Yesu Yiihaa
18
Ŋga Yesu na nyiɛtali mu kɔ kre, wre na u twanfɛɛnlɛ pre na Kidron lafolo kre kun mna sɛ. Kagbla ka naa wa kre lawee kre nu, a Yesu na u twanfɛɛnlɛ pre na sɛ le ki lam.
2 Judas ŋmba wra u wɔ mu ŋga wre na haa chin. Ŋgi na hin? Yesu na u twanfɛɛnlɛ pre naa shie na fni wa.
Jesus betrayed and arrested (John 18:1-14)
3 Ki tia Judas na sojae plɛ, na suminyuŋgo shiefɛɛnlɛ mblɛ srawɔfɛɛnlɛ loplombo na Pharisee leele pre na wɔ mu u ŋga pre wru, mna sɛ kagbla wa. Pra kania yii yii, a plɛ na mɔɔlɛɛ mu mna yii, na pe ŋunɔ wiyirɛ ni.
4 Yesu na kee nyjɛ yiraa paan mbe u nya chin. Kra tia wra yiri mna loŋgoolo pre fni, mna pe wie mbo, “Ndro ŋmbi e chaa hin?”
5 A pra yo mbo, “Yesu Nazareth wo wre.”
A Yesu na yo mbo, “Mi wi kre!” Na pre na Judas ŋmba wra u wɔ mu ŋga kre pee wa mu yire wa.
6 Ŋga Yesu na yo mbo, “Mi wi kre,” to, a pe kro na ndru kro ni, mna wɔ mu to to tra.
7 A Yesu na ndru mu pe wie mbo, “E yo ndro ŋmbi e chaa?”
A pra yo mbo, “Yesu, Nazareth wo wre o chaa.”
8 A Yesu na kna mbo, “Ni klu mu yo e pan na mi wi kre. Kena na mi e chaa rɛ, e ti mbe ni wolo mblɛ sɛ.”
9 Wra kre kee ŋga yo, imi kie pe mbe ŋga wra yo na, “Ndoo, mblɛ mu ni ŋga pre, ni n tia pe nunu chom fun,” kre pe yɛŋgɛ.
Peter Brɔfiɛn Kɔ
10 Na brɔfiɛn yiɛshiin wa Simon Peter pan, a wra ki tini mu foli ki afoo nu, mna srawɔfun lopom titi wre sumifun kalie ndie chieri mu wa. Sumifun ŋmba ndie pra kun wre mɛɛ naa Malchus.
11 A Yesu na kna mu yo Peter pan mbo, “Mu brɔfiɛn kre le ki afoo nu. Kanyana ŋga nu Ndoo ni le kre, ki n fna ki ni nya ree?”
Pra Sɛ Yesu Ni Annas Lawee
12 Sojae pre na pe lopom, na Judae Suminyuŋgo shiefɛɛnlɛ pre na Yesu yii mna u pɔ.
13 Pra klu mu sɛ na u ni Annas pan. Wre Annas ŋmba, Caiaphas nafun na wi, a na Caiaphas wi srawɔfun lopom titi kre yɛlɛ kre na.
14 Wre Caiaphas ŋmba wra da mu paara mu Judae pre nyina na, kie nyu na ndro nunu we ku mbe leele kro ndra lɔ kre.
Peter Kaala Haa
15 Simon Peter na twanfɛɛnlɛ pre wa na taa Yesu kro. Wre twanfun nunu wre, srawɔfun lopom titi wre na u chin chichie. Kra tia wre na Yesu na le srawɔfun lopom titi wre katoo wa,
Peter denies knowing Jesus and Annas questions Jesus (John 18:15-27)
16 a Peter na kro fimi na, krɔ kre nyu na wa. A twanfun ŋmba srawɔfun lopom titi wre na chin wre, na ndru mna yili fimi na, mna paara na bichable ŋmba u kolo nyu sri wre ni, mna le na Peter ni katoo lam.
17 A bichable wre na Peter wie mbo, “Blɔ wre twanfɛɛnlɛ pre wa ma ŋuu?”
A Peter na yo mbo, “Ɔɔhɔn, pe wa ma mi.”
18 Na weere kuu, kra tia sumifɛɛnlɛ pre na katoo kre shiefɛɛnlɛ pre na kanhun gbɛɛri na yuai, a Peter na sɛ chaa pe nu, na ka yuai.
Srawɔfun Lopom Titi Wre Yesu Wie Mbra
19 Srawɔfun lopom Annas wre na Yesu wie, u twanfɛɛnlɛ pre, na u kee nyjɛ wraa nyina yire kee.
20 A Yesu na kna mbo, “Nyjila kro nu, ni paara lenɛɛrɛ nu, na leele nyina Suminyuŋgo, na fninyinyi nyjɛ nu Judae pre kro shie na fnii kre nu. Ni n da mu kee ka yo mu ndra tun.
