3 Kre nyjila kre nu na Judae srawɔfɛɛnlɛ loplombo pre, na chia loplombo pre sɛ fni srawɔfun lopom titi ŋmba praa yeeri Caiaphas wre katoo.

4 Bawa praa kolo chaa, ŋga na pie tro mbe Yesu ta mbe yii brɛmm, mbe sɛ u gbo mbe ndro wa chin ki nu.

5 Pra pe jawala pe na pia u yii ble kpɔɛ yire nu, na kre ma, pre na lenɛɛrɛ pre we to peyɛ na.

6 Ŋga Yesu na le Bethany na kre, wra sɛ le Simon, yiranyiɛrɛfun wre katoo.

7 Bawa chlɔ wa na pan na Alabaster tlade ndiom taan gbolo ndrɔ shelee ka ni. Na Yesu wa na lii, a wra ki kna mna wo u ndra na.

8 Ŋga Yesu twanfɛɛnlɛ pre na ki nya kre, pe krɔ na kun na chlɔ wre ni. A pra kna mna chlɔ wre wie mbo, “Mni a mu tlade ŋga kla finfin ŋga hin?

9 Mu na jaa ki prɛ mbe swa nɛɛrɛ shɔ, mbra shianfɛɛnlɛ ŋga.”

10 Yesu na kee nyjɛ praa chaa mbe yo kre chin, a wra kna mna yo pe pan mbo, “Mni a e na chlɔ wre tɔɔra ma ŋga hin? U kee chiriri pe mu ni ŋga.

11 Yire na shianfɛɛnlɛ pre lɛ mna nyjila kro nu, la, nyjila kro nu ma ee mi ta e jaara.

12 U tlade ŋga kna mu wo ni na, mu ki tɛɛ mu ni wejiŋge gbeele kama, mbe pe chiin ni le wee.

13 Kpra na ni yuu e pan na, waŋgra ŋga nu, mna pie ketaan kre kpali kpan, pie chlɔ ŋmba kee ŋga u pe ŋga yo mbe tɛɛ mbe u sɔɔnri.”

14 Bawa twanfɛɛnlɛ pre nunu ŋmba praa yeeri Judas Iscariot, wre na sɛ Judae srawɔfɛɛnlɛ loplombo pre pan,

15 mna sɛ yo mbo, “Na ni Yesu wre wɔ mu e ŋga, yira ŋgi ee ni ŋga hin?” Ŋga wra yo ma kre, a pra swa fiŋge fulo na kɛ tɔɔnri mna u ŋga.

16 Mu yire kre nyjila kre nu krɛrɛ, Judas naa kolo chaa mbe Yesu ta, mbe pe u yii.

17 Ŋga ble nyjɛ nu pe nsraa yiisi paanu kaa yire na da kre, ki ble ŋga kra yiɛklu kre, Yesu twanfɛɛnlɛ pre na sɛ u wie mbo, “O Tafun, sena haa mu chaa mbe o sɛ gbeele mu pan, mbe mu sɛ klɛntro ble yire li hin?”

18 A Yesu na kna mu yo pe pan mbo, “E sɛ chia ŋga kii wa e yɛsimi ŋga na, na e le wa, ee blɔ wa nya, e yo u pan na, ‘Nyinafun wre yo na u nyjila kre mbra mna, a mu katoo mna wre na u twanfɛɛnlɛ we klɛntro ble yire li.’”

19 A twanfɛɛnlɛ pre na sɛ ŋga wra yo pe sɛ pe kre pe, mna lawee kre gbeele kama, mbe pe sɛ klɛntro ble kre li.

20 Ki ble kre yilakɔŋgɔ, Yesu na le chia kre na, a wre na u twanfɛɛnlɛ kɛmbɔshiin pre na sɛ tni na lii.

21 Ŋga praa lii, a Yesu na kna mu yo pe pan mbo, “Kpra na ni yuu e pan na, e wa we ni wɔ mbe ŋga?”

22 Ŋga wra yo ma kre, fooro na pe kro yii, a pra kna na u wie nununu mbo, “Ni Tafun, mi wi ree?”

23 A Yesu na kna mu yo pe pan mbo, “Ŋmba mi na wre kɛ leni kotolo na lii kre we ni wɔ mbe ŋga.

24 Lewo Biblɔ wre we ku, imi na pe ki nyunɔ mu tɛɛ kre, la, ŋmba we u wɔ mbe ŋga kre, u atɛ. Na pe nsra ufun wre se kuraa prɔ.”

25 Bawa Judas ŋmba wra u wɔ mu ŋga wre na yiri mbo, “Nyinafun mi wi ree?” A Yesu na kna mbo, “Mu nyuu ki yili.”

26 Ŋga praa wa mu tni na lii kre, Yesu na paanu wru mna ki dwan, mna ki pile mu u twanfɛɛnlɛ pre ŋga, mna kna mu yo pe pan mbo, “E shɔ e ka. Ŋga yi ni wejiŋge.”

