2 A Judah srawɔfɛɛnlɛ loplombo pre, na Moses mbra nyinafɛɛnlɛ pre naa kolo chaa, ŋga na pie tro mbe Yesu gbo, mbe leele wa chin. Ŋgi na hin? Praa fiɛ leele pre na.

3 Kre nyjila kre nu, Sutna na le Judas ŋmba praa yeeri Iscariot wre nu. Wra pe Yesu bitumblɔ kɛmbɔshiin pre wa.

4 Wra sɛ paara Judah srawɔfɛɛnlɛ loplombo pre, na suminyuŋgo shiefɛɛnlɛ loplombo pre pan, mna pe nyina kolo ŋga na we tro mbe Yesu wɔ mbe pe ŋga.

5 A pe yiɛ na shɔ, a pra u le gbun na pie u ŋga swa.

6 A wra ki nɔɔloo, mna kolo ŋga na we tro mbe u wɔ mbe pe ŋga cha, mbe lenɛɛrɛ pre wa chin.

7 Ŋga ble ŋga nu pe nsraa yiisi paanu kaa kre na da, mbe pe klɛntro ble sra mbɔɔ wre gbo kre,

8 Yesu na Peter na John tun mbo, “E sɛ klɛntro ble sro kre pe mbe o paan li.”

9 A pra kna mna u wie mbo, “Sena mu chaa mbe o sɛ sro kre pe hin?”

10 A wra kna mna yo pe pan mbo, “E le, na e le chia kre na, blɔ wa we e fni, na u nyumu tio chɔkoo ni. E taa u na e sɛ le katoo ŋga nu we le kre nu.

11 Na e le kre, e yo katoofun wre pan na, ‘O Nyinafun wre yo o paan mu wie na, sena fumblɔ nyuŋgo ŋga nu wre na u twanfɛɛnlɛ pre we klɛntro ble li kre nyi hin?’

12 We e nyina abansru nyuŋgo kpɔɔ ka nyjeeri. Pe ki lam san kama. E bawa gbeele.”

13 A pra sɛ yira kro nya, mna sro kre pe na u sri.

14 Ŋga pe li nyjila na da kre, Yesu na u twanfɛɛnlɛ pre na sɛ tni mbe li.

15 A Yesu na kna mna yo pe pan mbo, “Ki tna ni pan na mi na yire we klɛntro ble sro ŋga li, mbe ni kanyana kre chiin da.

16 Ŋgi na hin? Ni yuu e pan na, mba kre sro ŋga ka li na, fɔna ŋga ble ki titi kre we pe Nyiɛkpɔɔ ŋunumu kre nu.”

17 A Yesu na gbɔyira wru, na tre sɛnyi simii wa ki nu, mna Nyiɛkpɔɔ ŋga mboo, mna kna mbo, “E shɔ e gbɔ, e eyɛ ŋga.

18 Ni yuu e pan na, mba tre sɛnyi simi ŋga ka gbɔ na, fɔna Nyiɛkpɔɔ ŋunumu kre nu.”

19 A wra paanu wru, mna Nyiɛkpɔɔ ŋga mboo, mna ki pile mna le pe kɛɛ, mna kna mbo, “Ni wejikaara yi kre, a ndaa e kaan ki yi, e ki tɛɛ e na ni sɔɔnri.”

20 Pan kra nyi, ŋga pra li mu kɔ, a wra gbɔyira kre bali mna kna mbo, “Gbɔyira ŋga yi Nyiɛkpɔɔ nyu nunu fɔŋgɔ ŋga u ni nyimi tɛɛ mu pe kre, a yire ndra na pe yila mbe ni nyimi kna mbe wo.

21 A e le, ŋmba we ni wɔ mbe ŋga wree wa mu tni mna.

22 Lewo Biblɔ wre we ku imi na Nyiɛkpɔɔ ki yo kre. La, ŋmba we u wɔ mbe ŋga kre, ufun atɛ.”

23 A pra kna na peyɛ wie, na pe ŋmbi haa we kre kee ŋga pe hin?

24 Kakra ka na yiri twanfɛɛnlɛ pre nu, na pe ŋmbihaa wi pe lekpɔɔ hin?

25 A Yesu na kna mna yo pe pan mbo, “Waŋgra leele mblɛ pe n Nyiɛkpɔɔ chin kre, pre pe ŋunumu jaŋga lii pe leele na, a leele na pe yeeri bonyaafɛɛnlɛ

26 A yire rɛ, pan ma ki nyi e nu. La, ŋmba u wɛ e na kro kre, ki fna u uyɛ pe fiɛn e lalaa. Mbe e lekpɔɔ pe e sumifun.

27 Leele shiin mblɛ ŋmbi u pe lekpɔɔ hin? Ŋmba u tni mbe li ree, ndee ŋmba u sro pini wi hin? Ŋmba u tni mbe li wi, la, mii wa e lalaa na sumifun wi.

