2 Bawa Pharisee leele pre na pan mna u wie mbo, “Kena lewo blɔ wa na kolo ni, na we u chɔ je ŋgaa?” Kena pra ki tɛɛ mbe u pee le.

3 A wra kna mna pe wie mbo, “Mbra ŋgi Moses na le e pan kre hin?”

4 A pra kna, mbo, “Moses na o nyina na, na mu yo mu chlɔ je, ki fna mbe mu jeere hlɛ nyunɔ mbe u ŋga, mbe chiin u je.”

5 A Yesu na kna mbo, “E ndra shelee ndra na wra kre mbra kre le e pan.

6 Ŋga Nyiɛkpɔɔ na yirɛ gbeele jle kre, kre wra blɔ na chlɔ wa.

7 Kre ki tia mbe blɔ u lɛ, na u lo ti, mbe sɛ mbra u chɔ na kre,

8 mbe pe kro shiin pe wejikaara nunu.

9 Kena yira ŋga Nyiɛkpɔɔ mbra kre, yaa ti mbe lewo ki laa.”

10 Ŋga pra yiri wa mu sɛ katoo kre, u twanfɛɛnlɛ pre na u wie kee nunu kre na.

11 A wra kna mna yo pe pan mbo, “Blɔ ŋmba we u chɔ je mbe sɛ fɔŋgɔ leŋge kre, u leŋgeere kla chlɔ wre haa,

12 a na chlɔ wre waa u plɔ je, maa sɛ fɔŋgɔ leŋge, kena u leŋgeere kla na.”

13 Bawa praa paan na biile plɛ ni u pan, mbe u kɛ taa taa pe na, a u twanfɛɛnlɛ pre naa fuuru pe na.

14 Ŋga Yesu na pe nya kre, u krɔ na kun, a wra kna mna yo pe pan mbo, “E biile pre ŋga kolo mbe pe pan ni lawee. Yaa pe tɔ kolo. Pre mblɛ imi wo yi Nyiɛkpɔɔ ŋunumu kre.

15 Kpra na ni yuu e pan na, ŋmba u n Nyiɛkpɔɔ ŋunumu kre shɔ na pɔ wi kre, wa ki ta mbe sɛ.”

16 A wra biile pre fa mu yii nununu, mna kɛ taa taa pe na, mna pe dwan.

17 Ŋga Yesu na yiri wa mnaa shie kre, blɔ wa na fɛ mna pan mu kosie kan u yiɛ, mna u wie mbo, “Nyinafun chichuo, kee ŋgi mbe pe mbe blenyini ŋmaa ta hin?”

18 A Yesu na kna mu u wie mbo, “Mni a mu ni yeeri Nyinafun chichuo hin? Ndro n wa mu pe chiriri na nunu wre bɔkɔ, wre wi Nyiɛkpɔɔ wre.

19 Mu Nyiɛkpɔɔ mbra yire chin rɔ. Maa shia linkuuro kee pe, maa shia leŋgeere kla, a maa shia ju, maa shia kafinɛ dansiɛrɛ li, maa shia dnumu li, mu lɛ na mu lo shɔnli.”

20 A blɔ wre na kna mu yo u pan, mbo, “Nyinafun, nyjɛ krɛrɛ, mu yire ni bimi ni li yi na kro.”

21 A Yesu na u le dumm, mna u kori u loloŋgo nu, mna kna mu yo u pan mbo, “Ki kro mu kee nunu. Sɛ mu yirɛ nyjɛ yii wa mu pan kro prɛ mu shianfɛɛnlɛ ŋga swa kre, mu pan mu taa ni kro, kre mu krɔyirɛ ta nyjeeri.”

22 Ŋga Yesu na yo ma kre, wra yiɛ kla, mna sɛ fooro ni katoo. Ŋgi ndra na hin? Na wejiyirɛɛ wa blɔ wre pan tataara.

23 A Yesu na yiɛ wa mu fɛ mu kun, mna kna mu yo u twanfɛɛnlɛ pre pan mbo, “E n nya imi na kie sheli mbe swafun ŋga na we sɛ Nyiɛkpɔɔ ŋunumu kre nuu?”

24 Kee ŋga Yesu na yo kre na weere wo pe na. A Yesu na kna mu yo pe pan mbo, “Biile, e n nya imi na kie sheli mbe swafun ŋga, na we sɛ Nyiɛkpɔɔ ŋunumu kre nu ɛ?

25 Kii yiɛyiɛ na nyuuma we yili minyini wee nu, mu wɛ na swafun we sɛ Nyiɛkpɔɔ ŋunumu kre nu na.”

26 Ŋga wra yo ma kre, kra pe weere ni pe pan mu tro, a pra kna na yuu peyɛ pan mbo, “A kena ndro ŋmbi ŋmaa pie shɔ na hin?”

27 A Yesu na pe le dumm, mna kna mu yo pe pan, mbo, “Lewo haa kia jaa pan ma, nde Nyiɛkpɔɔ haa ma. Nyiɛkpɔɔ pan rɛ, yira kro we jaa pe.”

