Mark Ketaan Kre
John Ndrajefun Wre Kee
1
Nyiɛkpɔɔ Biblɔ, ŋmba pe yeeri Yesu Kristo wre, u ketaan kre nɔɔ hlehaa yi kre.
2 Imi na Nyiɛkpɔɔ kee nyanyofun ŋmba praa yeeri Isaiah na yo u hlɛ kre nu kre mbo,
“Le, mbe ni bituŋu tun mbe u yiɛ klu,
mbe sɛ kolo gbeele mu pan.”a
3 “Wre mana ki yilii tablɔ tra kre nu na yuu mbo,
‘E o Tafun kolo kre gbeele,
e u trohaa kre fraka.’”b
4 Kena blɔ wa, praa u yeeri John ndrajefun, a wraa wa tablɔ tra kre nu, na nyina na, fɔŋga lewo we u jawala chinɛ, mbe pe u ndra je, mbe Nyiɛkpɔɔ chiin u sisam ti mbe u kɛ.
Jesus is Baptized (Mark 1:4-11)
5 Bawa Judea tra kre leele, na Jerusalem chia leele kro naa shie, na pe sisam yuu, a wraa pe ndrɛ jee Jordan lɔɔ kre nu.
Yesu Panhaa Na U Tnumu
6 Yoŋgo ŋga pra tin na nyuuma yooro ni John naa toni. A yurɔ hlɛ na yi u greree, a sro ŋga wraa lii na yi kpatɔ, na srɛ.
7 Kee ŋga wraa yuu yi mbo, “Ndro ŋmba jaŋga ki wɛ mi naa wa kro na paan, mi n fna kple na mbe lɛɛlɛ mbe kɛ taa u kpawrɛ na mbe yi saan.
8 Mi rɛ, nyumu ni ni e ndrɛ jee, la, na wre waa pan, Kpra Ŋumu wre ni we e ndrɛ je.”
Yesu Ndra Je Haa
9 Kre nyjila kre nu, Yesu na yiri Nazareth chia ŋga kii wa Galilee tra nu wa kre na mna pan, a John na u ndra je Jordan lɔɔ kre nu.
10 Ŋga wra yili lɔɔ kre nu to, mna nya na nyjeeri nyaa, a Ŋumu wre naa tri u na, na katoo kotro wi.
11 A mana ka na yili nyjeeri wa mbo, “Ŋu wi ni Biblɔ ŋmba ni kori, a ni yiɛshɔ mu na.”
Sutna Yesu Nyu Cha
12 Titɛɛ kre nu, a Ŋumu wre na sɛ na u ni tablɔ tra kre nu.
13 Bawa wra nyi, ble fuloe shiin, a Sutna na sɛ u nyu cha. Wre na nyaalam yurɛ praa wa wa, a Nyiɛkpɔɔ bitumblɔ na pan, mnaa yaa u na.
Yesu Ketaan Kre Nɔɔ Hle
14 Ŋga pra kɔ mna John yii mu le nyuŋgo kre kɔkro, Yesu na pan Galilee tra nu wa, mnaa Nyiɛkpɔɔ ketaan kre yuu.
15 Mbo, “Nyjila kre da, Nyiɛkpɔɔ ŋunumu kre da mna. E e jawala chinɛ. E Nyiɛkpɔɔ ketaan kre shɔ e li.”
Kotɔmblɔ Jijirɛ Plɛ Yeerihaa
16 Ki ble ka wraa tro Galilee epo kre mbɛɛ na, na blɔ wa, praa u yeeri Simon, na u chunu Andrew, na pee wa epo kre yiɛ na, na asau waa. Ki nyjila kre na mbroe wɔfɛɛnlɛ lɛ.
17 A Yesu na yo pe pan mbo, “E pan e taa ni kro, mbe ni e pe leele wɔfɛɛnlɛ.”
18 Titɛɛ kre nu, a pra pe asau yire ti wa, mna pan mu taa u kro.
19 Ŋga pra sɛ yiɛ chiɛri na kre, na Zebedee na u biile, James, na John wa pe krɔ lam, na pe asau gbeele.
20 Yesu na pe yeeri, titɛɛ kre nu, a pra pe lɛ na tnumutunfɛɛnlɛ pre ti krɔ kre nu, mna pan mu taa Yesu kro.
Yesu Ŋumufɔɔn Wɔ Ndro Nu
21 Yesu na u kotɔmblɔ pre na sɛ Capernaum na. Ŋga Siwri ble na to, na pe ble fuŋgo ble yi, a wra sɛ le pe fninyuŋgo mnaa pe nyina Nyiɛkpɔɔ kee kre.
22 Imi wraa pe nyina kre na pe pe kawako ni. Ŋgi na hin? Wraa paara na jaŋgafun wi. U nsraa paara na pe nyinafɛɛnlɛ pre lɛ.
