɛ nyjɛ na pe kaan yire kro koli.
15 A yira sisɛɛ nyjɛ wra tia yira to waŋgrɛ yire na kre chɔɔ, we ti mbe yi to pe soolo, na pe nyuuma, na pe bubunlɔ, na yurɛ mblɛ pee wa pe tnihɛɛ yire nu kro.
16 Na ki waa pan ma, waŋgrɛ nyjɛ yira sɛ Jerusalem tɔ kre leele mblɛ pie kro pre we na shie Jerusalem na yɛlɛ nyini, mbra o Tafun Nyiɛkpɔɔ ŋmba wi Ŋunu wre sumi, mbra Asɛkɛ Ble yire lii. 17 Na waŋgra ka leele waa je na pia sɛ o Tafun Nyiɛkpɔɔ Jaŋgafun ŋmba wi Ŋunu wre sumi kre, nyiɛ wa pan kre waŋgra kre nu. 18 A na Egypt leele waa je na pia sɛ u sumi, mbe Asɛkɛ ble yire li kre, nyiɛ wa pan pe pan. A yira sisɛɛ nyjɛ o Tafun Nyiɛkpɔɔ na wa waŋgrɛ nyjɛ yira je na pia asɛkɛ ble yire li kre yire we to pe na. 19 Kre ndie tinii ŋga kie pan Egypt, na waŋgrɛ nyjɛ yie je na pia sɛ Asɛkɛ Ble yire li kre na.
20 Kre nyjila kre, pie nyunɔ gegenyi nyjɛ pe poo soolo lagboo yire na na, “Yira kro pe cheche mu o Tafun Nyiɛkpɔɔ ŋga.” A chɔɛ nyjɛ yii wa Suminyuŋgo wa yire, na kotie nyjɛ ni pie pan sragbunu kre yiɛ wa yire kro we pe cheche. 21 Chɔɛ nyjɛ yii wa Judah, na Jerusalem na yire kro we pe cheche mbe o Tafun Nyiɛkpɔɔ ŋga. A mblɛ pe paan sra wɔhaa wa kro we jaa chɔɛ yire yɛ tɛɛ mbe pe srawɔɔ kaara sɔɔ. Na kre nyjila kre waa da, Canaan leele mblɛ pe yirɛ prɛ pre wa pe o Tafun Nyiɛkpɔɔ Jaŋgafun wre Suminyuŋgo wa na.