Mary Na Latam Pe Yesu Na
12
Ŋga kra kro ble kɔɔnanu mbe Klɛntro ble kre da kre, Yesu na sɛ Bethany na, Lazarus ŋmba wra nyi kre chia.
2 Martha na yilakɔŋgɔ sro pe u pan, mna ki kɛ, a Lazarus na Yesu na tni na lii.
Mary anoints Jesus (John 12:1-11)
3 Bawa Mary na tlade ndiom taan gbolo kpɔɛ nyjɛ ndrɔ yi sheli yire ka wru, mna ki kna mu wo Yesu jeelee na, mna u ndra nyjure tɛɛ mu yi tlu. Tlade kre ndiom na katoo kre shɔ kro.
4 Yesu twanfɛɛnlɛ pre nunu ŋmba pe yeeri Judas Iscariot, ŋmba wra kɔ mu u wɔ mu ŋga kre, na kna mbo,
5 “Mni a u n tlade ŋga prɛ ŋga hin? Kie na da ndro nunu yɛlɛ nyu fɔtɔɔrɔ. Mu na jaa ki swa kre wru mbra shianfɛɛnlɛ kɛ.”
6 Ki n pe shianfɛɛnlɛ fooro chiɛn na wra kre kee ŋga yo, la, ŋga wra pe juo, a wre wraa pe swa tɔkli kre teeri, na ka lii ki nu ndra na yi.
7 A Yesu na kna mu yo mbo, “E u ti. U ki pe mu tɛɛ na ni kumu ble sri.
8 Yire na shianfɛɛnlɛ pre ee wa mu tni nyjila kro nu, a mi na yire n wa nyjila kro nu.”
Pe Chaa Mbe Lazarus Gbo
9 Ŋga Judae pre nɛɛrɛ na loo na Yesu wa Bethany na kre, pra sɛ wa. Yesu chiin ndra na ma pra yila mu sɛ, la, Lazarus ŋmba Yesu na nyi wre lehaa pra sɛ.
10 Srawɔfɛɛnlɛ loplombo pre, na pe jawala pe na pie Lazarus gbo mbe ya.
11 Ŋgi na hin? Judae pre tataara na yire u nyiiɛ kre na, mu laa loplombo pre kro, mu Yesu shɔ mu li.
Yesu Na Le Jerusalem Na
12 Ŋga nyiŋge na se kre, lenɛɛrɛ pre pra sɛ Klɛntro ble kre lihaa kre, na loo na Yesu paan Jerusalem na.
Triumphal entry (John 12:12-19)
“E Nyiɛkpɔɔ ŋga mɛɛ.
Ŋmba u paan o Tafun Nyiɛkpɔɔ mɛɛ nu wre wo yi dwamu.
Israel ŋunu wre wo yi dwamu.”a
14 Yesu na bubnɔ pɔ wa nya mna tni u na, imi na Nyiɛkpɔɔ hlɛ na ki yo fa kre mbo,
15 “Yaa ti mbe fiɛrɛ e yii,
Jerusalem leele.
E le, e ŋunu u paan kre,
mu tni bubnɔ pɔ na.”b
16 U twanfɛɛnlɛ pre nsra kee nyjɛ krɛrɛ nɔɔloo jle kre, la, nyjila ŋga nu wra ku mu nyi, mna u yɛnyiŋge ta kre, kre pra sɔɔnri na Nyiɛkpɔɔ hlɛ kre na ki yo fa, a pan pra u pe kre.
17 Lenɛɛrɛ mblɛ pre na Yesu naa wa, a wra Lazarus nyi mu yili faŋga nu kre, praa kee ŋga kra pe kre kpali na tro.
18 Kre kra tia lenɛɛrɛ pre na sɛ u fni, ŋga pra loo na u kre kawako kee ŋga pe kre ndra na.
19 Bawa Pharisee leele pre naa yuu peyɛ pan mbo, “Ŋga o pini kro, ka n na nyɔɔ. E le imi na waŋgra leele kro taa u kro ma rɛ.”
Ŋmaa Ŋga Kii Wa Kumu Kro
20 Mblɛ pra sɛ Jerusalem na ble lie yire nu sumi haa kre, Greek leele plɛ na chaa pe nu.
Jesus foretells his death (John 12:20-36)
21 A pra sɛ yo Philip ŋmba wra yiri Bethsaida ŋga kii wa Galilee tra nu wre pan mbo, “Ndoo, Yesu o chaa mbe nya.”
22 A Philip na sɛ ki yo Andrew pan, a pe kro shiin na sɛ ki yo Yesu pan.
23 A Yesu na kna mbo, “Nyjila kre da na pie Lewo Biblɔ wre ŋga u yɛnyiŋge kpɔɔ kre.
24 Kpra na, ni yuu e pan, na yua bie n to tra mu fɔɔn, kia fin, na ki n pe ma kie kro yua bie nunu chom tɛ. La, na ki fɔɔn, kena kie fin, mbe sɛ tataara.
25 Ŋmba u wre titi ŋmaa kori kre, kie yili u kɛɛ, a ŋmba u n u ŋmaa kori waŋgra ŋga nu kre, we ble nyini ŋmaa ta.