27 A wra gbɔyira wru mu yii, mna Nyiɛkpɔɔ ŋga mboo, mna pe ŋga ki yi mbo, “E kro, e shɔ e gbɔ!

28 Kre yi ni nyimi ŋga ni Nyiɛkpɔɔ nyu nunu fɔŋgɔ kre pini, mbe ki kna mbe wo mbe lenɛɛrɛ ŋga, mbe pe sisam tinkɛɛ ta.

29 E ti ni yo mbe e loo, mba tre sɛnyi simi ŋga ka gbɔ na fio, fɔŋga ble o kro we fni mbe ki gbɔ, ni Lɛ wre ŋunumu kre nu.

30 A pra mɛɛ kɔ, mna yiri mna sɛ Olive nyua kre na.”

31 Bawa Yesu na kna mna yo pe pan mbo, “E kro we fɛ mbe ni ti blee ŋga. Ŋgi na hin? Pe ki nyunɔ mu tɛɛ na,

32 La, na mbaa nyi, mbe yiɛklu e na mbra shie Galilee na.”

33 A Peter na kna mbo, “Pe kro we fɛ mbe laa mu kro, la, mba fɛ fio.”

34 A Yesu na kna mna yo Peter pan mbo, “Kpra na ni yuu mu pan na, ŋgopilɛ wa nyɛni, na mu ni je gbee nununu taarɛ.”

35 A Peter na kna mbo, “Na ki pan kumu kuraa kre, mi na ŋu we ku, mba mu je fio.” Pan chɔɔ twanfɛɛnlɛ hamblɛ pre na yo na.

36 A Yesu na u twanfɛɛnlɛ pre na yiri wa mna sɛ lawee ka nu, praa ki yeeri Gethsemane, bawa wra yo u twanfɛɛnlɛ pre pan mbo, “E tni mna e ni shie, mbe ni sɛ yiɛ chiɛri mbe sɛ nyiɛtali mbe pan.”

37 A wra Peter, na Zebedee biile shiin pre wru mna ya uyɛ na, a fooro na u yii, a u jawala na tɔɔra.

38 A wra kna mna yo pe pan mbo, “Fooro ni yii kpɔɔ na shie kumu nu, kena e tni mna e na ni sri, yaa shia ŋunu.”

39 A Yesu na pe ti wa mna sɛ yiɛ chiɛri, mna yiɛ juule tra mna nyiɛtali mbo, “Ndoo, na kie ja, ti mbe kanyana ŋga ni wa mbe tro. Imi na mi chaa ma, la, imi na ŋu chaa.”

40 Ŋga wra ndru mna pan mna wra twanfɛɛnlɛ pre ti kre, na pe ŋunu, a wra kna mna Peter wie mbo, “Kena e n ja mu ni shie nyjila chiɛri kuraa ra?

41 Yaa ŋunu, e na siri, e na nyiɛtali, mbe yaa to nyu chaara nu. E ŋumu chaa, la, faŋga n wa e nu.”

42 Yesu na ndru mu pe ti wa, mna sɛ nyiɛtali shiinwo na mbo, “Ndoo, na mu chin na kanyana ŋga nyini wa jaa ni wa mbe tro, fɔna mbe ki nya kre, kena ŋga mu chaa ki pe.”

43 Ŋga Yesu na ndru mu pan na kre, na pe sni na ŋunu, a ŋunumu kre wɛ pe na kuraa.

44 A wra pe ti mu ndru mu sɛ nyiɛtali taarɛ wo na, kee nunu kre chɔɔ wra yo na.

45 Ŋga wra sɛ mu pan kre, a wra yo u twanfɛɛnlɛ pre pan mbo, “Ee wa mu sni na wuui tɛ ra? E le, nyjila kre da, mbe pe Lewo Biblɔ wre wɔ mbe le sisampefɛɛnlɛ kɛɛ.

46 E yiri mbe o na shie, ŋmba we ni wɔ mbe ŋga wre, u da mna.”

47 Ŋga Yesu naa wa mu na paara to, a twanfɛɛnlɛ pre nunu ŋmba praa yeeri Judas Iscariot wre na da mu yire, na leele ni tataara, na pe brɔfiɛnlɛ, na vɛɛn ni kɛɛ. Pe kro na yiri srawɔfɛɛnlɛ loplombo pre, na chia loplombo pre pan.

48 Kre nyjila kre, na ŋmba we Yesu wɔ mbe ŋga wre klu mu pe nyina na, “Ŋmba gbeŋge mbe shiun kre, wre wi.”

49 A Judas na tin mna pan mu Yesu yii mbo, “Nyinafun, lefɔ!” To, mna u gbeŋge shiun.

50 A Yesu na kna mna yo u pan mbo, “Awe, ŋgi pan mu pan mna hin?”

51 A mblɛ na Yesu praa nyaari pre wa na u brɔfiɛn tini mu foli ki afoo nu, mna srawɔfɛɛnlɛ loplombo pre wa tnu ndie chieri mu kun.

52 A Yesu na kna mu yo u pan mbo, “Mu brɔfiɛn kre le ki afoo nu. Ŋgi na hin? Ŋmba we brɔfiɛn tini u ŋmbrɔ na kre, brɔfiɛn nyu na we ku.