28 Ni kanyana nyjila nu kre, yire e tni ni jaara.

29 Imi na ni Lɛ ni ŋga ŋunumu kre, pan chɔɔ ni e wɔ,

30 mbe mi na yire chaa mbe li ni ŋunumu kre nu. A ee tni ŋujɔɛn na, mbe Israel jlom kɛmbɔshiin yire kala li.”

31 Yesu na kna mbo, “Simon! Le, Sutna kolo cha mbe e pe mbe le, we e pe imi na chlɔ yirɛ foo, mbe yi bie wɔ yi fue nu kre.

32 La, ŋu Simon ni nyiɛtali mu mu ŋga, mbe mu shɔnlie wa shɔ mbe to, a na maa mu jawala chinɛ mu ndru mu pan ni pan kre, mbe mu mu wolo pre le gbeŋmbaa.”

33 A Simon na kna mbo, “Ni Tafun, ni niyɛ kna, na pe shie mbe sɛ mu le nyuŋgo, ndee mbe sɛ mu gbo kre, mbe ka sɛ.”

34 A Yesu na kna mbo, “Peter, ni yuu mu pan, aŋga, ŋgoplɔ wa nyɛni, na mu kaala na mu n ni chin gbee nununu taarɛ.”

35 A Yesu na kna mna yo pe pan mbo, “Ŋga ndaa e tun, mna yo e pan na yaa shia sɛ na swa le yira, na bɔtɔ, na kpawrɛ ni kre, yaka na e shian ree?”

36 A Yesu na kna mbo, “Fuŋga rɛ, ŋmba uu wa na swa le yira, ndee bɔtɔ ni kre, u ki wru. A ŋmba u n brɔfiɛn ŋunɔ wi wo ni kre, ufun u u dodoŋgi wɔ u prɛ, mbe sɛ ka lɔ.

37 Ŋgi na hin? Ni yuu e pan na, ni kee ŋga pe nyunɔ mu tɛɛ na pra u tɔɔnri mu chaa sisampefɛɛnlɛ nu kre fna mbe pe yɛŋgɛ. Ŋgi na hin? Ni kee nyjɛ pe nyunɔ yire kro nyjila da.”

38 A pra kna mbo, “O Tafun, le, brɔfiɛn ŋunɔ wi wee shiin yi kre.”

39 A Yesu na yili chia kre na, imi na wraa pini nyjila kro nu kre, mna sɛ Olive nyua kre na, a u twanfɛɛnlɛ pre na u kɔŋgɔ ni.

40 Ŋga wra da lawee ŋga nu wraa shie na jiin kre nu kre, a wra yo u twanfɛɛnlɛ pre pan mbo, “E nyiɛtali mbe yaa to nyu chaara kee nu.”

41 A Yesu na tini mu yili pe nu chiɛri, mna kosie kan, mna nyiɛtali mbo,

42 “Ndoo, na mu chaa ti mbe kanyana gbɔyira ŋga ni klɛɛ tro. Imi na mi chaa ma, la, imi ŋu chaa ki pe.”

43 A Nyiɛkpɔɔ nyjeeri bituŋu na uyɛ wɔ mna u nyina, mna u le faŋga.

44 Fooro kpɔɔ na u yii, a kra tia wra nyiɛtali kpɔɔ na nyibinyiɛ ni, a u kafue na pe na nyimi yi, na nuni tra.

45 Ŋga wra nyiɛtali mu kɔ kre, wra pan mna u twanfɛɛnlɛ pre na nyi kre, na fooro pe yii kpɔɔ, a pra ŋunu.

46 A wra kna mna yo pe pan mbo, “Mni a e sni na ŋunu hin? E yiri e nyiɛtali, mbe yaa to penlee nu!”

47 Yesu naa wa mu yire na paara to, a lenɛɛrɛ plɛ na wa mu yili wa. Twanfɛɛnlɛ kɛmbɔshiin pre nunu ŋmba praa yeeri Judas wre wra yiɛklu na pe ni. A wra flo mu da Yesu na, mbe u gbeŋge shiun.

