2 Na blɔ waa wa wa, praa u yeeri Zacchaeus, a wra pe tɔɔshɔfɛɛnlɛ lopom, mna pe swafun.

3 A wraa Yesu chaa mbe chin lewo ŋmba nyini wi, la, u nsra gede, a na leele pre nɛɛ. Ki tia u nsra ja mbe u nya.

4 Kra tia wra fɛ mna sɛ nduu tiŋge na yiɛ, mbe Yesu cha mbe le. Ŋgi na hin? Na bawa kolo kre na Yesu we tro.

5 Ŋga Yesu na da wa kre, a wra yiɛ yire mna le tiŋge kre na, mna yo u pan mbo, “Zacchaeus, pe nyaanyaa mu tii tra. Mu katoo ki fna ni tni aŋga.”

6 A wra pe nyaanyaa mna tii tra, mna Yesu wru na yɛshɔɔrɔ ni mna sɛ katoo.

7 Ŋga leele pre na ki nya ma kre, a praa taanri na yuu mbo, “U shie mbe sɛ le sisampefun pan.”

8 Bawa Zacchaeus na yiri mna yire leele pre yiɛ na, mna kna mbo, “Ni Tafun, le, mbe ni yirɛ nyjɛ yii wa ni pan yɔ shiin mbe shianfɛɛnlɛ ŋga yi yɔɔ. A na ni ndro wa yira dnumu kre, mbe ki tɔ ma gbee jijirɛ mbe ufun ŋga.”

9 A Yesu na kna mbo, “Aŋga ŋmaashɔmu pan katoo ŋga nu. A Abraham sele ndro wi kre.

10 Ŋgi na hin? Lewo Biblɔ wre pan mbe mblɛ pe fun kre haa cha, mbe pe shɔ.”

11 Ŋga leele pre naa wa mu yire na yire kee nyjɛ ndru kre, na u mbra Jerusalem na, a leele pre naa jawa na fuŋga pie Nyiɛkpɔɔ ŋunumulie nya na nyini ni. Bawa Yesu na pe gbun yomini ka,

12 mna yo mbo, “Blɔ wa na yiri, wra pe lepɔɔ, a wra sɛ waŋgra ka nu haalee, mbe pe sɛ u tɛɛ ŋunumu na mbe ndruu pan.

13 Ŋga wra yo we sɛ kre, wra u sumifɛɛnlɛ kɛ yeeri, mna pe kro ŋga, kre nyjila kre pɔni pɔni mna yo pe pan mbo, ‘E ta jafa lii na yi ni, mbe sɛ su ŋga ble mbe pan.’

14 La, wre titi chia kre leele nsraa u kee chaa, kra tia pra leele wɔ mu tun mna u kɔŋgɔ ni mbo, ‘O n na blɔ ŋmba chaa mbe u pe o ŋunu.’

15 Blɔ wre na sɛ u ŋunumu kre li, mna ndru mu pan. Ŋga wra le kre, titɛɛ kre nu, a wra tia pra u sumifɛɛnlɛ mblɛ wra ŋga swa kre yeeri, mbe pe paan u nyina tnu ŋga pe ta swɛ nyjɛ wra pe ŋga yire nu.

16 A jlewo wre na pan mna yo u pan mbo, ‘Ni tafun, mu pɔni kre mna ni ŋga kre, ni pɔni kɛ ta mu ya ki na.’

17 A wra kna mna yo u pan mbo, ‘Sumifun chichuo, mu ka pe. Ŋgi na hin? Chiɛri ŋga ni mu ŋga kre, mu kpra wru ki na. Kena mbe ti mu jaŋga li chiɛ kɛ na.’

18 A shiinwo wre na pan mbo, ‘Ni tafun, mu pɔni kre mna ni ŋga kre, ni pɔni kunɔ ta mu ya ki na.’

19 A wra kna mna yo u pan mbo, ‘Ŋu we jaŋga li chiɛ kunɔ na.’

20 A nunu pan mbo, ‘Ni tafun, mu pɔni kre yi kre, agua nu ni ki fo mu tɛɛ.

21 Ni mu fiɛ. Ŋgi na hin? Mu kee sheli. Yira ŋga ki n pe mu wo kuraa mu ki wrui, a lawee ŋga nu mu n luu kuraa mu kuun wa.’

22 A wra kna mna yo u pan mbo, ‘Sumifun sisaa, mu nyu kee ŋga mu yo kre na mbe mu gbun na pini ni. Na mu chin na ni kee sheli, a ndaa ŋga ki n pe ni wo kuraa wrui, na kuun mna ni n luu kre,

23 yira ŋgi ki tia mu n sɛ ni swa kre tɛɛ swa tɛɛ lawee hin? Kaa ŋga ni pan ŋga, mbe na ki wɔ, mbra tnu ta mbra ya ki na.’

