Yesu Na Le Jerusalem Na
11
Ŋga praa mbra Jerusalem na, mna da Bethphage na Bethany na, Olive nyua kre mbɛɛ na kre, a wra u twanfɛɛnlɛ pre shiin wɔ mna tun,
2 mna yo pe pan mbo, “E sɛ kable ŋga kii wa e yɛsimi ŋga na. Na e le wa to, ee bubnɔ pɔ wa nya, ŋmba na ndro n da mu tni tun, a pe maŋa le u na mu pɔ, mbe e u saan mbe pan.
3 Na ndro waa e wie na yira ŋgi e pini ŋga hin? Mbe e yo ufun pan na, o Tafun u u chaa, a kia mu, we ndru mbe pan na u ni.”
4 A pra sɛ nya na pe bubnɔ pɔ wa pɔ katoo ka yiɛ lete na, a pra u saan.
5 A leele mblɛ praa wa wa pre na kna mbo, “Ŋgi e bubnɔ pɔ ŋmba saanri mbe sɛ pe hin?”
6 A pra kee ŋga Yesu na yo pe pan kre yo. A pra pe ŋga kolo a pra u saan mna sɛ.
7 A pra pan na bubnɔ pɔ wre ni, mu Yesu ŋga, mna pe yonyi wo u na, a Yesu na tni u na,
8 A leele tataara na pe yonyi chan kolo kre na, a plɛ na tinyi klɛ knumu nyaa wa, mu nyina kolo kre na kro, a wraa tro yi na.
9 A mblɛ pra yiɛklu, na mblɛ pra u kro tɔ pre naa gblee leni mbo,
“Hosanna!”
“Dwamu yi ŋmba u nyaari
o Tafun mɛɛ nu na paan wre.”a
10 “Dwamu yi o tolɛɛ David ŋunumu
ŋga ki paan kre!”
“Hosanna wa nyjeeri nyjeeri.”
Yesu Fig Tiŋge Sun
11 Ŋga Yesu na le Jerusalem na kre, a wra tro mna sɛ pe Suminyuŋgo wa mna yiɛ wa mna yirɛ nyjɛ yii wa wa yire le. A na yila kɔ, a wre na u twanfɛɛnlɛ kɛmbɔshiin pre na yili mu sɛ ŋunu Bethany na.
12 Ŋga nyiŋge na se a pra ndru mu yiri Bethany na na paan kre, klo na u ta.
13 A wra yire mna fig tiŋge ka nya haalee, na wrɛ ki tɔ poŋgo, a wra sɛ ki jaara na aada we sɛŋgɛ ta ki na mbe ka. Ŋga wra da ki jaara kre, u nsra yaka nya ki na, na wrɛ chiin bɔkɔ. Ŋgi na hin? Na tiŋge kre sɛ nyjila ma.
14 A Yesu na kna mu tiŋge kre sun mbo, “Ndro n wa mbaa ŋu sɛŋgɛ ta mbe li na fio.” Ŋga wra yo ma kre, u twanfɛɛnlɛ pre na ki loo.
Yesu Yirɛ Prɛfɛɛnlɛ Ni Sumindoo
15 Ŋga pra le Jerusalem na kre, a wra sɛ le pe Suminyuŋgo, mna leele mblɛ praa wa wa na yirɛ prɛ, na mblɛ praa loni pre kro ni mna yilii fimi na. Mna pe swa chinɛfɛɛnlɛ tebru, na pe mblɛ pe katoo kotulo prɛ kro jɔɛn kna mu juule.
16 U nsra ndro ŋga kolo, mbe u yira wru mbe yili Suminyuŋgo wa.
17 A wra yire wa mu pe nyina mbo, “Pe ki nyunɔ mu yo na, ‘Pe ni katoo kre yeeri nyiɛtalaa ndoo mbe waŋgrɛ kro ŋga.’b A yire rɛ, e ki wru mu pe ‘juolo ndrahaa.’”c
18 A pe srawɔfɛɛnlɛ loplombo na nyinafɛɛnlɛ pre na ki loo, na kolo ka chaa mbe u gbo, la, praa u fiɛ, ŋgi na hin? Imi na wraa leele pre nyina kre na ndro kro pe kawako ni.
19 Ŋga ble na wɔ kre, Yesu na u twanfɛɛnlɛ pre na yili chia kre na.
Fig Tiŋge Kre Kumu
20 Ŋga nyiŋge na se bnimi pupu, a pra ndru na tro kre, pra nya na fig tiŋge kre ku mu sɛ su ki didinyi na.
21 A Peter na sɔɔnri, mna kna mu yo Yesu pan mbo, “Nyinafun le, fig tiŋge ŋga mna sun kre ku.”
22 A Yesu na kna mu yo pe pan mbo, “E Nyiɛkpɔɔ shɔ e li.
23 Kpra na ni yuu e pan, na ndro ŋmba we yo nyua ŋga pan na kɔ mu sɛ to epo nu. A ufun n u jawala pe shiin shiin, mu shɔnli na ŋga u yuu kre we pe yɛŋgɛ kre, kie pe ma mbe ufun ŋga.
24 Kre ndra na ni yuu e pan na, yira ŋga ee wie kpan, e nyiɛtalaa nu kre, e shɔ e li na e ki ta, a kie pe ma mbe e ŋga.
25 A na e yire na nyiɛtali, na kala kaa wa, wa na u ŋmbrɔ lalaa kre, u ki ti u ufun kɛ, mbe u Lɛ ŋmba uu wa nyjeeri wre u sisam ti mbe u kɛ.
26 A na e n ti mu kɛ naa, e Lɛ ŋmba uu wa nyjeeri wre, wa e sisam ti mbe e kɛ.”
Pe Yesu Wie U Jaŋga Kre Yirihaa
27 A pra ndru mu pan Jerusalem na. Ŋga pra le na tro pe Suminyuŋgo kre lam kre, pe srawɔfɛɛnlɛ loplombo pre, na nyinafɛɛnlɛ pre na loplombo pre na pan u jaara,
28 mna u wie mbo, “Jaŋga ŋgi ni mu tnumu ŋga tuni hin? Ndee ndro ŋmbi sembremu u mu ŋga jaŋga, a mu tɛɛ na kee nyjɛ pini hin?”
29 A Yesu na kna mu yo pe pan mbo, “Mbe e wie kee nunu. Na e ki nyu wɔ kre, mbe e nyina jaŋga ŋga ni ni tɛɛ na kee nyjɛ pini.
30 John ndrɛ jee kre, nyjeeri kra yiri, ndee lewo pan hin? E ki nyu wɔ!”
31 A pra ki jawa mna ki kna peyɛ nu mbo, “Na o yo na nyjeeri kra yiri, we yo na ŋgi kra tia o nsra u shɔnli hin?
32 Kena o yo na lewo pan kra yiri ra?” Pe nsra ja mu nyu ka kun, na pe lenɛɛrɛ pre fiɛ. Ŋga kra tia rɛ, lenɛɛrɛ na John shɔnli na Nyiɛkpɔɔ kee nyanyofun wi yɛŋgɛ.
33 A pra kna mu yo Yesu pan mbo, “O n chin.”
A Yesu na kna mbo, “A mba e nyina jaŋga ŋga ni ni tnumu ŋga tuni.”