48 A Yesu na kna mna yo u pan mbo, “Judas, kena ni gbeŋge mu shiun mbe mi Lewo Biblɔ wre wɔ mbe ŋga ra?”

49 Ŋga twanfɛɛnlɛ mblɛ praa wa mu taa Yesu kro kre na kee ŋga ki paan kre nya kre, a pra kna mna yo Yesu pan mbo, “O pe chile na o brɔfiɛnlɛ yire ni ree?”

50 A twanfɛɛnlɛ pre nunu na srawɔfɛɛnlɛ loplombo pre wa tnu ndie kalie wo chieri mu kun.

51 A Yesu na kna mbo, “Yaa pe ma!” A Yesu na u ndie kre yii mna u tra,

52 mna kna mu yo srawɔfɛɛnlɛ loplombo pre, na suminyuŋgo lefɛɛnlɛ loplombo, na Judae loplombo mblɛ pra pan u yiihaa kre pan mbo, “E pan ni pan brɔfiɛnlɛ, na vɛɛn ni, na kokɔɔn yiihaa e pan.

53 Blenyini ŋga, mi na yire lɛ Suminyuŋgo wa, e n ni yii wa. La, e nyjila ki da, a Sutna na u wɔmu jaŋga lii.”

54 A pra Yesu yii mna sɛ na u ni srawɔfun lopom titi wre katoo. Peter na taa pe kro, mna lalaa wa wre na leele pre pan.

55 Ŋga leele pre na sɛ kanhun gbɛɛri katoo kre lalaa na yuai kre, Peter na sɛ tni mu chaa pe nu.

56 A tnu bichable wa na Peter nya na u tni kanhun kre jaara, a wra yiɛ kan u na mna kna mbo, “Blɔ ŋmba u chaa leele mblɛ pra taa u kro pre nu.”

57 A Peter na kaala mna kna mbo, “Ndro ŋmba kee mu yuu ŋga kuraa ni n u chin.”

58 Kie pe maa, a blɔ wa na u nya na, mna kna mu yo u pan mbo, “Yesu leele pre wa wi ŋu.”

59 Kie pe nyjila chiɛri ka kɔkro kre, lefuŋu na pan mna paara pɔɔrɔ ni mbo, “Kakra n wa ki na, blɔ ŋmba, u chaa leele pre nu yɛŋgɛ. Ŋgi na hin? Galilee ndro wi.”

60 La, Peter na kna mbo, “Awe, kala ŋga mu yuu ŋga, ni n ki nɔɔ loo.” Ŋga wraa wa mu yire wa na paara kre to, a ŋgoplɔ na nyɛni.

61 A o Tafun wre na kna mu Peter yiɛ le. A Peter na kee kre o Tafun na yo kre sɔɔnri. Na Yesu klu mu yo u pan na, “Ŋgoplɔ wa nyɛni aŋga, na mu kaala gbee nununu taarɛ, na mu n ni chin.”

62 A Peter na yili mna sɛ nyɛni chichie.

63 Bilɛ mblɛ pra Yesu yii kre naa u pini na tɛɛ, na u gbuun,

64 mna u yiɛ pɔ mu tɔ, na yuu u pan mbo, “Ŋmba u mu gbun nya mu yo o pan.”

65 A pra kee nɛɛrɛ yo mu u taan.

66 Ŋga nyiŋge na se kre, Judae loplombo pre, na srawɔfɛɛnlɛ loplombo pre, na Moses mbra nyinafɛɛnlɛ pre kro na sɛ fni, a pra pan na Yesu ni mu yire pe lalaa, a pra yo u pan mbo,

67 “Na ŋu wi Kristo wre, kpra yo o pan.”

68 a na ni e wie kee, yaa ki nyu wɔ.

69 La, mu yire aŋga na shie, Lewo Biblɔ wre we tni Jaŋgafun Nyiɛkpɔɔ wre kalie.”

70 A pe kro na kna na u wie poŋgo mbo, “Kena Nyiɛkpɔɔ Biblɔ wi ŋu ree?”

71 A pra kna mbo, “Yira ŋgi dansiɛrɛ kee o chaa na hin? O kee kre kro loo mu yili wre titi nyuu.”