26 Ŋmba u chaa mbe ni sumi kre, u taa ni kro, mna mbe sɛ kpan, mi na wre wi. Ŋmba we ni sumi kre, ni Lɛ we u ŋga kpɔɔmu.”
Yesu U Kumu Kee Yuu
27 “Fuŋgaami ŋga, ni gbun ni fiiri, a mni mbe yo hin? Ni yo na, ‘Ndoo, maa ti mbe kre kanyana ŋga ni da ree?’ Mba yo ma, ni chin na kre ki tia ni pan, mbe paan kala nya kre nyjila ŋga nu.
28 Ndoo, ti mu mɛɛ yili!”
A mana ka na yili nyjeeri mbo, “Ni ni mɛɛ ŋga yɛnyiŋge, a mbe ndruu ki ŋga na.”
29 A lenɛɛrɛ pre praa wa mu yire wa kre na mana kre loo, a plɛ na yo mbo, “Nyiɛ ki twanri.” A plɛ na yo mbo, “Nyjeeri bituŋu u paara u pan.”
30 A Yesu na yo pe pan mbo, “Yire ndra na mana ŋga yila mu paara, ki n pe mi ndra na yi.
31 Fuŋga waŋgra kpra kun nyjila kre da, a fuŋga pie Sutna, waŋgra ŋunu wre kɔ u jɔɔn na mbe wa.
32 Na pia ni yire nyjeeri kre, mbe ndro kro tini mbe pan ni jaara.”
33 Wra kee ŋga yo mna tɛɛ mu kumu ŋga nyini we ku kre nyina.
34 A lenɛɛrɛ pre na kna mbo, “O mbra yire o nyina na Kristo wre wa ku fio. A mni mna yuu na ki fna pe Lewo Biblɔ wre yire nyjeeri hin? Ŋmbi wi Lewo Biblɔ wre hin?”
35 A Yesu na kna mbo, “Nyjila chiɛri ka ki kro mbe kania kre tni e jaara. Nyjila ŋga e kania kre ta ŋga, e nyaari ki na, mbe wɔmu kre wa e tɔ. Lewo ŋmba u nyaari wɔmu nu kre n chin mna u shie.
36 Ŋga e kania kre ta ŋga, e ki shɔ e li, imi kie pe mbe e ja mbe pe kania kre biile.”
Ŋga Yesu na yire kee nyjɛ yo mu kɔ kre, a wra yili pe nu mna sɛ ndra haka.
Judae Pre Nsra U Shɔ Mu Li
37 Wra kawako kee tataara pe pe yiɛ na, nde pra je pe nsra u shɔ mu li,
Believers and unbelievers (John 12:37-50)
“O Tafun, leele mblɛ pe o kee kre shɔ mu li hin?
A leele mblɛ o Tafun na u jaŋga kre wɔ mu nyina hin?”c
39 Kre kra tia pe nsra ja mu shɔ mu li, ŋgi na hin? Isaiah na ki yo na, mbo,
40 “Nyiɛkpɔɔ pe nyiɛlɛ tɔ,
mu pe jawala kna,
imi kie pe mbe pia nya.
Ndee mbe kala nɔɔloo,
mbe kna mbe pan ni pan,
mbe ni pe tra.”d
41 Isaiah na yire kee nyjɛ yo. Ŋgi na hin? Wra Yesu yɛnyiŋge kre nya.
42 Judae loplombo pre tataara na u shɔ mu li, la, praa fiɛ Pharisee leele pre na, ki tia pe nsra peyɛ kpali. Na pra peyɛ kpali kre, pie na pe ni mbe yili Suminyuŋgo wa.
43 Praa mɛɛ chaa leele pan, mu wɛ mɛɛ ŋga Nyiɛkpɔɔ we pe ŋga na.
Yesu Na U Lɛ Wre
44 Yesu na paara kpɔɔ mbo, “Ŋmba u ni shɔ mu li kre, mi nunu ma u shɔ mu li, la, u ni Lɛ ŋmba u ni tun wre shɔ mu li na.
45 A ŋmba u ni nya kre, u ŋmba u ni tun wre nya na.
46 Ni pan mu pe waŋgra kania, mbe ŋmba we ni shɔ mbe li wre, wa kro wɔmu nu.
47 Ŋmba we ni kee loo mbe ndikana pe ki na kre, mi ma mbe u gbun pimi ni. Ŋgi na hin? Ni n pan waŋgra leele kpra kun haa, la, ni pan mbe pe ŋmaa shɔ.
48 Ŋmba we mi na ni kee kre je kre, u kpra kunfun wa. Kee ŋga ni yo kre kie ufun kpra kun, ble ŋga ki kro tɔ kre nu.
49 Niyɛ jaŋga ni ma ni paara. Ni Lɛ ŋmba u ni tun wre u ni nyina ŋga mbe yo, na imi mbe paara.
50 A ni chin na ŋga u ni nyina kre paan blenyini ŋmaa ni. Ŋga ni yo ŋga, kre ni Lɛ wre ni nyina na ni yo.”