Yesu Yire Pilate Yiɛ
27
Ŋga nyiŋge na se bnimi pupu kre, srawɔfɛɛnlɛ loplombo pre kro, na chia loplombo pre na sɛ fni mu jawala wru, na ki fna pe Yesu gbo.
2 A pra u pɔ mna sɛ u le waŋgra lopom Pilate kɛɛ.
Judas Jawala Chinɛhaa
3 Ŋga Judas, ŋmba wra Yesu wɔ mu ŋga wre na nya na pe Yesu gbun na kumu pimi ni kre, wra u jawala chinɛ, mna ndru mu sɛ srawɔfɛɛnlɛ loplombo pre na chia loplombo pre ŋga swa ŋga wra shɔ pe pan kre, mna kna mu yo pe pan, mbo,
4 “Ni sisaa pe, na ni ndro ŋmba nu sisam n wa wɔ mu e ŋga.”
A pra kna mbo, “Wre kee ka ma, mu swa bali.”
5 A Judas na swa kre viŋge mu wa Suminyuŋgo wa, mna sɛ maŋa le.
6 A srawɔfɛɛnlɛ loplombo pre na swa kre bali, mna kna mbo, “Ki pe hankɛ swa, ki tia mbra n kolo ŋga mbe o ki chaa o swa nu.”
7 A pra sɛ fni, mna swa kre wru mna sɛ chɔɛ faanrifun wa tra ka lɔ, na fumblɔ gboolo leni.
8 Mu yire kre ble kre na mu pan mu su aŋga na, kre tra kre mɛɛ, “Nyimi tra.”
9 Nyiɛkpɔɔ kee nyanyofun Jeremiah na kre kee ŋga yo mu tɛɛ, a ki pe kpra mbo,
“Pra swa fiŋge nununu fulo na kɛ tɔɔnri.
Kre swa ŋga Israel biile plɛ na jawa
na ki fna pe ki tɛɛ mbe u lɔ,
10 a pra ki tɛɛ mna tra lɔ
chɔɛ faanrifun wa pan,
imi na Nyiɛkpɔɔ na ki kee yo
ni pan kre.”a
Pilate Kawiere
11 A Yesu na yiri mu yire waŋgra lopom wre yiɛ, a wra u wie mbo, “Ŋu wi Judae ŋunu wre kree?”
A Yesu na kna mbo, “Ŋga mu yuu kre pe kpra.”
12 La, ŋga srawɔfɛɛnlɛ loplombo pre, na chia loplombo pre naa paara na u taanla kre, u nsra paara.
13 A Pilate na kna mbo, “Kena kee tataara nyjɛ pe yuu na taari mu na ŋga, mu n yi loo ree?”
14 Yesu nsra nyu kun. Hali u nsra kee nunu chom nyu wɔ. A kra waŋgra lopom wre pe kawako ni mu tro.
Pe Yesu Gbun Kumu Pimi Ni
15 Kena na pe pe ble kpɔɛ yire lii kre, waŋgra lopom wre ndro ŋmba lenɛɛrɛ pre chaa, woni nyuŋgo mbe wa.
16 A kre nyjila kre nu na pe blɔ wa yii mu le nyuŋgo. Wre blɔ wre, na lenɛɛrɛ u chin, praa u yeeri Barabbas.
17 Kena ŋga pra sɛ fni kre, Pilate na lenɛɛrɛ pre wie mbo, “Ndro ŋmbi e chaa mbe ni wɔ nyuŋgo mbe wa hin? Barabbas ree? ndee Yesu ŋmba pe yeeri Kristo wre hin?”
18 Pilate na chin na prara ki tia pra pan na Yesu ni u pan.
19 Nyjila ŋga nu Pilate na sɛ tni u kpra kun jɔɔn na kre, u chɔ na tia pra pan mu yo u pan mbo, “Jande, blɔ ŋmba u fraka, kena maa shia u pe sisaa, ni u kee nya ŋunɛ nu blee ŋga, a kra ni jawala tɔɔra.”
20 A srawɔfɛɛnlɛ loplombo pre na chia loplombo pre naa yuu leele pre pan na, pe yo Pilate pan, mbe u Barabbas wɔ mbe wa, mbe Yesu gbo.
21 Waŋgra lopom wre na ndru mu pe wie shiinwo na mbo, “Leele mblɛ shiin, ŋmbi haa e chaa mbe ni wɔ mbe wa hin?”
A pra kna mbo, “Barabbas wa!”
