Yesu Penlee
4
Titɛɛ kre nu a Nyiɛkpɔɔ Ŋumu wre na sɛ Yesu ni tablɔ tra kre nu, mbe Sutna sɛ u nyu cha.
2 A Yesu na ble fun ble nununu fuloe shiin, lafo na blee. Kre kɔkro kre, klo na u ta.
3 Bawa Sutna wre na pan u jaara, mna yo u pan mbo, “Na ŋu wi Nyiɛkpɔɔ Biblɔ wre titi kre, paara mbe dnɛ nyjɛ kaari paanu.”
4 A Yesu na kna mu yo u pan mbo, “Pra ki nyunɔ mu tɛɛ na,
‘ki n pe sro ŋga lewo we li chiin
na we yila mbe tni waŋgra nu, la,
kee ŋga ki yilii Nyiɛkpɔɔ nyuu.’”a
5 Ŋga kɔkro kre, Sutna na u bali mna sɛ Jerusalem chia kre na, mna sɛ yire na u ni Suminyuŋgo gedeŋge titi kre ndra na,
6 mna yo u pan mbo, “Na ŋu wi Nyiɛkpɔɔ Biblɔ wre titi kre, ye mu to tra mbe ni le. Ŋgi na hin? Pra ki nyunɔ mu tɛɛ mbo,
‘Mbe ni bitumblɔ tun,
mbe pe paan mu tɔwi,
mbe mu jele wa gbun dnɛ na.’”b
7 A Yesu na kna mbo, “Pan chɔɔ pe ki nyunɔ mu tɛɛ na,
‘Maa shia mu Tafun Nyiɛkpɔɔ pe mbe le.’”c
8 A Sutna na Yesu bali na, mna sɛ na u ni nyua gedeŋge ka ndra na, mna u nyina waŋgra ŋunumu, na ki yirɛ chichiele nyjɛ mu chin ŋga kro,
9 mna kna mu yo u pan mbo, “Na mu kosie kan mu ni sumi kre, mbe mu ŋga yirɛ nyjɛ mu nyaa ŋga kro.”
10 A Yesu na kna mu yo u pan mbo, “Sutna, flo wa mu sɛ. Pe ki nyunɔ mu tɛɛ na,
‘Mu Tafun Nyiɛkpɔɔ wre chiin yiɛ
ki fna mbe mu kosie kan mbe u sumi.’”d
11 Ŋga wra yo ma kre, a Sutna wre na u ti wa mna sɛ, a nyjeeri bitumblɔ na pan mna ya u na.
Yesu Na Sɛ Galilee Tra Nu
12 Ŋga Yesu na loo na pe John yii mu le nyuŋgo kre, a wra ndru mu sɛ Galilee tra nu.
13 U nsra sɛ tni Nazareth na, la, Capernaum chia ŋga kii wa Galilee tapla kre nyu na, Zebulun na Naphtali tra na kre, bawa wra sɛ tni.
14 Yire kee nyjɛ krɛrɛ na pe mna tia Nyiɛkpɔɔ kee nyanyofun Isaiah kee ŋga wra yo mu tɛɛ kre, na pe kpra mbo,
15 “Zebulun, na Naphtali trɛ nyjɛ yii wa epo kolo wa,
na shie Jordan lɔɔ kre kro,
na Galilee leele mblɛ pe n pe Judah leele pre.
16 Leele mblɛ praa wa mu tni wɔmu nu kre,
pe nyisee kpɔɔ nya,
a mblɛ pee wa mu tni kumu wɔmu tra na kre,
ndram saan, a pe nya.”e
17 Mu yire kre nyjila kre, Yesu naa yuu na, “Leele pe pe jawala chinɛ. Ŋgi na hin? Nyiɛkpɔɔ ŋunumu kre mbra mna.”
Bitumblɔ Jijirɛ Plɛ Yeerihaa
18 Ŋga Yesu naa nyaari Galilee tapla kre nyu na kre, wra Simon ŋmba praa yeeri Peter wre, na u chunu Andrew nya, na pee wa na asau waa, na mbroe woni.
19 A Yesu na pe yeeri mbo, “E pan e taa ni kro, mbe ti mbe e pe leele wɔfɛɛnlɛ.”
20 Titɛɛ kre nu, a pra pe asau yire ti wa, mna pan mu taa Yesu kro.
21 Ŋga wra yiri wa mna sɛ yiɛ chiɛri kre, wra Zebedee na u biile, James na John, nya na pee wa mu tni pe krɔ nu, na pe asau gbeele. A Yesu na biile pre yeeri.
22 Titɛɛ kre nu, a pra krɔ kre na pe lɛ ti wa, mna pan mu taa u kro.
Yesu Yambla Tra Galilee Na
23 Yesu na kila Galilee tra kre nu kro mnaa leele nyina Nyiɛkpɔɔ ŋunumu ketaan kre, pe fninyinyi yire nu, mnaa yambla kro trai.
24 A u kee na kpali mna sɛ Syria tra kre nu kro, a pra pan na yambla nyininyini mblɛ praa wa kanyana nu, na mblɛ nu ŋumufuɛn na nyi, na tɔɔlɔfɛɛnlɛ, na mblɛ pra fuuru kro ni, a wra pe kro tra.
25 A lenɛɛrɛ na yiri Decapolis chiɛ kɛ yire na, na Jerusalem, na Judea, na Galilee tra nu, na Jordan lɔɔ kre kro, mna pan mu taa u kro.