Yesu Paarahaa Nyua Na
5
Ŋga Yesu na lenɛɛrɛ pre nya ma kre, a wra nduu nyua ka na mna sɛ tni wa, a u bitumblɔ pre na u kɔŋgɔ ni mna sɛ tni u jaara.
2 A wra paara mna pe nyina mbo,
3 “Mblɛ yiɛ ki nyina Nyiɛkpɔɔ ŋumu wre na kre, pe wo yi dwamu.
Ŋgi na hin?
Pre pie nyjeeri ŋunumu kre ta.
4 Mblɛ pe nyɛni wo yi dwamu.
Ŋgi na hin?
Pre Nyiɛkpɔɔ we bre.
5 Mblɛ pe peyɛ nyjii kre, pre wo yi dwamu.
Ŋgi na hin?
Pre pie tra kre ta mbe tni.
6 Mblɛ kefrakaa klo, na ki gbɔɔ ta kre, pre wo yi dwamu.
Ŋgi na hin?
Nyiɛkpɔɔ we ti pe yɔɔ.
7 Fooro chinfɛɛnlɛ wo yi dwamu.
Ŋgi na hin?
Pre fooro Nyiɛkpɔɔ we chin.
8 Mblɛ lolonyi yi fniŋge kre, pre wo yi dwamu.
Ŋgi na hin?
Pre pie Nyiɛkpɔɔ nya.
9 Mblɛ pe paan na wejinyiŋge ni kre, pre wo yi dwamu.
Ŋgi na hin?
Pre pie yeeri Nyiɛkpɔɔ biile.
10 Mblɛ leele pra, pe frakaa ndra na kre, pre wo yi dwamu.
Ŋgi na hin?
Pre wo yi nyjeeri ŋunumu kre.
11 Yire mblɛ pe yila ni na, na e tɛɛlɛ, mu tia e na kala nyaa, mu na sisam kee ŋga kro fnɛ na taari e na kre, e wo yi dwamu.
12 E ti mbe e yiɛshɔ, mbe e wejinyi saan e na, yaka ma, e fɔtɔɔrɔ kpɔɔ nyjeeri. Pan chɔɔ pra Nyiɛkpɔɔ kee nyanyofɛɛnlɛ mblɛ pra yiɛklu mu pan pre pra.”
Weŋge Na Kania
13 “Yire lɛ waŋgra weŋge. La, na tnamu kɔ weŋge nu kre, ki n nyu mu yaka ŋga na, kna pie ki kna mbe wo, mbe leele ki taanla.
14 A yire lɛ waŋgra kania, chia ŋga kii wa nyua na kre wa jaa ndra.
15 A pan chɔɔ, pia kania mu mbe ki juule na gbaŋgɔ ni, la, nyjeeri pie ki taa mbe kra nyaa katoo lam.
16 Kena e ti mbe e kania nyi leele yiɛ na, mbe pe e kepele chichie nya, mbe e Lɛ ŋmba uu wa nyjeeri wre ŋga mɛɛ.”
Mbra Kee Nyinaa
17 “Yaashia jawa na mbra yire, ndee Nyiɛkpɔɔ kee nyanyofɛɛnlɛ kee yire klahaa ni pan, la, ni pan mbe e yi nya chasi.
18 La, kpra na ni yuu e pan, ŋga nyjeeri na tra n ta mu tro ŋga, kee fiɛn kuraa wa yili mbra yire nu, fɔna yi kro tnumu tun mu kɔ.
19 Ki tia na wa mbra yire fiɛn ka gbun mu wa, maa leele nyina fɔŋgɔ kre, pie ufun pe fiɛn Nyiɛkpɔɔ ŋunumu kre nu. La, ŋmba we li yi na mbe leele nyina, mbe pe li yi na kre, pie u yeeri lekpɔɔ Nyiɛkpɔɔ ŋunumu kre nu.
20 A e ti ni yo mbe e loo, na e frakaa n wɛ Pharisee, na Judae nyinafɛɛnlɛ pre na kre, yaa Nyiɛkpɔɔ ŋunumu kre ta mbe le fio.”
Krɔ Kɔɔn Na Linkuuro
21 “E loo na pra yo fawolo pre pan na,
‘Maashia liiku! Ŋgi na hin?
Linkufun we pimi li kpra kun ble kre.’a
22 La, mi yuu e pan na ŋmba we krɔ wru na u ŋmbrɔ ni kre we pimi li. A ŋmba we u ŋmbrɔ tɛɛlɛ kre we yire loplombo yiɛ. A ŋmba we yo u ŋmbrɔ pan na lewaa wi kre, we pimi li mbe sɛ kanyana kanhun kre nu.
23 Kena na mu chaa mbe sra wɔ sragbunu na mbe Nyiɛkpɔɔ ŋga, a mu sɔɔnri na mu sisaa ka pe mu ŋmbrɔ na kre,
24 kena mu sra wɔ yirɛ yire ti sragbunu kre jaara, mu sɛ ŋu na mu ŋmbrɔ wre lalaa gbeele tun, mu chin mu pan mu mu sra kre wɔ.
25 Na ŋu na ndro ta, a wra shie na mu ni kalalifɛɛnlɛ yiɛ na kre, kolo cha mbe e eyɛ lalaa gbeele tun, mbe waa chiin da na mu ni kpra kunfun wre yiɛ na. Na kre ma, kprakunfun wre we mu gbun pimi ni, mbe mu le lawee lefɛɛnlɛ pre kɛɛ, mbe pe sɛ mu le nyuŋgo.