53 Mu n chin na mbe jaa ni Lɛ tali mbe u ni ŋga nyjeeri bitumblɔ mbe pe wɛ kagbenyi fuloe taarɛ na kɛ na, mbe paan wi na leele mblɛ ni ree?

54 La, na ki pan ma kre, kee kre pe nyunɔ mu tɛɛ kre wa pe kpra, kena pan ki fna mbe pan.”

55 Kre nyjila kre nu Yesu na yo lenɛɛrɛ pre pan mbo, “E pan ni pan na brɔfiɛnlɛ, na vɛɛn ni na kokɔɔn yii haa e pan. Ble nyini ŋga ni jiin suminyuŋgo wa na e nyina, e n ni yii wa.

56 La, nyjɛ krɛrɛ fna mbe pe, mbe ti Nyiɛkpɔɔ keenyanyofɛɛnlɛ pre kee yire pra yo mu tɛɛ yire, mbe yi pe kpra.” Bawa u twanfɛɛnlɛ pre na fɛ mna u ti leele pre pan.

57 Mblɛ pra Yesu yii pre na sɛ na u ni srawɔfun lopom titi ŋmba praa yeeri Caiaphas wre katoo, na Judae mbra nyinafɛɛnlɛ pre, na pe loplombo pre kro sɛ fni wa.

58 La, Peter na taa Yesu kro mna sɛ da srawɔfun lopom titi wre katoo lam wa, ŋga pra le katoo wa kre, Peter na sɛ tni mu chaa lawee shiefɛɛnlɛ pre nu, na le imi na kee kre we taa.

59 Ŋga pra sɛ na u ni kre, srawɔfɛɛnlɛ loplombo pre, na leele mblɛ pra fni wa pre kro, naa kafinɛ dansiɛrɛ kee chaa mbe u taan, mbe yire ki na mbe u ta mbe gbo.

60-61 La, pe nsra dansiɛrɛ kee ka ta, nde leele tataara na pan mna nyjɛ pe chaa yo. Bawa leele shiin na yiri mna yo mbo, “Wre blɔ ŋmba nyu nyaa mu yo na, ‘Mbe ja mbe Nyiɛkpɔɔ Suminyuŋgo kre juari, mbe ble taarɛ tɛɛ mbe ki sin.’”

62 Ŋga pe nyu na to kre, a srawɔfun lopom titi wre na taan mu yiri, mu Yesu wie mbo, “Ma nyu ka kun ra? Mni mu tia pra kee nyjɛ krɛrɛ yuu na taari mu na ŋga hin?”

63 Yesu nsra paara na pe ni.

64 A Yesu na kna mna yo u pan mbo, “Ŋu mu ki yo ma. La, e ti ni yo e pan mbe e loo. Mu yire aŋga na shie, ee Lewo Biblɔ wre nya na u tni Jaŋgafun wre kalie, mbra paan tloe nu nyjeeri.”

65 A srawɔfun lopom titi wre na yiri mu wre titi dodonyi tini mu wla, mna kna mbo, “U jiɛnlɛ kee yo, kena dansiɛrɛ kee ŋgi o sri na hin? Yire titi e u jini kee ŋga loo.

66 Kena mni e jawa hin?”

67 A praa tɛɛnrɛ hlu na woni u yiɛ na, na u gbuun kaŋgroe, a plɛ naa u yiɛ juari,

68 mna kna na yuu mbo, “Ŋu Kristo, ndro ŋmba u mu gbun nya mu yo o pan.”

69 Kre nyjila kre na Peter wa mu tni katoo lam wa. A tnu bichable wa na sɛ u da mbo, “Ŋu na Yesu ŋmba u yiri Galilee na wre ma e naa nyaari kree?”

70 A Peter na kaala pe kro yiɛ na wa mbo, “Ndro ŋmba kee mu yuu ŋga kuraa mi n u chin.”

71 Peter na flo wa, mna sɛ yire bamba ka na, bawa tnu bichable fuŋu wa na pan mu u da na, mna kna mu yo mblɛ praa wa mu yire wa na le pre pan mbo, “Blɔ ŋmba, ki pe na, wre na Yesu Nazareth wo wre praa nyaari.”

72 Peter na ndru mu kaala wa na, hali mna da mbo, “Blɔ ŋmba mu nyini ŋga kuraa mi n u chin.”

73 Kraa wa wa maa, a mblɛ praa wa mu yire mbɛɛlɛ na pre plɛ na pan mna Peter da mbo, “O shɔnli na Yesu twanfɛɛnlɛ pre wa wi ŋu, mu paaraa kuraa ki nyina ma.”

74 A Peter na kna mbo, “Ni da, ni n blɔ ŋmba kee e yuu ŋga chin?” Titɛɛ kre nu to, a ŋgoplɔ na nyɛni.

75 Bawa Peter na kee ŋga Yesu na yo u pan kre sɔɔnri mbo, “Ŋgoplɔ wa nyɛni, na mu kaala gbee nununu taarɛ na mu n ni chin.” A Peter na yili mna sɛ nyɛni chichie.