22 A Pilate na kna mbo, “Kena mni e chaa mbe ni Yesu ŋmba pe yeeri Kristo wre pe hin?”
A pe kro na kna mbo, “Ti pe u kan kanyana kumu kaan na!”
23 A Pilate na kna mbo, “Mni hin? Sisaa ŋgi u pe ma hin?”
A pra kna na yuu poŋgo mbo, “O yo ti pe u kan kanyana kumu kaan na.”
24 Ŋga Pilate na nya na leele pre gble kpɔɔ ma kre, wra chin na wa jaa kee ka pe, a wra yiri mna sɛ nyumu ko, mna u kɛnyi je leele pre yiɛ na, mna kna mu yo pe pan mbo, “Ni kɛ n wa blɔ ŋmba kumu kee ka nu, e kala ye e pan.”
25 A leele pre kro na kna na yuu mbo, “Ti mbe kee ŋga kie pan ki kro kpan, tuu wre na o biile na.”
26 A Pilate na Barabbas wɔ mu wa, mna tia pra Yesu frɔ na fotro ni, a wra u wɔ mu le pe kɛɛ, mbe pe sɛ u kan kanyana kumu kaan na.
Pe Pna Na Yesu Ni
27 A Pilate sojae pre na Yesu yii mna sɛ na u ni ŋunu katoo, mna sojae pre kro yeeri a pra sɛ fni wa.
28 A pra Yesu dodoŋgi wɔ u na, mna u le dodoŋgi nyiɛ,
29 mna ŋunu juulee tin na wuuro ni mu u juule, mna kaan ka wru mu le u kalie. A praa kosie kani u yiɛ na yiri na ŋunu wi, na u pini na tɛɛ mbo, “Judah ŋunu, mu ka pe.”
30 A praa tɛɛnrɛ hlu na woni u na, mna kaan kre shɔ u kɛɛ mna u ndra lalaa fɔɔri na ki ni.
31 Ŋga pra pna na u ni mu kɔ kre, a pra dodoŋgi kre wɔ u na, mna u le wre titi wo kre, mna sɛ na u ni mbe sɛ u kan kanyana kumu kaan na.
Pe Yesu Kan Kanyana Kumu Kaan Na
32 Ŋga pra yili na shie kre, pra blɔ wa fni, na u yiri Cyrene chia kre na, u mɛɛ naa Simon, a pra u yii jaŋga na, a wra sɛ Yesu kumu kaan kre tio.
33 Pra sɛ na Yesu ni lawee ka nu, pe ki yeeri Golgotha. Ki nyina lewo ndra kajle lawee.
34 Bawa pra tuwe susrom ka chaa simi nu, mna Yesu ŋga mbe u gbɔ, la, ŋga kra gbun u nyu na kre, u nsra ki gbɔ.
35 Ŋga pra u kan kanyana kumu kaan kre na mu kɔ kre, a pra kɛɛn tɛɛ, mna yire yi na mu u dodonyi nyjɛ pra wɔ u na yire yɔɔlɛ mu pe yɛ ŋga, hali pra kɛɛn tɛɛ, mbe chin imi pie ta ta.
36 Ŋga pra kɔ kre, a pra tni u jaara na u sri.
37 Mna u pimi kee nyunɔ mu kan u ndra nyjeeri mbo, “YESU, JUDAH ŊUNU WRE WI KRE.”
38 A pra kokɔɔnlɔ shiin plɛ kan mna mbra u na. Wa naa wa u kalie, a wa naa wa u kamɛŋɛ.
Praa Yesu Tɛɛlɛ
39 Leele mblɛ praa tro na u nyaa pre, naa ndra nyaara na u tɛɛlɛ mbo,
40 “Ŋu mu yo mu jaa Suminyuŋgo kre juari mbe wo, mbe jaa ble taarɛ tɛɛ mbe ki sin, muyɛ shɔ mbe o le. Na Nyiɛkpɔɔ Biblɔ titi wi ŋu kre, mu yɛ shɔ mu tii kanyana kumu kaan kre na.”
41 Pan chɔɔ srawɔfɛɛnlɛ loplombo pre, na chia loplombo pre, na pe mbra nyinafɛɛnlɛ pre kro naa u pini na tɛɛ mbo,
42 “Wraa plɛ shio, a wa jaa uyɛ shɔ. Wre wi Judae ŋunu wre. Tii kanyana kumu kaan kre na, kre oo mu shɔ mbe li.