26 Kpra na ni yuu e pan, kifun wre wa yili nyuŋgo wa, fɔŋga we yira ŋga pie shɔ u pan kre tɔ kro tun.”
Leŋgeere Klaa
27 “E loo na fawolo pre na yo na, ‘Yaashia tiɛri!’b
28 La, mi yuu e pan na, ŋmba we chlɔ le mbe u niŋge u yii kre, kena u tiɛri na u ni u loloŋgo nu.
29 Kena na mu kalie nyini shie na mu ni sisam nu, ki foli mu wa. Ki nyu mu mu ŋga na mu kokoo ka we kla, mu wɛ ŋga pie sɛ na mu wejiŋge poŋgo kre ni kanyana lawee kre nu.
30 A na mu kalie kɛ shie na mu ni sisam nu kre, ki kun mu wa. Ki nyu na mu kokoo ka we kla, mbe mu sɛ Nyiɛkpɔɔ ŋunumu nu, mu wɛ na mu wejipoŋgo ta, mbe pe sɛ na mu ni kanyana lawee kre nu.”
Leŋgeere Cheche
31 “A pra ki yo fa mu tɛɛ mbo,
‘Blɔ ŋmba we u chɔ je kpan,
ki fna mbe u u ŋga hlɛ,
mbe ki nyina na u u je.’c
32 La, mi rɛ, ni yuu e pan na, na ki n yire tiɛrɛɛ na, a blɔ u chɔ je kre, kena blɔ wre tia chlɔ wre tiɛri. A blɔ ŋmba we chlɔ wre leŋge kpan, u tiɛri na.”
Kpra Paaraa
33 “A e loo na pra yo fawolo pre pan na, pia na Nyiɛkpɔɔ dani finfin, la, ki fna kee ŋga na mu da kre, mbe ki pe kpra.
34 La, mi yuu e pan na, yaa shia yaka da, ndee mbe nyjeeri kuraa da, ŋgi na hin? Ki pe Nyiɛkpɔɔ tnihaa.
35 Ndee mbe tra da, ŋgi na hin? Ki pe Nyiɛkpɔɔ jeelee taa yira, ndee mbe Jerusalem da, ŋgi na hin? Ki pe ŋunu kpɔɔ chia.
36 Ndee mbe lewo ndra da. Ŋgi na, ma jaa nyjuro fiŋge, ndee wɔɔ nunu kuraa gbeele.
37 La, e ti mbe kee ŋga ee yo kro pe kpra, mbe e ‘Ɛnhɛɛn’ pe ‘Ɛnhɛɛn,’ mbe e ‘Ɔɔhɔn’ pe ‘Ɔɔhɔn,’ nyjɛ ee yo nyjɛ kɔkro kre, yi pe sisam.”
Jaaraa
38 “E loo na pra yo fawolo pre pan na,
‘Na ndro mu nyini ja, ki fna mbe pe u wo ja ka na,
ndee na ndro mu ŋgaala gbun mu kɔ kre, ki fna pe u wo gbun mbe kɔ na.’d
39 La, mi rɛ, ni yuu e pan na, yaa na sisaa pefɛɛnlɛ sisam fɔlɔ toni, na ndro mu yiɛ kalie wo ja kre, haŋa kre kna mu u ŋga.
40 A na ndro sɛ na mu ni kala li ndoo, mu sɛ mu dodoŋgi fimi wo shɔ kre, mu dodoŋgi lamwo wɔ mu ya u pan.
41 A na ndro yo mu kɔnsni nunu nyaari jaŋga na kre, ŋu na wre e nyaari kɔnsni shiin.
42 A ŋmba we mu tali kpan, u ŋga, a ŋmba we na chaa mbe jin mu pan kre, maashia je u pan.”
E E Loŋgoolo Kori
43 “E loo na pra yo fawolo pre pan na,
‘Mu ŋmbrɔ kori, mu mu loŋgo pra.’e
44 La, mi yuu e pan na, e e loŋgoolo kori, e na nyiɛtali e na mblɛ pe e leni kanyana nu pre kaan.
45 Na e pe ma, kie ti mbe e pe e Lɛ ŋmba uu wa nyjeeri wre biile. Ŋgi na hin? Wre u tii mbe yila yili sisaa pefɛɛnlɛ, na chichie pefɛɛnlɛ kro pan, mu tia nyiɛ na paan kprafɛɛnlɛ, na denyjuufɛɛnlɛ kro pan.
46 Kena na e mblɛ pe e chaa chiin kori kre, fɔtɔɔrɔ ŋgi ee ta hin? Pan ma Judae tɔɔ shɔfɛɛnlɛ, dnumufɛɛnlɛ pre kuraa pini kree?
47 Kena na e chichie pini na e nɔɔlɔ chiin kaan kre, ŋgi kie nyina na e wɛ leele hamblɛ pre na hin? Pan ma leele mblɛ pe n Nyiɛkpɔɔ chin pre pini kree?
48 Kena e na kee chichie pini nyjila kro nu, imi na e lɛ ŋmba uu wa nyjeeri wre chichie pini nyjila kro nu kre.”