Yesu Nyu Chaara
4
Kpra Ŋumu wre na pan mna le Yesu nu. A wra yili Jordan lɔɔ lawee kre nu, a Kpra Ŋumu na u bali mu sɛ tablɔ tra kre nu.
Luke 4:1-30
2 A Sutna na sɛ u nyu cha ble fuloe shiin. Yire ble yire nu krɛrɛ u nsra yaka ka, kra tia ŋga ble yire nyu na to kre, na klo u ta.
3 A Sutna na kna mna yo u pan mbo, “Na mu chin na Nyiɛkpɔɔ Biblɔ wi ŋu kre, dnɛ nyjɛ ka kna paanu mu ka mbe ni le.”
4 A Yesu na kna mu yo u pan mbo, “Pe ki nyunɔ mu yo na, ki n pe sro chiin ki lewo tɛɛ waŋgra ŋga nu.”a
5 A Sutna wre na sɛ Yesu ni nyua gedeŋge ka ndra na, mna sɛ u nyina waŋgra ŋunumu, na yirɛ nyjɛ mu chin ŋga kro, titɛɛ kre nu,
6 mna kna mu yo Yesu pan mbo, “Mbe mu ŋga jaŋga, na yirɛ nyjɛ mu nyaa ŋga kro. Ŋgi na, pe ni ŋga yi yi, a ndro ŋmba ni chaa, wre mbe ŋga yi yi.
7 Kena na mu kosie kan mbe ni sumi kre, yi kro we pe mu wee.”
8 A Yesu na kna mna yo u pan mbo, “Pe ki nyunɔ mu tɛɛ na, kosie kan mu Tafun Nyiɛkpɔɔ wre chiin yiɛ, a wre chiin ki fna mbe mu sumi.”b
9 A Sutna wre na sɛ na u ni Jerusalem na, mna sɛ u yire Suminyuŋgo kre ndra lalaa, mna yo u pan mbo, “Na mu chin na Nyiɛkpɔɔ Biblɔ wi ŋu kre, ye mu to tra.
10 Ŋgi na hin? Pe ki yo mu tɛɛ mbo,
‘Nyiɛkpɔɔ we u nyjeeri bitumblɔ tun, mbe pe paan mu le.
11 A pie mu tɔwi kɛnyi ni, mbe mu jele wa gbun dnɛ na.’”c
12 A Yesu na kna mna yo u pan mbo, “Pe ki nyunɔ na chɔɔ na maa shia mu Tafun Nyiɛkpɔɔ nyu cha.”d
13 Ŋga Sutna wre na Yesu nyu cha kolo kro na a u nyu na to kre, wra u ti ma na nyjila ka sri.
Yesu U Tnumu Nɔɔhle
14 A Yesu na ndru mna sɛ Galilee na, na Kpra Ŋumu wree wa u nu, a u kee na kpali mu tro waŋgra kre nu kro poŋgo.
15 A wraa pe nyina pe fninyinyi nu, a leele pre kro naa u kaan mɛɛ.
Yesu Nazareth Kee Yoo
16 Yesu na sɛ Nazareth na, chia ŋga na pra u pɔɔri kre na, mna sɛ pe fninyuŋgo Wuuble, imi na wraa pini kre. Wra yiri mbe Nyiɛkpɔɔ hlɛ kre tɔɔnri,
17 a pra Nyiɛkpɔɔ kee nyanyofun Isaiah hlɛ kre nyaa mna le u kɛɛ, a wra hlɛ kre lawee ka nyaa, na pe nyunɔ wa mbo,
18 “O Tafun Ŋumu wree wa ni nu,
ki tia u ni wɔ mbe ni ketaan kre yo mbe shianfɛɛnlɛ nyina.
U ni tun mbe ni paan kee ŋga kie ti mbe tinlɛ peyɛ ta kre yo,
mbe fuunlo na nyaa, mbe mblɛ pe fiŋge,
a pra kala nyaa pre shɔ mbe pe wuu.
19 Mbe paan o Tafun wre leele nyina yɛlɛ ŋga na we pe shɔ.”e
20 Ŋga Yesu na lawee kre tɔɔnri mu kɔ kre, wra hlɛ kre tɔ mna ki le ŋmba wra pan mu u ŋga ki yi kre kɛɛ, mna tni. A leele pre praa wa fninyuŋgo wa kre kro na nyiɛlɛ kan u na na u le poŋgo.
21 A wra kna mna yo pe pan mbo, “Kee kre pe nyunɔ mu tɛɛ fa kre, aŋga ki pe kpra, a e ki loo na ndie ni.”
22 Leele pre kro yiɛ na shɔ u na, a ketɛɛn yire yiraa yilii u nyuu yire na pe kro pe kawako ni. A pra kna na peyɛ wie mbo, “Ŋmba ma Joseph biblɔ wree?”