24 A pe tafun wre na kna mna yo mblɛ praa wa mu yire u jaara kre pan mbo, ‘E pɔni kre shɔ u kɛɛ. E ki ya pɔni kɛfun wre pan.’

25 A pra kna mna yo u pan mbo, ‘O tafun, pɔni kɛ wre ta.’

26 A wra kna mbo, ‘Ni yuu e pan, ŋmba uu ka ni, mu ki le chichie kre, pie ka ya u pan, la, ŋmba uu fiɛn ni, a u n ki le chichie kre, fiɛn ŋga ni u nyi kre, pie ki shɔ u kɛɛ.

27 Ni loŋgoolo mblɛ pe n na chaa mbe ni pe pe ŋunu kre, e pan na pe ni mna, e pe gbo ni yiɛ.’”

28 Ŋga wra yire kee nyjɛ yo mna kɔ kre, a wra yiɛklu na shie Jerusalem na.

29 Ŋga wraa dani Bethphage na Bethany na, Olive nyua kre mbɛɛ na kre, a wra u twanfɛɛnlɛ pre shiin wɔ mna tun mbo,

30 “E sɛ kable ŋga kii wa e yɛsimi ŋga na. Na e lee wa to, ee bubnɔ pɔ wa nya na pe u pɔ tiŋge ka na. Ndro n da mu tni u na tun. E u saan e pan na u ni mna.

31 Na ndro waa e wie na mni a e na u saanri hin? E yo ufun pan na u kee shian mu o Tafun wre ŋga.”

32 A mblɛ wra tun pre na sɛ mna u nya imi na wra yo pe pan kre.

33 Ŋga praa bubnɔ pɔ wre saanri kre, a u tafun na kna mu pe wie mbo, “Mni a e na bubnɔ pɔ wre saanri hin?”

34 A pra kna mbo, “O Tafun u u chaa.”

35 A pra pan na bubnɔ wre ni mu Yesu ŋga, a pra pe yonyi nyaala mu wo u na, mna Yesu kɔ mu taa u na.

36 Ŋga wra tni u na na shie kre, a leele pre naa pe dodonyi woni na chaan kolo.

37 Pra da lawee ka nu, na bawa kolo nyi, mbe pe yire mbe Olive nyua kre tii. Bawa u twanfɛɛnlɛ tataara pre kro naa gble leni kpɔɔ, na Nyiɛkpɔɔ kaan mboo, kawako kee nyjɛ pe nya yire na,

38 na yuu mbo,

39 Na Pharisee leele pre plɛɛ wa lenɛɛrɛ pre nu, a pra kna mna Yesu wie mbo, “Nyinafun, fuu mu twanfɛɛnlɛ pre na mbe pe pieri.”

40 A wra kna mna yo pe pan mbo, “E ti ni yo e pan, na pe pieri kuraa kre, dnɛ nyjɛ kuraa we na gble leni.”

41 Ŋga wraa mbra Jerusalem na mna ki nya kre, ki kee na u pe fooro ni a wra nyɛni,

42 mna kna mbo, “Na mna chin ŋga kie pan mbe mu ŋga wejinyiŋge aŋga kre, a na fuŋgaami pe ki ndra mu na.

43 Ŋgi na hin? Ble yɛɛ wa na paan yire ble yire nu mu loŋgoolo we mu kuun fni, mbe nduu mu mboo na mbe paan mu tɔ, ma lawee ta mbe yili.

44 Pie ŋu na mu biile kla peii, hali nyuŋgo nunu chom kuraa pia ki ti. Ŋgi na hin? Nyjila ŋga nu Nyiɛkpɔɔ pan mu shɔhaa kre, mu n ki chin.”

45 A Yesu na sɛ le Suminyuŋgo wa, mna leele mblɛ praa yirɛ prɛ wa kre ni,

46 mna kna mu yo pe pan mbo, “Pe ki nyunɔ na,

47 Blenyini ŋga Yesu naa shie na nyina Suminyuŋgo wa. A srawɔfɛɛnlɛ loplombo pre, na Moses mbra nyinafɛɛnlɛ pre, na chia loplombo pre naa u chaa mbe gbo.

48 La, pe nsra kolo ŋga na pie tro chin. Ŋgi na, na leele pre kee nyjɛ wraa yuu yire chaa mbe loo.