21 Kena ŋgi ki tia a mna ni wie kee nyjɛ ni nyina ŋga hin? Leele mblɛ pe ndru ni pan kre wie. Pe wie kee nyjɛ ni yo pe pan, pre pe nyjɛ ni yo chin.”
22 Ŋga Yesu na yo ma kre, a lawee shiefɛɛnlɛ pre wa na u yiɛ ja, mbo, “Ŋgi ki tia mu paara srawɔfun lopom titi pan ma ŋga hin?”
23 A Yesu na kna mu yo u pan mbo, “Kee fɔɔn ŋgi ni yo hin? Ki nyina mbe ndro kro loo. La, na kpra ni yo, mni a mu ni yiɛ ja hin?”
24 Annas na tia pra sɛ na u ni srawɔfun lopom titi Caiaphas pan, na pee wa mu u pɔ.
Peter Kaala Shiin Wo
25 Peter naa wa mu yire na kanhun kre yuai tɛ, a mblɛ wre na pre naa wa wa kre na u wie mbo, “A blɔ wre twanfɛɛnlɛ pre wa ma ŋu kree?”
A Peter na kaala mbo, “Ɔɔhɔn, pe wa ma mi.”
26 Srawɔfun lopom titi wre, sumifun ŋmba ndie Peter na chieri mu kun kre, u sele ndro wa na Peter wie mbo, “Ni nsra ŋu na wre nya kagbla waa?”
27 A Peter na kaala na to, a ŋgoplɔ na nyɛni.
Pe Sɛ Yesu Ni Pilate Katoo
28 Pra Yesu wɔ mu yili Caiaphas katoo, mna sɛ na u ni abani lopom katoo. Kre nyjila kre na bnimi pupu yi. Judae loplombo pre nsra le katoo lam, na pe chaa mbe pe cheche, mbe Klɛntro ble kre li paala kolo na.
Pilate questions Jesus (John 18:28-40)
29 Ki tia Pilate na yili mna sɛ pe pan fni fimi na, mna pe wie mbo, “Sisaa ŋgi blɔ ŋmba pe, a e pan na u ni mna hin?”
30 A pra kna mbo, “Na u nsra sisaa pe, waa na pan na u ni mu pan.”
31 A Pilate na yo pe pan mbo, “Yire titi, e u wru e sɛ u kpra kun imi na e mbra nyi.”
A pra kna mbo, “Mbra n kolo ŋga na oo ja mbe ndro gbo.”
32 Kre kee ŋga na pe, imi kie pe mbe Yesu kee ŋga wra da mu yo mu wru kumu ŋga nyini we ku haa kre, mbe ki pe yɛŋgɛ.
Pilate Kawiere
33 Pilate na ndru mu le katoo mna Yesu yeeri mu u wie mbo, “Ŋu wi Judae ŋunu wree?”
34 A Yesu na kna mu u wie mbo, “Ŋu nunu jawala yi ree, plɛ pe ni kee yo mu pan hin?”
35 A Pilate na kna mbo, “Mu jawa na Judah wo wi mi ree?” Ŋu titi leele na pe srawɔfɛɛnlɛ loplombo pe pan na mu ni, mu mu le ni kɛɛ. Kala ŋgi mu pe hin?
36 A Yesu na kna mbo, “Ni ŋunumu n pe waŋgra ŋga ŋunumu. Na ni ŋunumu na pe waŋgra ŋga ŋunumu kre, ni kotɔmblɔ wra wi mbe ni shɔ Judae loplombo kɛɛ. A la, ni ŋunumu n pe waŋgra ŋga ŋunumu.”
37 Kra tia Pilate na u wie mbo, “Kena ŋunu wi ŋu ra?”
A Yesu na yo mbo, “Kre mu yo kre. Kre kee ŋga ndra na pe ni se a ni pan waŋgra ŋga nu, mbe paan kpra kre dansiɛrɛ li, a ŋmba u pe kpra kre wo kre, u ni kala ndru.”
38 A Pilate na u wie mbo, “Kpra kre yi ŋgi hin?”
Pilate Chaa Mbe Yesu Wa
Ŋga wra kre kee ŋga wie kre, wra yili mna sɛ yo Judae pre pan mbo, “Ni n kala sisaa ŋga blɔ wre pe nya.
39 La, e paala kolo na kre, ki fna ni ndro nunu wɔ nyuŋgo mbe wa finfin Klɛntro ble lie yire nu. E chaa mbe ni Judae ŋunu wre wɔ ree?”
40 A pra gble badaaŋga mbo, “Ɔɔhɔn, wre blɔ ŋmba ma. Barabbas o chaa mbe mu wa.” Wre Barabbas ŋmba, linkufun na wi.