23 Jaa na ŋumufɔɔn wa blɔ wa nu fninyuŋgo wa, titɛɛ kre nu,
24 a wra gblee le mbo, “Kala ŋgi ni wre na ŋu nyi hin? Ŋu Yesu ŋmba mu yiri Nazareth na? O klahaa mu pan ree? Ni chin ndro ŋmba wi ŋu. Ŋu wi Nyiɛkpɔɔ ndro cheche wre.”
25 Bawa Yesu na u yiɛ kee yo u pan mbo, “Pieri mu yili u nu mu sɛ!”
26 Ŋga kra pan ma kre, ŋumufɔɔn kre na blɔ wre chan tra, na u gbila, wra gble leni, mna chin mu yili u nu.
27 Kra leele mblɛ praa wa wa pre krɛrɛ pe kawako ni, a praa peyɛ wie mbo, “Kolo fɔŋgɔ ŋgi ni blɔ ŋmba pan ŋga hin? Jaŋga ni ma. Hali na u fuu ŋumufuɛn yire na kuraa yi ndru u pan.”
28 Titɛɛ kre nu, Yesu kee na kpali mu tro Galilee tra kre nu kro.
Peter Nafun Chlɔ Tra Haa
29 Ŋga Yesu na yili fninyuŋgo wa to, a wre na James na John na sɛ Simon na Andrew katoo.
30 Ŋga pra le wa kre, na kabro Simon nafun chlɔ gbun a u sni, a pra ki yo Yesu pan titɛɛ kre nu.
31 A Yesu na le u kro mu u yii kɛ na, mna u yire mu yire sholo. Titɛɛ kre nu to, a kabro kre na laa chlɔ wre na, a wra yiri mna sro pe mu pe ŋga.
Yesu Lenɛɛrɛ Tra
32 Ki ble kre yilakɔŋgɔ, na yila to mu kɔ, pra pan na yambla, na mblɛ nu tiprɛm nyi ni Yesu pan, mbe u pe tra.
33 Chia kre leele kro na pan mu fni mna Yesu na nyi kre.
34 A Yesu na yambla pre tataara tra, mna tia ŋumufuɛn na yili lenɛɛrɛ nu, la, u nsra tiprɛm ŋumu yire ŋga kolo na pe paara. Ŋgi na hin? Pra Yesu chin.
Yesu Kee Kre Yo Galilee Na
35 Ŋga ki nyiŋge naa paan mbe se kre, Yesu chiin na gbolo mu yili mu sɛ tablɔ tra ka nu, mbe wre na Nyiɛkpɔɔ sɛ paara.
36 A Simon na kotɔmblɔ hamblɛ pre na kɔ mu Yesu cha chiin,
37 mna sɛ u nya, mu yo u pan mbo, “Lenɛɛrɛ mu chaa na tro.”
38 A Yesu na kna mu yo pe pan mbo, “Ki fna mbe o sɛ chiɛ yɛ na na, mbe ni sɛ Nyiɛkpɔɔ kee kre yo wa na. Kre ndra na ni yila mu pan.”
39 A Yesu na kila mu tro Galilee tra kre nu kro, mna na lee pe fninyinyi yire nu na Nyiɛkpɔɔ kee kre yuu pe pan, na ŋumufuɛn woni leele nu.
Yiranyiɛrɛfun Wa Tra Haa
40 Yiranyiɛrɛfun wa na pan mu Yesu tali, mna kosie kan u yiɛ mbo, “Yesu, na mu chaa, mu jaa ti mbe ni saanla, mbe pe cheche.”
41 Ŋga wra yo ma kre, u kee na pe Yesu pan fooro ni, a wra kɛ tini mu taa u na, mna yo u pan mbo, “Ni chaa, kena saanla!”
42 Titɛɛ kre nu, yiranyiɛrɛ yire na laa blɔ wre na, a wra saanla.
43 A Yesu na u jaari chichie mbo, “Sɛ muyɛ nyina Judae srawɔfɛɛnlɛ pre pan.
44 La, maashia ki yo ndro pan. Sra yirɛ nyjɛ Moses e nyina kre, sɛ na yi ni mu sɛ srawɔfɛɛnlɛ pre ŋga, mbe ki dansiɛrɛ li na mu saanla.”
45 Ŋga yaŋu wre na yili wa na shie kre, u nsra ja mu frɔ. Wraa kee kre kpali na shie. Kra tia lenɛɛrɛ na kala kre loo. Ŋga kra pan ma kre, Yesu nsra ja mbe le chia ka na na. A wra kro fimi lawee kre nu, a leele naa yirii mbɛɛlɛ chiɛ yire na kro, na paan u pan wa.