28 Bawa Peter na kna mu yo Yesu pan mbo, “Le, o yira kro kro ti, mu pan mu taa mu kro.”

29 A Yesu na kna mbo, “Kpra na ni yuu e pan na, ndro n wa mbe u katoo ti, ndee u nyjɔɔlɔ, ndee u chinlɛ, ndee u jaala, ndee u lo, ndee u lɛ, ndee u biile, ndee mbe u tra ti, mi na ketaan kre ndra na,

30 mbe wa kalonyi, na nyjɔɔlɔ, na chinlɛ, na jaala na loolo, na biile, na tra ta ma gbee lafaa lafaa mbe ya, mbe pe u le nyibie. La, mbakɔ waŋgra kre nu, we blenyini ŋmaa ta.

31 La, yɛkulo tataara we kɔɔ kro tɔ, mbe kotɔmblɔ kna mbe yiɛklu.”

32 Ŋga praa shie Jerusalem na kre, Yesu na yiɛklu pe pan, kra tia tutom na wo u twanfɛɛnlɛ pre na, a mblɛ pra taa pe kro pre, fiɛrɛ na pre yii. Bawa wra kɛmbɔshiin pre yeeri na, mnaa kee nyjɛ yie u nya yire yuu pe pan,

33 mbo, “E le, Jerusalem na o shie kre. Bawa pie mi Lewo Biblɔ wre wɔ mbe le Judae srawɔfɛɛnlɛ loplombo, na pe nyinafɛɛnlɛ pre kɛɛ, mbe pe ni gbun na kumu pimi ni, mbe ni wɔ mbe le leele mblɛ pe n Nyiɛkpɔɔ chin kɛɛ,

34 mbe praa ni pini mbra tɛɛ, mbe tɛɛnrɛ hlu mbra woni ni na, mbe ni frɔ na fwa ni, mbe chiin ni gbo. A ki ble taarɛwo na mbe nyi.”

35 A Zebedee biile, James na John na pan Yesu jaara mna pan mu yo u pan mbo, “Nyinafun, o chaa kee ŋga oo mu tali kpan, mbe mu ki pe mbe o ŋga.”

36 A wra kna mna pe wie mbo, “Yira ŋgi e chaa mbe ni pe mbe e ŋga hin?”

37 A pra kna mbo, “Ŋga o chaa mbe mu pe mbe o ŋga yi na, na maa sɛ mu yɛnyiŋge kre nu kre, mu ti mbe o wa tni mu kalie, mbe wa tni mu kamɛŋɛ.”

38 A Yesu na kna mu yo pe pan mbo, “E n chin kee ŋga e yuu. Ee jaa gbɔ na kanyana gbɔyira ŋga ni ni gboo nii? Ndee ee jaa ti mbe pe e ndrɛ je kanyana nu na mi wi ra?”

39 A pra kna mbo, “Oo ki ja.”

40 la, ni kalie na ni kamɛŋɛ tnɛɛ kre rɛ, mi wo ma mbe ni ndro ŋga ki yi. Mblɛ pan Nyiɛkpɔɔ ki wɔ mu tɛɛ pre wo yi.”

41 Ŋga u twanfɛɛnlɛ kɛ pre na John, na James kee kre loo kre, ki nsra pe lam nyiŋge kee pe pan.

42 A Yesu na pe yeeri mna pan mu fni, mna yo pe pan mbo, “E chin na mblɛ waŋgra leele yeeri ŋulo kre, pe peyɛ wru mu pe tafɛɛnlɛ, a pan pe kpɔɔmu jaŋga lii pe naa?

43 A yire rɛ, pan ma ki nyi e pan. Ŋmba we na chaa mbe pe e nu lekpɔɔ kre, ki fna mbe u uyɛ pe sumifun.

44 A ŋmba we na chaa mbe pe e yɛklo kre, u pe e kro tnu.

45 Mi Lewo Biblɔ wre n pan na pe ni sumi, la, sumi haa ni pan, mbe ni ŋmaa tɛɛ mbe lenɛɛrɛ ndra lɔ.”

46 Yesu na u twanfɛɛnlɛ pre na sɛ da Jericho na. Ŋga kra pan na wre na pre, na leele tataara plɛ na yili Jericho na mbe sɛ kre, na Timaeus biblɔ, Bartimaeus fuun wre, na uu wa mu tni kolo mbɛɛ na, na tali.

47 Ŋga wra loo na Yesu ŋmba u yiri Nazareth na wre wi kre, a wraa gble leni mbo, “Yesu David nana, ni fooro le ɛ!”

48 A leele tataara naa fuuru u na, na u pieri. Kre kuraa wra taa na gblee kre leni kpɔɔ mbo, “David nana, ni fooro le.”

49 A Yesu na yire mna kna mbo, “E u yeeri.” A pra fuun wre yeeri mna yo u pan mbo, “Ti mbe mu yiɛshɔ. U mu yeeri”

50 A fuun wre na u dodoŋgi wɔ mu wa, mna yiri mu pan Yesu jaara.

51 A Yesu na kna mu u wie mbo, “Kee ŋgi mu chaa mbe ni pe mbe mu ŋga hin?”

52 A Yesu na yo u pan mbo, “Sɛ, Mu shɔnlie mu shɔ,” Titɛɛ kre nu to, a wraa nyaa, mna kna mu taa Yesu kro.