23 A wra kna mna yo pe pan mbo “Kakra n wa ki na na yaa kre kee ŋga yo ni pan fio, ‘Ŋu yambla trafun, muyɛ tra. Kee nyjɛ o loo na mu pe Capernaum na kre, fuŋga mu da ŋu titi chia, yi pe mbe o le.’”
24 Mbo, “Kpra na ni yuu e pan na, Nyiɛkpɔɔ kee nyanyofun wa n wa a pe u shɔnli u chia fio.
25 La, kpra kee ni yuu e pan kre, nyjila ŋga nu Nyiɛkpɔɔ kee nyanyofun Elijah naa wa kre, lekuchiɛlɛ naa wa Israel leele nu tataara, a pra nyjeeri tɔ yɛlɛ taarɛ na nyiɛpɔ kɔɔnanu, na nyiɛ na pan, a klo na to tra kre nu kro.
26 Nde Nyiɛkpɔɔ nsra tia Elijah na sɛ ya pe wa na, la, Nyiɛkpɔɔ na tia wra sɛ ya lekuchlɔ wa na, wra yiri Zarephath na.
27 A Nyiɛkpɔɔ kee nyanyofun Elisha nyjila kre, yiranyiɛrɛfɛɛnlɛ tataara naa wa Israel leele nu, nde u nsra pe wa tra, la, Naaman ŋmba wra yiri Syria tra nu kre chiin wra tra.”
U Leele U Chaa Mbe Gbo
28 Ŋga leele mblɛ praa wa fninyuŋgo wa kre na kee yire loo kre, krɔ na pe kun kro.
29 A pra taan mna yiri, mna u krɔ ŋunɔ mna yili na u ni chia kre na, mna sɛ na u ni nyua ŋga na pra pe chia kre sin kre mana na, mnaa chaa mbe u ŋunɔɔ wa nyua wee ka nu.
30 A Yesu na nyaari mna tro leele pre nu mna sɛ.
Yesu Ŋumufɔɔnfun Tra
31 A wra yiri wa mna sɛ Galilee chia ŋga pe yeeri Capernaum kre na, mna sɛ paara mu pe nyina Judae Wuuble ka nu.
Luke 4:31-44
33 Ŋumufɔɔn naa wa blɔ wa nu fninyuŋgo wa, a wra paara gedeŋge mbo,
34 “Yesu ŋmba mu yiri Nazareth na, kee ŋgi ni wre na ŋu nyi hin? O klahaa mu pan ree? Ni chin ndro ŋmba sembremu wi ŋu, ŋu wi Nyiɛkpɔɔ Biblɔ cheche wre.”
35 A Yesu na kna mna fuu u na mbo, “Pieri mu yili u nu mu sɛ.” A ŋumufɔɔn kre na blɔ wre chan tra leele pre yiɛ na, mna chin mu yili u nu mu sɛ, a yaka nsra u ta.
36 Kra leele pre kro pe kawako ni, a pra kna mna na peyɛ wie mbo, “Yira ŋgi kee nyini yi ŋga hin? A ndro ja mu fuu jaŋga ni ŋumufɔɔn na, a ki yili u nu ŋga hin?”
37 Titɛɛ kre nu, Yesu kee na kpali tra kre nu kro poŋgo.
Simon Peter Nafun Chlɔ Tra Haa
38 Yesu na yili fninyuŋgo wa mna sɛ Simon katoo. Kre nyjila kre na kabro Simon nafun chlɔ yii, a pra u kee yo Yesu pan.
39 A wra sɛ yire u jaara mna fuu yira kre na. Titɛɛ kre nu, a kabro kre na laa chlɔ wre na, a wra saanla, mna yiri mu sro pe mu pe ŋga.
Wra Kawako Kee Pe Tataara
40 Ŋga yila na kɔ kre, mblɛ katoo yambla nyininyini na nyi kre na pe tio mna pan mu Yesu ŋga. A wra kɛnyi taa taa pe na nununu, mna pe tra kro.
41 Ŋumufuɛn na yili leele nu tataara, a praa gble leni na yuu mbo, “Ŋu wi Nyiɛkpɔɔ Biblɔ wre.”
A Yesu na fuu pe na. U nsra tia pra paara. Ŋgi na hin? Pra chin na wre wi Kristo wre.
Yesu Paara Judea Na
42 Ŋga nyiŋge na se kre, Yesu na yili wa mna sɛ mbɛɛ ka na wre nunu. A lenɛɛrɛ pre na u cha, mna sɛ u lawee. Ŋga pra u nya kre, pe nsraa chaa mbe u sɛ haka na.
43 La, Yesu na kna mna yo pe pan mbo, “Ki fna mbe ni Nyiɛkpɔɔ ketaan kre yo mbe tro chiɛ yɛ na na. Kre ndra na Nyiɛkpɔɔ yila mu ni tun.”
44 A wraa nyaari na ketaan kre kpali pe fninyinyi yire nu na tro.