43 Wre u Nyiɛkpɔɔ shɔnli, na yuu na Nyiɛkpɔɔ Biblɔ wi wre, na Nyiɛkpɔɔ u chaa titi kre, kena u u shɔ mbe o le.”
44 Pan chɔɔ kokɔɔnlɔ mblɛ pra kan kɛɛn na mu ya u na pre naa u tɛɛlɛ na yuu.
Yesu Kumu
45 Ŋga nyjila kɛmbɔshiin na gbun kre, ndram na wɔ lawee kro nu mna sɛ su nyjila taarɛ lafo na.
46 Nyjila taarɛ kre nu kre, Yesu na gblee badaaŋga ka le mbo, “Eli, Eli, lama sabach-thani?” Ki nyina na, “Ni Nyiɛkpɔɔ, ni Nyiɛkpɔɔ, mni a mu laa ni kro hin?”b
47 Ŋga leele mblɛ praa wa mu yire wa pre na kre kee ŋga loo kre, a pra kna na yuu mbo, “E loo, u Elijah yeeri.”
48 A pe wa na fɛ mu sɛ zeere le simi ŋga ki taan nyanya ka nu, mna ki su braŋgɔ kaan na, mna sɛ u ŋga mbe u gbɔ.
49 A plɛ kna mbo, “E ti o na u le, aada Elijah we paan u shɔ.”
50 Ŋga Yesu na ndru mna gble kre le na to, mna fii.
Kawako Kee Ŋga Kra Pe
51 Kre nyjila kre, na pe yoŋgo ka pɔ mu Suminyuŋgo kre yɔ shiin, a yoŋgo kre na peeri shiin mu yire nyjeeri mu pan mu su tapan, a tra na seeri, a dnɛ na yɔɔlɛ,
52 a fanyi na nyaala, a Nyiɛkpɔɔ leele mblɛ pra ku kre tataara na nyi.
53 Ŋga Yesu na nyi kre kɔkro, leele mblɛ pra nyi kre na yili pe fanyi yire nu, mna sɛ Jerusalem na, a lenɛɛrɛ na pe nya.
Sojae Pre Na Fiɛ
54 Ŋga sojae lopom wre, na pe mblɛ praa Yesu sri pre na nya na tra seeri, a yire kaalɛɛ nyjɛ naa pini ma kre, fiɛrɛ na pe yii kpɔɔ, a praa yuu mbo, “Nyiɛkpɔɔ Biblɔ wi blɔ wre yɛŋgɛ.”
55 Chiɛlɛ tataara mblɛ pra yiri Galilee na mna taa Yesu kro, na yaa u na pre na yire haalee na kala le.
56 Na Mary Magdalene, na James, na Joseph lo Mary wre, na Zebedee biile pre lo wre kroo wa wa.
Yesu Lehaa
57 Ŋga kra da yilakɔŋgɔ nyu na kre, blɔ swafun wa na yiri Arimathea na, u mɛɛ naa Joseph, a wra pe Yesu kotɔmblɔ pre wa.
58 Wre wra yiri mna sɛ Yesu gboo tali Pilate pan. Pilate nsra je. Wra tia pra u ŋga u wi.
59 A Joseph na sɛ gboo wre wru, mna u pɔ na mbɔfiŋge ni,
60 mna sɛ u le wre titi dnɛ wee ŋga u tuu mu tɛɛ nu. Mna dnɛ badaaŋga ka gbila mna ki nyu tɔ, mna sɛ katoo.
61 Kre nyjila kre, na Mary Magdalene, na Mary shiinwo wree wa mu tni mu yiɛ kan faŋga kre na.
Srawɔfɛɛnlɛ Loplombo Pre Peyɛ Kna
62 Ŋga nyiŋge na se pe sumi ble kre, srawɔfɛɛnlɛ loplombo pre na Pharisee leele pre na sɛ fni Pilate katoo,
63 mna yo u pan mbo, “Tolɛɛ, o sɔɔnri na ŋga kafnu wre naa wa kre, wraa yuu na, na pe u gbo, we nyi ki ble taarɛ ble na.
64 Kena o mu tali, ti mbe leele sɛ tni u lehaa wa, mbe u shie, mbe sɛ su ble taarɛ ble kre na, mbe u twanfɛɛnlɛ pre waa shia sɛ u ju mbe wɔ, mbra yuu leele pan na u nyi. Na ki pan ma kre, kee nyjɛ pie fni mbe yo kre we wɛ jle wee yire na.”